သိုၵ်းမၢၼ်ႈ ဢဝ်ၶိူင်ႈမိၼ်တင်း ၵွင်ႈလူင် တိုၵ်းယိုဝ်းၸွမ်းသၢႆသဵၼ်ႈတၢင်းၽႅၼ်ၵၢၼ် ရူတ်ႉၾႆး (ရူတ်ႉ လဵၼ်း) ၼႂ်းၵႄႈမူႇၸေႊ – ဝဵင်းလိူဝ်ႇၼႆႉ ႁဵတ်းႁႂ်ႈၵူၼ်းမိူင်း လူႉတၢႆမၢတ်ႇၸဵပ်း 200 ပၢႆ – ၵဝ်ႉငဝ်ႈ သုၼ်ႇလႆႈၵူၼ်းၸိုင်ႈတႆး (SHRF) ဢွၵ်ႇၽိုၼ်တၢမ်းငဝ်းလၢႆးဝႆႉ မိူဝ်ႈဝၼ်းတီႈ 20/12/2024 ၼႆႉၼင်ႇၼႆ။
တႄႇဢဝ် ဝၼ်းတီႈ 09/10/2024 တေႃႇထိုင် 10/12/2024 ၼႂ်းၶၢဝ်းတၢင်း 2 လိူၼ်ၼႆႉ သိုၵ်းမၢၼ်ႈ ဢဝ်ၶိူင်ႈ မိၼ် – ၵွင်ႈလူင်ယိုဝ်း ၼႂ်းမိူင်းတႆးပွတ်းႁွင်ႇ 9 ၸႄႈဝဵင်း မိူၼ်ၼင်ႇ ၸႄႈဝဵင်းသီႇပေႃႉ၊ မိူင်းယႆ၊ သႅၼ်ဝီ၊ လႃႈသဵဝ်ႈ၊ ၵုၼ်လူင်၊ ၼွင်ၶဵဝ်၊ ၼမ်ႉသၼ်ႇ၊ ၵူတ်ႉၶၢႆ၊ ၵျွၵ်ႉမႄႈလႄႈ ႁူမ်ႈလူၺ်ႈ ၸႄႈဝဵင်းမိူင်းၵုတ်ႈသေ ၸၢၵ်ႇမၢၵ်ႇတိူဝ်ႉၺႃး ၵူၼ်းမိူင်းလူႉတၢႆ 68 ၵေႃႉ၊ မၢတ်ႇၸဵပ်း 136 ၵေႃႉလႄႈ ႁိူၼ်းတိူၵ်ႈ၊ ႁူင်းႁဵၼ်း၊ ႁွင်ႈ ပၼ်ယႃ၊ ဝတ်ႉဝႃး၊ ၵျွင်းၶရိတ်ႉယၼ်ႇ၊ ႁၢၼ်ႉၶၢႆၶူဝ်းလႄႈ ႁူင်းသိုင်ႇယႂ်ႇလူင် တင်းမူတ်း လူႉၵွႆ 339 လင် ဝႃႈၼႆ။
ၼႂ်းၽိုၼ်တၢမ်းငဝ်းလၢႆး SHRF ၼၼ်ႉ ဢွၵ်ႇဝႆႉဝႃႈ – ၸႄႈဝဵင်းၸိူဝ်းၺႃးသိုၵ်းမၢၼ်ႈ မႃးတိုၵ်းယိုဝ်းၼၼ်ႉ ပဵၼ်ၼႂ်း ၸႄႈဝဵင်း ဢၼ်ၸုမ်းလုၵ်ႉၽိုၼ်ႉၶဝ် ၵုမ်းၵမ်လႄႈ ပူၼ်ႉမႃးပႆႇႁိုင်ၼႆႉ ဢမ်ႇမီးပၢင်တိုၵ်းသင် – ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈၽူႈတွႆႇႁွၵ်ႈဝႃႈ – “လွင်ႈလူႉသုမ်းလူႉလႅဝ် ၵူၼ်းမိူင်းလႆႈလူႉတၢႆ မၢတ်ႇၸဵပ်းၸိူဝ်းၼႆႉ သိုၵ်းမၢၼ်ႈၶဝ် တၵ်းတေလႆႈႁပ်ႉဢဝ်ပုၼ်ႈၽွၼ်း တင်းမူတ်းဢေႃႈ” – ဝႃႈၼႆ။
ၸွမ်းၼင်ႇ ႁူဝ်ယွႆႈ ၵူၼ်းမိူင်းလႆႈလူႉတၢႆမၢတ်ႇၸဵပ်း ႁိူၼ်းယေး/ တိုၵ်းလူႉၵွႆ ၼႂ်းၶၢဝ်းတၢင်း 2 လိူၼ်မႃးၼႆႉ မိူၼ်ၼင်ႇ – ၸႄႈဝဵင်းသီႇပေႃႉ တိူဝ်ႉၺႃးၵူၼ်းမိူင်းလူႉတၢႆ 3 ၵေႃႉ၊ မၢတ်ႇၸဵပ်း 5 ၵေႃႉ၊ ႁိူၼ်းယေး/ တိုၵ်း လူႉၵွႆ 15 လင်။ မိူင်းယႆ လူႉတၢႆ 1 ၵေႃႉ၊ မၢတ်ႇၸဵပ်း 9 ၵေႃႉ၊ ႁိူၼ်းယေး 5 လင်။ သႅၼ်ဝီ လူႉတၢႆ 5 ၵေႃႉ၊ မၢတ်ႇၸဵပ်း 19 ၵေႃႉ၊ ႁိူၼ်းယေး 16 လင်။ လႃႈသဵဝ်ႈ လူႉတၢႆ 3 ၵေႃႉ၊ မၢတ်ႇၸဵပ်း 8 ၵေႃႉ၊ ႁိူၼ်းယေး 26 လင်။ ၵုၼ်လူင် မၢတ်ႇၸဵပ်း 1 ၵေႃႉ၊ ႁိူၼ်းယေး 21 လင်။ ၼွင်ၶဵဝ် လူႉတၢႆ 33 ၵေႃႉ၊ မၢတ်ႇၸဵပ်း 42 ၵေႃႉ၊ ႁိူၼ်းယေး 135 လင်။
ၸႄႈဝဵင်းၼမ်ႉသၼ်ႇသမ်ႉ လူႉတၢႆ 1 ၵေႃႉ၊ ႁိူၼ်းယေး 2 လင်။ ၵူတ်ႉၶၢႆ လူႉတၢႆ 3 ၵေႃႉ၊ မၢတ်ႇၸဵပ်း 14 လင်၊ ႁိူၼ်းယေး 27 လင်။ မိူင်းၵုတ်ႈ လူႉတၢႆ 9 ၵေႃႉ၊ မၢတ်ႇၸဵပ်း 13 ၵေႃႉ၊ ႁိူၼ်းယေး 50 လင်လႄႈ ၸႄႈ ဝဵင်း ၵျွၵ်ႉမႄး လူႉတၢႆ 10 ၵေႃႉ၊ မၢတ်ႇၸဵပ်း 25 ၵေႃႉ ႁိူၼ်းယေး 42 လင် – SHRF ဢွၵ်ႇဝႆႉၼင်ႇၼႆ။
လိူဝ်ၼၼ်ႉ သိုၵ်းမၢၼ်ႈ တင်ႈၸႂ်တိုၵ်းယိုဝ်း ၼႂ်းပွတ်းတွၼ်ႈတၢင်းႁွင်ႇ ဢၼ်မီးၽႅၼ်ၵၢၼ် ၶူင်းၵၢၼ် သဵၼ်ႈတၢင်းရူတ်ႉၾႆး ႁႅင်းဝႆးၶွင်ၶႄႇ ဢၼ်လုၵ်ႉဢဝ်မူႇၸေႊထိုင် ၵျွၵ်ႉၽိဝ်ႇ (မိူင်းရၶႅင်ႇ) ဢၼ်မိၼ်း ဢွင်ႇလႅင်ႇ ၸင်ႇႁႃပိုၼ်ၽၢဝ်ႇ ဝၢႆးႁူပ်ႉၵႅမ်ၸွမ်ၸိုင်ႈၶႄႇ လိၶျဵင်ႊ မိူဝ်ႈဝၼ်းတီႈ 06/11/2024 ၼၼ်ႉဝႃႈ တေတႄႇ“ၼႂ်းပိုၼ်ႉတီႈ ဢၼ်ၸၢင်ႈပဵၼ်လႆႈ” ၼႆၼၼ်ႉယဝ်ႉ။
“ပၢင်တိုၵ်းၼႆႉ ပဵၼ်ၸွမ်းသၢႆသဵၼ်ႈတၢင်းၶူင်းၵၢၼ် ရူတ်ႉၾႆးဝႆးႁႅင်းၶႄႇ ဢၼ်ဢၢၼ်းႁဵတ်းၼႂ်းမိူင်းတႆး ပွတ်းႁွင်ႇ ၼၼ်ႉ ပၢင်တိုၵ်းၸိူဝ်းၼႆႉ မၼ်းမိူၼ်ၵၢၼ်ႁၢင်ႈႁႅၼ်း တႃႇႁဵတ်းၶူင်းၵၢၼ်ၼႆႉ ၵမ်းသိုဝ်ႈ ဝၢႆးမိၼ်းဢွင်ႇလႅင်ႇ ပွၵ်ႈမိူင်း ၶႄႇမႃးယဝ်ႉ မၼ်းၵေႃႈမႃးပိုတ်ႇလၢတ်ႈဝႃႈတေႁဵတ်းၼႂ်းၼႃႈတီႈ ဢၼ်ၸၢင်ႈႁဵတ်းလႆႈၼႆ ပွင်ႇဝႃႈ မၼ်းဢမ်ႇသူၼ် ၸႂ်ပီႈၼွင်ႉၵူၼ်းမိူင်း ဢၼ်တူၵ်းတၢင်းယၢပ်ႇၽိုတ်ႇ ၼႂ်းၵႄႈပၢင်တိုၵ်း ဢၼ်ဢဝ်ၶိူင်ႈမိၼ်တိုၵ်း ပွႆႇမၢၵ်ႇမီးလွင်ႈလူႉသုမ်းယႂ်ႇလူင် ၸိူဝ်းၼၼ်ႉ မၼ်းၵူၺ်း သူၼ်ၸႂ်ႁႂ်ႈဢႃႇၼႃႇ မၼ်းမၼ်ႈၵိုမ်းလႄႈ ပိုတ်ႇတၢင်းပၼ်ၶူင်းၵၢၼ်ၶႄႇၼၼ်ႉ ၵူၺ်း” – ၸၢႆးႁေႃသႅင် သိုပ်ႇလၢတ်ႈၼႄၼင်ႇၼႆ။
သဵၼ်ႈတၢင်း ရူတ်ႉၾႆး ဢၼ်မီးတၢင်းယၢဝ်း 409.96 ၵီႊလူဝ်ႊမီႊတိူဝ်ႊ ၼႂ်းၵႄႈမူႇၸေႊလႄႈ ဝဵင်းလိူဝ်ႇၼၼ်ႉ တေ ၸႂ်ႉတိုဝ်းငိုၼ်း တေႃႊလႃႊဢမေႊရိၵၼ်ႊ 8.9 ႁဵင်လၢၼ်ႉလၢၼ်ႉ ၼႂ်းၼၼ်ႉ တေပႃး ၸွမ်း လွင်ႈတေသၢင်ႈၶူဝ် 124 လင်၊ ၸူင်ႁူးပိုင်ႈလိၼ် 60 ဢၼ်လႄႈ ဢွင်ႈတီႈ ၵိင်ႇၽႄၾႆး 11 တီႈ၊ ဢၼ်တေ လႆႈပိုင်ႈဢိင် ၾႆးၾႃႉႁႅင်းၼမ်ႉ ၾၢႆဢၼ်တိုၵ်ႉသၢင်ႈလႄႈ တင်းဢၼ်သၢင်ႈယဝ်ႉ။ ၵမ်ႈၼမ် ၶွမ်ႊပၼီႊ ၶႄႇၶဝ် ပဵၼ်ႁႅင်း ယူႇတၢင်းလင် ၵမ်ႉၸွႆႈ မိူၼ်ၾၢႆၼမ်ႉမၢဝ်း၊ ၼမ်ႉတူႈလႄႈ ၼမ်ႉၶူင်း ၼႂ်းမိူင်းတႆးပွတ်းႁွင်ႇ – SHRF ဢွၵ်ႇဝႆႉထႅင်ႈၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ