ပူၼ်ႉမႃး ဢမ်ႇပႆႇႁိုင်ၼႆႉ ၾၢႆႇထိင်းသိမ်းသၽႃႇဝ သိင်ႇဝႅတ်ႉလွမ်ႉ ထူပ်းႁၼ်ႁၢင်းငိူၵ်ႈ ဢၼ်ၸိူဝ်ႉၽၼ်း ၸမ်တေမူၺ်ႉႁၢႆ 5 ႁၢင်း တီႈၼႂ်းသူၼ်သတ်း ၵႃႇတႃႇမုၼ်း (Cardamom National Park) မိူင်းၵမ်ႇပူးၶျႃး ဝႃႈၼႆ။

ငိူၵ်ႈၼႆႉ ပဵၼ်သႅၼ်းၸိူဝ်ႉၽၼ်းငိူၵ်ႈ သီႇယႃႇမီႇ(Siamese) ။ ဢၼ်ထူပ်းႁၼ်ပွၵ်ႈၼႆႉ ပဵၼ်ၵမ်းႁႅၵ်ႈ ၼႂ်းၶၢဝ်းတၢင်း 20 ပီသေ ပဵၼ်ၸိူဝ်ႉၽၼ်း သီႇယႃႇမီႇ ဢၼ်ၵိူတ်ႇၼမ်လိူဝ်ပိူၼ်ႈသုတ်း တီႈၼႂ်းမိူင်းၵမ်ႇပူးၶျႃး။ ထူပ်းႁၼ် ၶႆႇငိူၵ်ႈ 100 ပၢႆ၊ ၼႂ်းၼၼ်ႉၶႆႇ 66 လုၵ်ႈ လူႉလႅဝ်ပႅတ်ႈ။ ၵိုတ်း 60 လုၵ်ႈၵူၺ်း တႅၵ်ႇဢွၵ်ႇပဵၼ်တူဝ်မႃး – ၼႆယဝ်ႉ။

ၸိူဝ်ႉၽၼ်းငိူၵ်ႈသႅၼ်းၼႆႉ ႁၢႆၵႂႃႇ ႁိုင်ၶၢဝ်းတၢင်း 20 ပီပၢႆယဝ်ႉသေ တိုၵ်ႉထူပ်းႁၼ်ၶိုၼ်းယၢမ်းလဵဝ် ဝႃႈၼႆ။

ၸိူဝ်ႉၽၼ်းငိူၵ်ႈ သီႇမီႇယႃႇၼႆႉ ၼႂ်းလုမ်ႈၾႃႉ မီးႁိမ်းႁွမ်း 100 ၵူၺ်း။ တီႈမိူင်းၵမ်ႇပူးၶျႃးတႄႉ မီး 300 တူဝ်ပၢႆၼႆ ၸုမ်းၾၢႆႇလဵပ်ႈႁဵၼ်းသၽႃႇဝ ၵူႈမိူင်းမိူင်း လၢတ်ႈၼင်ႇၼႆ။

ၸိူဝ်ႉၽၼ်းငိူၵ်ႈ သီႇမီႇယႃႇၼႆႉ ဢမ်ႇပေႃးတူဝ်ယႂ်ႇတူဝ်လဵၵ်ႉ။ ထူပ်းႁၼ် တီႈမိူင်းပရူႊၼၢႆႊ၊ မိူင်းမလေးသျႃး၊ မိူင်းလၢဝ်း၊ မိူင်းၵမ်ႇပူးၶျႃး၊ မိူင်းမၢၼ်ႈ၊ မိူင်းထႆး လႄႈ မိူင်းဝႅတ်ႉၼၢမ်း ၸိူဝ်းၼႆႉ ၼမ်လိူဝ်ပိူၼ်ႈ ၼႆယဝ်ႉ။

ငိူၵ်ႈၸိူဝ်ႉၽၼ်း သီႇမီႇယႃႇၼႆႉ ၸိုဝ်ႈလိုဝ်းလင်ဝႆႉဝႃႈ ပဵၼ်ၸိူဝ်ႉၽၼ်းဢၼ်ပဵၼ်ၽေးတေႃႇၵူၼ်း။ ယွၼ်ႉၵူၼ်းပိုၼ်ႉတီႈၶဝ် ၽဵဝ်ႈမူၺ်ႉၶႃႈႁႅမ်လႄႈ ၸင်ႇႁဵတ်းႁႂ်ႈၸိူဝ်ႉၽၼ်းႁၢႆၵႂႃႇ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။