ၵၢပ်ႈဝၢၼ်ႈပၢၼ်မိူင်းယၢမ်းလဵဝ် ၵူၼ်းမၢင်ၸိူဝ်း ၵူဝ်လႆႈႁဵတ်းၵၢၼ်ယၢပ်ႇ လတ်းႁႃၵၢၼ် ဢၼ်လႆႈငိုၼ်းငၢႆႈငၢႆႈသမ်ႉပေႃးဢမ်ႇသွၼ်ႇလွင်ႈၽိတ်းလွင်ႈထုၵ်ႇ။

မၢင်ၸိူဝ်းၵေႃႈ မီးၼႃႈၵၢၼ်တႃငၢၼ်းဝႆႉယဝ်ႉ ၾၢႆႇၼိုင်ႈသေတႃႉ ၶႂ်ႈလႆႈငိုၼ်းၶဝ်ႈထႅင်ႈလၢႆးၼိုင်ႈလႄႈ ဢွၼ်ၵၼ် ၶဝ်ႈ ႁူမ်ႈ ၸွမ်းၵၢၼ်ဢွၼ်ႊလၢႆႊ။ ၵၢၼ်ဢွၼ်ႊလၢႆႊ ၵမ်ႈၼမ် ပဵၼ်ဢၼ်လွၵ်ႇလႅၼ်ၵိၼ် ငိုၼ်းၼမ်မႃးလႄႈ လႆႈထတ်းသၢင်ဝူၼ်ႉၸွမ်းလီလီ ၸင်ႇၸၢင်ႈယုမ်ႇၸႂ်။

တေႃႈၼင်ႇ ၶွမ်ႊပၼီႊၸိုဝ်ႈယႂ်ႇ မိူင်းထႆးဢၼ်ၼိုင်ႈ ဢၼ်မီးၸၢႆးၸိူင်းၼၢင်းၸိူင်းၸိုဝ်ႈသဵင်လိုဝ်းလင် ၶဝ်ႈႁူမ်ႈဝႆႉ ၼၼ်ႉၵေႃႈ ၵဵဝ်ႇၵပ်းလွင်ႈလွၵ်ႇလႅၼ်ၵိၼ်ငိုၼ်းၼႆႉသေ ယင်းပဵၼ်ၶၢဝ်ႇယႂ်ႇငၢဝ်းလူင်ယူႇ ယၢမ်းလဵဝ်။

ႁဵတ်းႁႂ်ႈတုမ်ႉယွၼ်ႈထိုင်ပႃး ၼႂ်းတူင်ႇဝူင်းႁႅင်းၵၢၼ်ယၢၼ်မိူင်း ၼႂ်းမိူင်းထႆး ၸိူဝ်းႁဵတ်းၵၢၼ်ၵႃႉၶၢႆ တၢင်းဢွၼ်ႊလၢႆႊ – ဢွၼ်ၵၼ်ယုပ်းၽၢၼ်ႈ။ 

သိုဝ်ႇၶၢဝ်ႇယႂ်ႇ ၼႂ်းမိူင်းထႆးလႄႈ ၶျွင်ႉထီႊဝီႊထႆး လၢႆလၢႆဢၼ် ဢွၵ်ႇၶၢဝ်ႇလွင်ႈၶွမ်ႊပၼီႊယႂ်ႇ The Icon Group မီးပၼ်ႁႃ ၵဵဝ်ႇၵပ်းလွင်ႈၵႃႉၶၢႆလႄႈ လွင်ႈပႅတ်ႉလႅၼ်ငိုၼ်းတွင်း – ဝႃႈၼႆဝႆႉ။

ၶွမ်ႊပၼီႊဢၼ်ၼႆႉ မီးၸၢႆးၸိူင်းၸိုဝ်ႈသဵင်ယႂ်ႇ ၼႂ်းမိူင်းထႆးၶဝ်ႈႁူမ်ႈလူင်းတိုၼ်းဝႆႉ တင်းၼမ်။ ႁဵတ်းၵၢၼ်ၵႃႉၶၢႆ ယႃႈယႃတႃႇတၢင်းႁၢင်ႈလီတူဝ်ၶိင်း၊ တႃႇထႅမ်ႁႅင်းပၢႆးယူႇလီ၊ ယႃႁႅင်းဝိတ်ႉတမိၼ်ႊၵူႈ သႅၼ်းသႅၼ်းလႄႈ ၶရိမ်ႊတႃးၽိဝ်ၼင် ၸိူဝ်းၼႆႉ။ ႁဵတ်းႁႂ်ႈၵူၼ်းမိူင်း ၼပ်ႉႁူဝ်ႁဵင်ၵေႃႈ ယုမ်ႇယမ်သေ ၶဝ်ႈႁူမ်ႈလူင်းတိုၼ်းၸွမ်း။ ထိုင်မႃး ၶၢဝ်းတၢင်း 5-6 ပီ ၸိူဝ်းလူင်းတိုၼ်းလၢင်းဝႆႉၸိူဝ်းၼၼ်ႉ ၶႂ်ႈၶိုၼ်းထွၼ်ငိုၼ်းၸဝ်ႈၵဝ်ႇၶိုၼ်း သမ်ႉဢမ်ႇထွၼ်ႈလႆႈ – ၼႆသေ ၸင်ႇမီးလွင်ႈပဵၼ်တၢင်း တင်းၶွမ်ႊပၼီႊ။ ထိုင်တီႈ ပဵၼ်ပၼ်ႁႃယႂ်ႇလူင် ၸိုဝ်ႈလိုဝ်းတင်းၸိုင်ႈမိူင်း။

သိုဝ်ႇၶၢဝ်ႇယႂ်ႇ ၼႂ်းမိူင်းထႆး ဢွၼ်ၵၼ်ပိုၼ်ၽၢဝ်ႇဝႃႈ – မၢင်ၸိူဝ်းၵူႈငိုၼ်းပီႈၼွင်ႉၸမ်ၸႂ်ၽႂ်မၼ်းသေ လူင်းတိုၼ်းလၢင်းဝႆႉ ၼပ်ႉႁူဝ်သႅၼ်ဝၢတ်ႇ ငိုၼ်းထႆး။ ၵမ်းလိုၼ်း ဢမ်ႇဢဝ်လႆႈၶိုၼ်းလႄႈ ထိုင်တီႈၶႃႈ တူဝ်တၢႆပႅတ်ႈၵေႃႈမီး ဝႃႈၼႆ။

ဢိင်ၼိူဝ် ပိူင်ပဵၼ်ၼႆႉသေ ၵူၼ်းၸိူဝ်းႁဵတ်းၵၢၼ်ဢွၼ်ႊလၢႆႊ ဢၼ်ငၢႆးၶွမ်ႊပၼီႊသႅၼ်းၼႆႉၵေႃႈ မီးလွင်ႈတိုၼ်ႇသၢၼ်ႈၵၼ်မႃး။ ပေႃးမႃးတူၺ်း ၵူၼ်းမိူင်းတႆး ၸိူဝ်းႁွတ်ႈမိူင်းထႆး ဢွၼ်ၵၼ် ႁဵတ်းၵၢၼ် ႁႃငိုၼ်းတၢင်းဢွၼ်ႊလၢႆႊမႃးၼမ်။ ၵမ်ႈၽွင်ႈ တိုၵ်ႉထုၵ်ႇႁူၺ်းႁွင်ႉ ၶဝ်ႈႁူမ်ႈႁဵတ်းၵၢၼ်ၸွမ်း ယူႇၵေႃႈမီး။

ၶွမ်ႊပၼီႊ ၶၢႆၶူဝ်းတၢင်းဢွၼ်ႊလၢႆႊ မၢင်ဢၼ် ၵဵပ်းၵႃႈၶဝ်ႈႁူမ်ႈႁဵတ်းၵၢၼ် – ၼႆထႅင်ႈလူးၵွၼ်ႇ။ ၵမ်ႈၽွင်ႈ ၸိူဝ်းထုၵ်ႇ ႁူၺ်းႁွင်ႉၶဝ်ႈႁူမ်ႈၼႆႉ ပဵၼ်ႁႅင်းၵၢၼ်ဢၼ်ႁႃၸဝ်ႉၵိၼ်ၶမ်ႈ။ ၵမ်ႈၽွင်ႈ လႆႈႁပ်ႉပုၼ်ႈၽွၼ်းတူၺ်းလူပႃး တၢင်းႁိူၼ်းတၢင်းယေး။ ၵမ်ႈၽွင်ႈပဵၼ် ၵူၼ်းၵိၼ် ၸၢင်ႈလုမ်းလႃးႁိူၼ်းယေး (မႄႈဝၢၼ်ႈပေႃႈဝၢၼ်ႈ) ၸိူဝ်းၼႆႉ။

ၵူၼ်းၼုမ်ႇ ဢၼ်မီးတူဝ်ထူပ်း ၼႂ်းလွင်ႈႁဵတ်းၵၢၼ် တၢင်းဢွၼ်ႊလၢႆႊ ၵေႃႉၼိုင်ႈ လၢတ်ႈဝႃႈ -“ပေႃးဝႃႈ ၵႂႃႇထွမ်ႇၶဝ်သပ်းလႅင်း မိူဝ်ႈၶဝ်ႁူၺ်းသူၼ်းၼၼ်ႉၸိုင် ၶဝ်တေလိူၵ်ႈလၢတ်ႈဢၼ်ၶဝ်ဢွင်ႇမၢၼ်လႄႈ ဢၼ်လီမၼ်းလၢႆလၢႆ။ တီႈတႄႉမၼ်း တၢင်းႁူႉၸိူဝ်းၼၼ်ႉ ဢၼ်တေၸၢင်ႈဢဝ်မႃး ၸႂ်ႉၼႂ်းၸၢတ်ႈ ပၢၼ်တႄႉတႄႉ မၼ်းမီးပိူဝ်ႊသႅၼ်ႊမၼ်း ဢေႇၼႃႇ။ ၵမ်ႈၼမ် ႁၼ်ထိုင်ဝႃႈ ပေႃးၶဝ်ႈၵၢၼ်ယဝ်ႉ တေ လႆႈငိုၼ်းၼႆၼၼ်ႉသေ ၶဝ်ႈႁူမ်ႈၸွမ်းၵူၺ်း။ မၢင်တီႈ ႁၼ်ဝႃႈ သိုဝ်ႉၶူဝ်းၶွင်တီႈၶွမ်ႊပၼီႊ ၼၼ်ႉယဝ်ႉ တေလႆႈငိုၼ်းၶိုၼ်း။ ၵူၺ်းၵႃႈ ငိုၼ်းၼၼ်ႉ သမ်ႉပဵၼ်တူဝ်ၼပ်ႉမၼ်းလၢႆလၢႆၵူၺ်းသေ ဢမ်ႇလႆႈငိုၼ်း မႃးတႄႉၵေႃႈမီး”- ဝႃႈၼႆ။

မိူဝ်ႈၵၢၼ်ႁႃငိုၼ်းတၢင်းဢွၼ်ႊလၢႆႊ တႄႇႁိူင်းၼႂ်းမိူင်းထႆးၼၼ်ႉ ၵမ်ႈၼမ် ဢၼ်ၺႃးႁူၺ်းႁွင်ႉ ၵႂႃႇႁဵတ်းၵၢၼ်ၸွမ်းၼႆႉ ပဵၼ်ၵူၼ်းပိုၼ်ႉမိူင်းၵူၺ်း။ ယၢမ်းလဵဝ်တႄႉ လႆႈႁၼ်ဝႃႈ ၵူၼ်းပိုၼ်ႉမိူင်း ၵမ်ႈၼမ် လၢတ်ႈဝႃႈဢမ်ႇလႆႈၶိုၼ်းၼမ်ႉတွၼ်းသင်ၼႆသေ ဢမ်ႇၶဝ်ႈႁူမ်ႈႁဵတ်းၸွမ်းယဝ်ႉ။ ၼႂ်းၵၢၼ်ႁႃငိုၼ်း တၢင်းဢွၼ်ႊလၢႆႊ ဝၼ်းမိူဝ်ႈၼႆႉ ၵမ်ႈၼမ် ပဵၼ် ၵူၼ်းမိူင်းတႆးလႄႈ ၵူၼ်းမိူင်းမၢၼ်ႈ။

မိူၼ်ၼင်ႇ ၼႂ်းဝဵင်းလူင်ၵုင်းထဵပ်ႈလႄႈ ဝဵင်းယႂ်ႇဝဵင်းလူင်ၼႂ်းမိူင်းထႆး ယၢမ်းလဵဝ် ၸုမ်းႁဵတ်းၵၢၼ်တၢင်းဢွၼ်ႊလၢႆႊ ၵႂႃႇ ၸွမ်းပႂ်ႉႁူၺ်းႁွင်ႉထိုင် လုမ်းၵူတ်ႇထတ်းၵူၼ်းၶဝ်ႈမိူင်း (တေႃႊမေႃႊ) ဢွင်ႈတီႈဢၼ် ႁႅင်းၵၢၼ်မႃးႁၢႆးငၢၼ်းတူဝ် ၸိူဝ်း ၼႆႉၵေႃႈမီး။

ၵူၼ်းၸမ်ၸႂ် ပေႃႈၵႃႉ ဢၼ်လႆႈသုမ်းၸွမ်း ၵၢၼ်ၵႃႉၶၢႆဢွၼ်ႊလၢႆႊ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ႈ ၵႂႃႇႁူမ်ႈ ႁဵတ်းၵၢၼ်ၵႃႉၶၢႆတၢင်းဢွၼ်ႊလၢႆႊသေ ဢွၵ်ႇမႃးၵေႃႈ မီးတင်းၼမ်။ မိူၼ်ၼင်ႇ ဢူၺ်းၵေႃႉၶႃႈၵေႃႈ ၺႃးၸိူင်ႉ ၼၼ်ယဝ်ႉ ဢမ်ႇလႆႈငိုၼ်းသင်ပွၵ်ႈမႃးၶိုၼ်း။ မၼ်းၵႃႉၶၢႆ ဢႃးႁၢရ်သိူမ်( ယႃႈယႃၽိူမ်ႉတၢင်းႁၢင်ႈလီ) ၸိူဝ်းၼႆႉ။ ၵူၺ်း ၵႃႈ ၵမ်းလိုၼ်း ရူတ်ႉၶိူင်ႈၵေႃႈလႆႈၶၢႆ ၊ ၶွမ်ႊၵေႃႈ လႆႈၶၢႆ။ လူင်းတိုၼ်း တႃႇတေပဵၼ်ၽူႈၼမ်းထိမ်း တႃႇတေပဵၼ်ႁူဝ် ၼႃႈ ပိူၼ်ႈၼၼ်ႉ လႆႈႁဵတ်းၸိူင်ႉၼၼ်။ ၶွမ်ႊမၼီႊၸိူဝ်းၼႆႉ ၵမ်းၵမ်းတေၸတ်းပၢင်ပွႆး ၼႄဢၼ်ၼႆႉဢၼ်ၼၼ်ႉသေ ႁဵတ်းႁႂ်ႈပိူၼ်ႈၶွႆႈ ႁဵတ်း ဢဝ်ႁၢင်ႈၾၢင်မၼ်းၵူၺ်း”- ဝႃႈၼႆ။

သင်တူၵ်ႇလၢတ်ႈထိုင် ၵၢၼ်ၵႃႉၶၢႆတၢင်း ဢွၼ်ႊလၢႆႊၸိုင် ဢမ်ႇလီတၢင်းပိုၵ်းတႄႉ ဢမ်ႇၸႂ်ႈၼင်ႇၵဝ်ႇ။ ဢိင်ၼိူဝ်ၵၢပ်ႈပၢၼ်မၼ်းသေ ယၢမ်းလဵဝ်ၵေႃႈ မီးတၢင်းၵႃႉၶၢႆယူႇလၢႆလၢႆသႅၼ်းလၢႆလၢႆလွင်ႈ။ ပေႃး တၢင်ႇမၢႆၾၢင်သေ ႁဵတ်းတၢင်းၵႃႉ ၶၢႆပဵၼ်တၢင်းၵၢၼ် ၵႂႃႇၸွမ်းပၵ်းပိူင်တႄႉ ဢမ်ႇမီးပၼ်ႁႃ။ ၵူၺ်းၵႃႈ ၵမ်ႈၼမ်တႄႉ ဢမ်ႇတၢင်ႇမၢႆၾၢင်။ ႁူၺ်းႁွင်ႉၵူၼ်းဝႃႈ – ဢမ်ႇလူဝ်ႇၶၢႆၶူဝ်းၶွင်၊ ႁႃၵူၼ်းမႃးၶဝ်ႈႁူမ်ႈ လူင်းတိုၼ်းၸွမ်း ၼမ်ၼမ်ၵူၺ်းၵေႃႈ မီးငိုၼ်းၶဝ်ႈယဝ်ႉ – ဝႃႈၼႆၵေႃႈမီး။   

ၵၢၼ်ႁူၺ်းႁွင်ႉၸိူင်ႉၼႆ ပေႃးပဵၼ်ၶွမ်ႊပၼီႊ ဢၼ်ဢမ်ႇတၢင်ႇမၢႆၾၢင်၊ ဢၼ်တိုၵ်ႉႁဵတ်းၵၢၼ်တူင်ႉ ၼိုင်မႃးၶၢဝ်းတၢင်း 2-3 ပီၵူၺ်း ၸိူဝ်းၼႆႉတႄႉ – လႆႈသႂ်ႇငိုၼ်းတိုၼ်းလၢင်း – ႁဵတ်းႁႂ်ႈငိုၼ်းႁွတ်ႈထိုင် ၼႂ်းၵၢၼ်ပၼ်ႇမုၼ်ၵႃႉၶၢႆသေ ၼမ်ႉတွၼ်းသမ်ႉ လႆၶဝ်ႈၸူးၽူႈၼမ်းမူႇၸုမ်း။ ၵူၼ်းမႃးၶဝ်ႈမႂ်ႇတၢင်း လင်တႄႉ တႃႇတေလႆႈၶိုၼ်းၼမ်ႉတွၼ်း ဢမ်ႇၸႂ်ႈငၢႆႈငၢႆႈ။ ၽူႈမီးတူဝ်ထူပ်း ၼႂ်းၵၢၼ်ၵႃႉၶၢႆတၢင်းဢွၼ်ႊလၢႆႊ ၵေႃႉၼိုင်ႈ လၢတ်ႈၼႄၼင်ႇၼႆ –

“ပေႃးတေႁဵတ်းၵၢၼ် ၸွမ်းၶွမ်ႊပၼီႊၶၢႆၶူဝ်းၶွင် ဢွၼ်ႊလၢႆႊလႄႈသင် လူင်းတိုၼ်းလၢင်းလႄႈသင် ၸိူဝ်းၼႆႉ ႁႂ်ႈၾၢင်ႉၼၵ်းၼႃၶႃႈဢေႃႈ။ ႁဝ်းၶႃႈ တေလႆႈထတ်းသၢင်တူၺ်း ၸဝ်ႈၶွင်မၼ်း၊ CEO မၼ်း လႄႈ တူဝ်တႅၼ်းမၼ်း ၸိူဝ်း ၼႆႉ။ ယဝ်ႉၵေႃႈ ၵၢၼ်ၸၢႆႇငိုၼ်း ၸိူဝ်းၼႆႉၵေႃႈ ၸွင်ႇမၼ်းမႅၼ်ႈၸွမ်းပၵ်း ပိူင်ၸိုင်ႈမိူင်း ၸိူဝ်းၼႆႉ ႁဝ်းလူဝ်ႇလႆႈႁူႉ ၵွၼ်ႇ။ ယဝ်ႉၵေႃႈ တူၺ်းဝႃႈ ၸွင်ႇၸႂ်ႈၵၢၼ်ဢၼ်မီးမႃး ပီယၢဝ်း ၶၢဝ်းႁိုင်ႁႃႉ။ မီး 5 ပီႁႃႉ 20 ပီႁႃႉ ၼႆၸိူဝ်းၼႆႉ။ ယဝ်ႉ ၵေႃႈ ပဵၼ်ၵၢၼ်ဢွၼ်ႊလၢႆႊႁႃႉ၊ ပဵၼ်ၵၢၼ်တ လၢတ်ႇၶိူဝ်ႊၶၢႆႇ ၼႆၸိူဝ်းၼႆႉ။ ၼႂ်းၼၼ်ႉ ပေႃးဝႃႈၶဝ်ႈႁူမ်ႈယဝ်ႉ သမ်ႉလႆႈလူင်းတိုၼ်းၼမ်ၼမ်ၸိူင်ႉ ၼႆတႄႉ ဢမ်ႇထုၵ်ႇလီယုမ်ႇၶႃႈ။ ပေႃးဝႃႈ ၶဝ်ႈသမၵ်းလႄႈ လႆႈပဵၼ်ငိုၼ်းဢိတ်းဢွတ်း တႃႇသိုဝ်ႉၸႂ်ႉ သိုဝ်ႉၵိၼ်ၵူၺ်းတႄႉ ဝၢင်းၸႂ်လႆႈယူႇၶႃႈ”- ဝႃႈၼႆ။

ၵၢပ်ႈယၢမ်းလဵဝ် ၵၢၼ်ဢၼ်တူဝ်ႈထိုင် ၼႂ်းတူင်ႇတႆးတႄႉ တေပဵၼ်ၵၢၼ် MLM (Multilevel Marketing) ဢၼ်ဝႃႈ ၼၼ်ႉ တေပဵၼ်ၵၢၼ် ဢၼ်လႆႈႁႃၵူၼ်းသိုပ်ႇၵူၼ်း။ ပေႃးၵေႃႉၼိုင်ႈ ၶဝ်ႈၵၢၼ်ယဝ်ႉၵေႃႈ တၵ်းလႆႈႁႃၵူၼ်းၶဝ်ႈၸွမ်း ထႅင်ႈၵေႃႉၼိုင်ႈ ၸင်ႇမီးလၢႆးလႆႈငိုၼ်း။ ႁူၺ်းၵူၼ်းၶဝ်ႈၼမ်ၵႃႈႁိုဝ်ၵေႃႈ တေလႆႈငိုၼ်းၶဝ်ႈ ၼမ်ၵႃႈၼၼ်ႉ – ၵမ်ႈၼမ်ပဵၼ်ၸိူင်ႉၼႆ –  ဢၼ်လီသေပိူၼ်ႈသုတ်းတႄႉ သင်ဝႃႈ တေႁဵတ်းၵၢၼ်ၵႃႉၶၢႆတၢင်းဢွၼ်ႊလၢႆႊ – ထုၵ်ႇလီလဵပ်ႈႁဵၼ်း မၢႆမီႈၸိုင်ႈမိူင်းလီလီသေ ၸင်ႇႁဵတ်းၼႆႉ ၸင်ႇတေလွတ်ႈၽေး – ၽူႈမီးတူဝ်ထူပ်း ၼႂ်းၵၢၼ်ၵႃႉၶၢႆဢႃးႁၢရ်သိူမ် ၵေႃႉ ၼိုင်ႈ လၢတ်ႈၼင်ႇၼႆ။