မိူဝ်ႈဝႃး ဝၼ်းတီႈ 19/11/2024 ယၢမ်းၵၢင်ၼႂ် 10 မူင်း ၵဵတ်ႉလၢၼ်ႇတီႈလႅၼ်လိၼ်တႆး- ၶႄႇ ပိုတ်ႇၶိုၼ်းလႄႈ ၵႃးတၢင်ႇၶူဝ်းၵုၼ်ႇၵိၼ်ယႅမ်ႉ တေႃႉၶဝ်ႈဢွၵ်ႇ ၶိုၼ်းလႆႈလီငၢမ်း ဝႃႈၼႆ။
ၽၵ်းတူၸၢင်ႉၽိူၵ်ႇၼႆႉ မိူင်းၶႄႇ တႄႇသင်ႇႁၢမ်ႈတေႃႉၶူဝ်းၶဝ်ႈဢွၵ်ႇမိူဝ်ႈ ဝၼ်းတီႈ 11/11/2024 ယၢမ်းၵၢင်ၼႂ် ႁိုင်လႆႈ 8 ဝၼ်း ၸင်ႇပၼ်ၶဝ်ႈဢွၵ်ႇၶိုၼ်း။
ၵူၼ်းၸၢႆးမိူင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဝႃး ၽၵ်းတူသွင်ၸိုင်ႈမိူင်း ပိုတ်ႇၶိုၼ်းမိူဝ်ႈ 10 မူင်း ၵၢင်ၼႂ်၊ ပိုတ်ႇပၼ်ၵႃးတၢင်ႇ ၶူဝ်းၵုၼ်ႇၵိၼ်ယႅမ်ႉၶိုၼ်းယဝ်ႉ။ ၶူဝ်းၵုၼ်ႇဢၼ်ၶဝ်ႈမႃးလႆႈ တၢင်းမူႇၸေႊ ၵေႃႈၶဝ်ႈမႃးယဝ်ႉ။ ၵူၺ်းၵႃး ဢၼ်တေၶိုၼ်းၶဝ်ႈၵႂႃႇတၢင်ႇၶူဝ်း တၢင်းမိူင်းၶႄႇ ဢဝ်ၶဝ်ႈမိူင်းတႆးၼၼ်ႉတႄႉ မိူင်းၶႄႇပႆႇပၼ်ၶဝ်ႈ”- ဝႃႈၼႆ။
ၶူဝ်းၵုၼ်ႇ တႃႇဢဝ်ၶဝ်ႈမႃးသမ်ႉ ၶႄႇႁႂ်ႈဢဝ်ၶဝ်ႈတၢင်းၽၵ်းတူမၢၼ်ႈဝဵင်း၊ ၵူၺ်းၵႃႈ တီႈၽၵ်းတူ မၢၼ်ႈဝဵင်းၼၼ်ႉ မၢၼ်ႈသမ်ႉ ဢမ်ႇပၼ်ဢဝ်ၶဝ်ႈ။ ႁဵတ်းႁႂ်ႈၵူၼ်းမိူင်း ၾင်ႇမိူင်းတႆး – မိူင်းမၢၼ်ႈ ယၢပ်ႇၽိုတ်ႇၵိၼ်းၸႂ် ၊ ၶူဝ်းၵုၼ်ႇၵိၼ်ယႅမ်ႉၶၢတ်ႇ ႁဵတ်းႁႂ်ႈၵႃႈၶၼ်ပုင်ႈသုင်။
ၽၵ်းတူၶၢမ်ႈလႅၼ်လိၼ်တႆး – ၶႄႇၼႆႉ တီႈမူႇၸေႊ မီးဝႆႉ 3 တီႈ။ ၽၵ်းတူမၢၼ်ႈဝဵင်းၼႆႉ ၵမ်ႈၼမ် တေပဵၼ်ၽၵ်းတူ ဢၼ်ရူတ်ႉၵႃး တၢင်ႇၵုၼ်ႇသႅၼ်းယႂ်ႇလတ်းၶၢမ်ႈ။ ၽၵ်းတူ ႁေႃၶမ်းလူင်တႄႉ တေပဵၼ်တႃႇ ၵူၼ်းၶဝ်ႈဢွၵ်ႇဢႅဝ်ႇယဵမ်ႈတွင်ႈတဵဝ်းလႄႈ ရူတ်ႉၶိူင်ႈ ၶၢမ်ႈလႆႈဢိတ်းဢွတ်း။ ၽၵ်းတူ ၸၢင်ႉၽိူၵ်ႇၼၼ်ႉ သမ်ႉပဵၼ်တႃႇရူတ်ႉၶိူင်ႈ၊ ၵႃးသုၼ်ႇတူဝ် လတ်းၶၢမ်ႈ။ ယၢမ်းလဵဝ် ၾၢႆႇၶႄႇ – ၾၢႆႇမၢၼ်ႈ ဢွၵ်ႇပိူင်ႁႄႉႁၢမ်ႈ လၢႆလွင်ႈလႄႈ ဢမ်ႇမိူၼ်ၵဝ်ႇ။
မိူၼ်ၼင်ၼႆ တႄႇဢဝ် ဝၼ်းတီႈ 24/10/2024 မႃး မိူင်းၶႄႇ ႁၢမ်ႈဢဝ်ၶူဝ်းၵုၼ်ႇ တၢင်းမိူင်းၶႄႇ ၶၢမ်ႈလႅၼ် လိၼ်ၶဝ်ႈမိူင်းတႆး – မိူင်းမၢၼ်ႈ တီႈၵဵတ်ႉ/ လၢၼ်ႇ သိုၵ်းဝႃႉၼႆႉၵေႃႈ ပိုတ်ႇပၼ်ၶိုၼ်းယဝ်ႉၼႆ ၵူၼ်းပိုၼ်ႉ တီႈ လၢတ်ႈၽူႈတွႆႇႁွၵ်ႈ ၼင်ႇၼႆ။
“ၾၢႆႇတၢင်းၶႄႇ ပိုတ်ႇပၼ်ၵဵတ်ႉလၢၼ်ႇ တင်းလႅၼ်လိၼ် တီႈဢၼ်သိုၵ်းဝႃႉ ၵုမ်းၵမ် ၶိုၼ်းယဝ်ႉ၊ ယဝ်ႉၵေႃႈ ပိုတ်ႇပၼ်လႅင်းဢိၼ်ႊထိူဝ်ႊၼႅတ်ႊတင်းလႅၼ်လိၼ်ယဝ်ႉ”- ဝႃႈၼႆ။
ယူႇတီႈ လွင်ႈၼႆႉသေ ၾၢႆႇတင်းၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇတိတ်းတေႃႇ ၽူႈၶၢၼ်ပၢၵ်ႇသိုၵ်းဝႃႉ ယူႇၵေႃႈ ဢမ်ႇလႆႈၶေႃႈယိုၼ်ႈယၼ်။
ၶႄႇသင်ႇဢိုတ်းႁၢမ်ႈၵဵတ်ႉလႅၼ်လိၼ်တႆး – ၶႄႇ လႄႈ ၶူဝ်းၵုၼ်ႇမိူင်းၶႄႇ ဢၼ်တေၶဝ်ႈမႃး မိူင်းတႆးပွတ်းႁွင်ႇၼၼ်ႉ ၵိုတ်းၶၢတ်ႇ၊ ၶၼ်ၵုၼ်ႇ ၼႂ်းၸိုင်ႈတႆးပွတ်းႁွင်ႇ ၶိုၼ်ႈသုင်ႁႅင်းၼမ်လိူဝ်၊ ၵူၼ်းပိုၼ်ႉတီႈ ပဵၼ်ဢၼ်ယၢပ်ႇၸႂ် မွင်းဝၼ်း ဢၼ်တေၵႃႉၶၢႆလႆႈလီၶိုၼ်း မိူၼ်ၵဝ်ႇၼႃႇယဝ်ႉ- ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ