တႄႇဢဝ် ဝၼ်းတီႈ 01-25/10/2024 ၼႆႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတိူဝ်ႉၺႃးၵူၼ်းမိူင်း ၼႂ်းမိူင်းႁူမ်ႈတုမ် ပတ်းပိုၼ်ႉ လူႉတၢႆ 72 ၵေႃႉ ယဝ်ႉၼႆ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း AAPP ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၼႂ်းၼၼ်ႉ ၵူၼ်းၸၢႆး 37 ၵေႃႉလႄႈ ၵူၼ်းယိင်း 35 ၵေႃႉ၊ လုၵ်ႈဢွၼ်ႇ ဢၼ်မီးၾၢႆႇတႂ်ႈဢႃယု 18 ပီ 14 ၵေႃႉ။ ယွၼ်ႉၶိူင်ႈမိၼ်သိုၵ်းမၢၼ်ႈပွႆႇမၢၵ်ႇသေ ၵူၼ်းမိူင်းလူႉတၢႆၼမ်သုတ်းၼႆႉ ပဵၼ်ၼႂ်းမိူင်းရၶႅင်ႇ 34 ၵေႃႉ၊ တိူင်းၸႄႈၵႅင်းသမ်ႉ လူႉတၢႆ 14 ၵေႃႉ ၼမ်သုတ်းထီႉသွင်။

တေႃႇထိုင်ယၢမ်းလဵဝ် ၼႂ်းၸႄႈဝဵင်းတၢၼ်ႇတွႆး ၊ ဝဵင်းၵႂႃႉလႄႈ ဝဵင်းဢမ်း ၼႂ်းမိူင်းရၶႅင်ႇၼႆႉ သိုၵ်းမၢၼ်ႈတင်း သိုၵ်းရၶႅင်ႇ တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ် ႁၢဝ်ႈႁႅင်း၊ ၾၢႆႇသိုၵ်းမၢၼ်ႈ ၸႂ်ႉပႃးၶိူင်ႈမိၼ်သိုၵ်း ပွႆႇမၢၵ်ႇသႂ်ႇ ႁဵတ်းႁႂ်ႈၵူၼ်းမိူင်းမၢတ်ႇၸဵပ်း လူႉတၢႆၼမ်။

သိုၵ်းမၢၼ်ႈၼႆႉ ၸႂ်ႉၶိူင်ႈမိၼ်သေ တိူဝ်းပွႆႇမၢၵ်ႇသႂ်ႇ ၼႂ်းၼႃႈတီႈၶဝ်သုမ်းဝႆႉ၊ ၵူၼ်းမိူင်းပိုၼ်ႉတီႈ ဢမ်ႇႁတ်း ယူႇသဝ်းသေ လႆႈငိူင်ႉပၢႆႈၽေးသိုၵ်းဝႆႉတင်းၼမ် ယၢပ်ႇၽိုတ်ႇၵိၼ်းၸႂ်ဝႆႉၼႆ ၽူႈၸွႆႈထႅမ် ၵူၼ်းပၢႆႈၽေးသိုၵ်း ၼႂ်းမိူင်းရၶႅင်ႇ ၵေႃႉၼိုင်ႈလၢတ်ႈ။

ၵဵဝ်ႇၵပ်းလွင်ႈ ပၢင်တိုၵ်းၼႆႉသေ ၾၢႆႇသိုၵ်းမၢၼ်ႈ ယိုတ်းမိူင်းတႄႉ ဢမ်ႇႁၼ်ပိုၼ်ၽၢဝ်ႇဢွၵ်ႇမႃးသင်။

ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇ ၼႂ်းၶၢဝ်းတၢင်း 4 လိူၼ်ၼႆႉ ၵူၼ်းမိူင်းႁူမ်ႈတုမ် ပတ်းပိုၼ်ႉ လူႉတၢႆ 450 ပၢႆ ၊ မၢတ်ႇၸဵပ်း 800 ပၢႆၼႆ ၸုမ်းၶူၼ်ႉၶႂႃႉ ၺၢၼ်ႇလိၼ်းတိတ်ႉၵေႃႈ ၵဵပ်းၶေႃႈမုလ်းပိုၼ်ၽၢဝ်ႇဝႆႉ မိူဝ်ႈဝၼ်းတီႈ 9 ပူၼ်ႉမႃး ၼႆႉ ၼင်ႇၼႆ။

ဢၢင်ႈဢိင် – RFA