ဝၼ်းတီႈ 06/10/2024 ၼႆႉ သိုၵ်းဢိတ်ႉသ်ရေႊ ပိုတ်းယိုဝ်းသႂ်ႇတီႈထုင်ႉၵႃႊသႃႊ(Gaza) တိူဝ်ႉၺႃးၵျွင်းပလီႇ မူႇသလိမ်ႇ လင်ၼိုင်ႈ ၵူၼ်းမိူင်းလူႉတၢႆ ဢမ်ႇယွမ်း 19 ၵေႃႉ။

ၵျွင်းပလီႇၼႆႉ မီးဝႆႉႁိမ်းႁူင်းယႃ ဝဵင်းတီႊယႃႊ ဢႃႊလ်ပႃႊလႃႊ Deir al-Balah ပဵၼ်ဢွင်ႈတီႈ ဢၼ်မီးၵူၼ်းပၢႆးၽေးသိုၵ်း သွၼ်ႈယူႇဝႆႉ ၼႆယဝ်ႉ။

ၶၢဝ်ႇ AP ႁၢႆးငၢၼ်းဝႆႉဝႃႈ ၵူၼ်းမိူင်းၸိူဝ်းလူႉတၢႆၵႂႃႇၼၼ်ႉ ပဵၼ်ၽူႈၸၢႆးတင်းမူတ်း – ဝႃႈၼႆ။

ၾၢႆႇသိုၵ်းဢိတ်ႉသ်ရေးတႄႉ လၢတ်ႈဝႃႈ ပိုတ်းယိုဝ်း ၸုမ်းၵေႃႇၵၢၼ်ႁၢႆႉၶဝ်ၵူၺ်း ၼႆသေတႃႉ ဢမ်ႇႁၼ်ၼႄဝႆႉပႃး သၢၵ်ႈသေႇလၵ်းထၢၼ်သင်။ သိုၵ်းဢိတ်ႉသ်ရေႊၼႆႉ လိူဝ်သေ တိုၵ်းတေႃးၼႂ်းထုင်ႉၵႃႊသႃႊ ပွတ်းႁွင်ႇယဝ်ႉ မိူၼ်ၼင်ႇ ၼႂ်းမိူင်းလႅပ်ႊပၼုၼ်ႊ(Lebanon) ပွတ်းၸၢၼ်းၵေႃႈ  ယူႇတၢင်းၵၢင်ႁၢဝ်သေ ပိုတ်းယိုဝ်းတိုၵ်းတေႃး ၸုမ်းႁိတ်ႉသ်ပူဝ်ႊလႃႊ(Hezbollah) ဢၼ်ၵမ်ႉထႅမ် ဢီႊရၢၼ်ႊ(Iran) ၼၼ်ႉ ႁၢဝ်ႈႁႅင်း မိူၼ်ၵၼ်။

တႃႇတုမ်ႉတွပ်ႇၶိုၼ်း လွင်ႈဢၼ်ၸုမ်းႁႃးမတ်ႉသ်(Hamas) ၶဝ်ႈတိုၵ်း မိူဝ်ႈဝၼ်းတီႈ 7 လိူၼ် ဢွၵ်ႊထူဝ်ႊပိူဝ်ႊ ပီ 2023 ၼၼ်ႉသေ ဢိတ်ႉသ်ရေႊ ႁႅၼ်းသိုၵ်းတိုၵ်းတေႃး တီႈထုင်ႉၵႃႊသႃႊၼႆႉ မႃးၸမ်ၶၢဝ်းတၢင်း 1 ပီယဝ်ႉ။

မိူၼ်ၼင်ႇ ၸွမ်းလႅၼ်လိၼ်ၸိူဝ်းၼႆႉၵေႃႈ လႆႈပိုတ်းယိုဝ်းၵၼ်တင်း ၸုမ်းႁိတ်ႉသ်ပူဝ်ႊလႃႊ ဢၼ်ပၵ်းသဝ်းၼႂ်းမိူင်းလႅပ်ႊပၼုၼ်ႊလႄႈ ပၢင်တိုၵ်းၸင်ႇၵႂၢင်ႈၶႂၢင်မႃးတေႃႇထိုင်ယၢမ်းလဵဝ်။

ၼႂ်းလၢႆဝူင်ႈပူၼ်ႉမႃးၼႆႉ မိူင်းဢီႊရၢၼ်ႊ ဢၼ်ၵမ်ႉထႅမ်ၸုမ်းႁိတ်ႉသ်ပူဝ်ႊလႃႊၼၼ်ႉ ဢဝ်မၢၵ်ႇမိတ်ႉသႆး (ပဲ့ထိန်းတပ် မစ်ဇိုင်းဒုံး) သေ ပိုတ်းယိုဝ်းဢိတ်ႉသ်ရေႊ။ ၾၢႆႇဢိတ်ႉသ်ရေႊၵေႃႈ လၢတ်ႈဝႆႉဝႃႈ တေတုမ်ႉတွပ်ႇၵႂႃႇၶိုၼ်း – ၼႆယဝ်ႉ။

ၸွမ်းၼင်ႇ ပၼ်ႁႃပၢင်တိုၵ်းယႂ်ႇၶိုၼ်ႈမႃးသေ မိူင်းဢမေႊရိၵၼ်ႊ(American) ဢၼ်ၵမ်ႉၸွႆႈပၼ်ႁႅင်း ၾၢႆႇၵၢၼ်သိုၵ်း၊ ၵၢၼ်ၽွင်းတၢင် တီႈမိူင်းဢိတ်ႉသ်ရေႊၵေႃႈ တေၸၢင်ႈၶဝ်ႈပႃးမႃးၸွမ်း။ လိူဝ်ၼၼ်ႉ မိူၼ်ၼင်ႇ မိူင်းဢႃႊရပ်ႊ (Arab Country) ဢၼ်ပဵၼ်ဢူၺ်းလီၵၼ်တင်း ဢမေႊရိၵၼ်ႊၵေႃႈ တေၸၢင်ႈၶဝ်ႈပႃးမႃးထႅင်ႈလႄႈ တေၸၢင်ႈႁဵတ်းႁႂ်ႈပၼ် ႁႃၼႂ်းပိုၼ်ႉတီႈၵႂၢင်ႈၶႂၢင်မႃး လိူဝ်သေၵဝ်ႇ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။