တွၵ်ႊတိူဝ်ႊ ၸေႃႇမိၼ်ႉမွင်ႇ ၸွမ်ၽွင်းလူင်ၵေႃႉၵဝ်ႇ လူင်ပွင်ၸိုင်ႈၼူၵ်ႉယုင်း NLD တိူင်းမၼ်းတလေး ၺႃးသိုၵ်းမၢၼ်ႈ တီႉၺွပ်း ဝၢႆးယိုတ်းဢႃႇၼႃႇၸိုင်ႈမိူင်းၼၼ်ႉ လူႉသဵင်ႈၵႂႃႇၼႂ်းဝၼ်းတီႈ 07/10/2024 ယၢမ်းၵၢင်ၼႂ် 3 မူင်းၼႆႉ။

ၵူၼ်းၸမ်ၸႂ် ၼႂ်းႁိူၼ်းမၼ်းၸၢႆး ၵေႃႉၼိုင်ႈ လၢတ်ႈဝႃႈ – “မၼ်းၸၢႆးၼႆႉ ၺႃးတီႉၺွပ်းၶင်ၶွၵ်ႈဝႆႉသေ ၺႃးတၢမ်ႇၶွၵ်ႈ 29 ပီ။ မၼ်းၸၢႆး မီးဝႆႉတၢင်းပဵၼ် (မလဵင်း) ၶႅၼ်ႊသိူဝ်ႊ။ ယွၼ်ႉငဝ်းလၢႆးပၢႆးယူႇလီ ႁၢႆႉႁႅင်းမႃးလႄႈ သိုၵ်းမၢၼ်ႈ သူင်ႇယူတ်းယႃတူဝ် တီႈႁူင်းယႃ။ ဝၼ်းတီႈ 6 ၼႆႉ သိုၵ်းမၢၼ်ႈ ၸင်ႇမႃးဢၢၼ်ႇလိၵ်ႈပိုၼ်ၽၢဝ်ႇ ပွႆႇဝၢင်းလွတ်ႈတူတ်ႈတၢမ်ႇ ၶွၵ်ႈ တီႈႁူင်းယႃၵူၺ်း”- ဝႃႈၼႆ။  

တွၵ်ႊတိူဝ်ႊ ၸေႃႇမိၼ်ႉမွင်ႇၼႆႉ မီးတၢင်းပဵၼ် ၶႅၼ်ႊသိူဝ်ႊဝႆႉသေ မိူဝ်ႈၽွင်းယူႇဝႆႉၼႂ်းၶွၵ်ႈၼၼ်ႉ တိတ်းၸပ်းတၢင်းပဵၼ်ၶူဝ်ႊဝိတ်ႊထႅင်ႈလႄႈ ႁဵတ်းႁႂ်ႈဢမ်ႇယူႇလီမႃးႁႅင်း ၼႆယဝ်ႉ။

မိူဝ်ႈၽွင်းသိုၵ်းမၢၼ်ႈ ယိုတ်းဢႃႇၼႃႇ ၼႂ်းပီ 2021 ၼၼ်ႉ တွၵ်ႊတိူဝ်ႊ ၸေႃႇမိၼ်ႉမွင်ႇ ၸွမ်ၽွင်းလူင်တိူင်းမၼ်းတလေး ၺႃးသိုၵ်းမၢၼ်ႈ မၢပ်ႇၼႄးဝႃႈ ႁဵတ်းၽိတ်းပူၼ်ႉပႅၼ် ပၵ်းပိူင်ၾၢႆႇၸတ်း ၵၢၼ်ၵဵဝ်ႇလူၺ်ႈၽေးသၽႃႇဝ၊ သေႃႇသူၼ်းႁဵတ်းႁႂ်ႈ လွင်ႈငမ်းယဵၼ် ၵူၼ်းမိူင်းလူႉလႅဝ်၊ ဢမ်ႇမီးလွင်ႈပူင်ႇသႂ်ႇ ၼႂ်းပၢင်လိူၵ်ႈတင်ႈ၊ ၵိၼ်သူႈၵိၼ်လၢပ်ႈ ၼႆသေ ၺႃးသိုၵ်းမၢၼ်ႈ ဢဝ်လိူင်ႈပၼ် တၢမ်ႇၶွၵ်ႈထိုင် 29 ပီ – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။