ဝၼ်းတီႈ 3 လိူၼ်ၼႆႉ သိုၵ်းမၢၼ်ႈ ဢွၵ်ႇလိၵ်ႈႁၢမ်ႈထႅင်ႈ လွင်ႈဢဝ်ဝႂ်ၶၢမ်ႈမိူင်းဢႅဝ်ႇလႄႇ PV ဢွၵ်ႇၼွၵ်ႈမိူင်းသေ ၵႂႃႇ ႁဵတ်းၵၢၼ် ဝႃႈၼႆ။

သင်တေၵႂႃႇႁဵတ်းၵၢၼ် တီႈၼွၵ်ႈမိူင်းၸိုင် ႁႂ်ႈဢဝ်ဝႂ်ၶၢမ်ႈမိူင်း တႃႇႁဵတ်းၵၢၼ် Passport for Job – PJ ဝႃႈၼႆဝႆႉ။ မၢင် ၸိူဝ်း ဢဝ်ဝႂ်ၶၢမ်ႈမိူင်းဢႅဝ်ႇလႄႇ PV  သေ ဢၢၼ်းတေၶီႇၶိူင်ႈမိၼ် ဢွၵ်ႇၼွၵ်ႈမိူင်း၊ ၽွင်းမိူဝ်ႈ ၸဝ်ႈၼႃႈတီႈ ၵူတ်ႇထတ်း ဢမ်ႇမႅၼ်ႈၸွမ်းပိူင် ဢၼ်မၵ်းမၢႆဝႆႉၼၼ်ႉလႄႈ ဢမ်ႇပၼ်ဢွၵ်ႇမိူင်းၵေႃႈမီး ဝႃႈၼႆ။

ဢိင်ၼိူဝ်လွင်ႈၼႆႉ သိုၵ်းမၢၼ်ႈ ႁၢမ်ႈၵူၼ်းၸိူဝ်းဝတ်းဝႂ် ဢမ်ႇမႅၼ်ႈၸွမ်း ဢၼ်မၵ်းမၢႆဝႆႉ ဝႃႈၼႆသေတႃႉ သင်ပဵၼ် ၵူၼ်းဢၼ်ပႃး ၼႂ်းသႅၼ်းပိူင်ႁဵတ်းသိုၵ်းၼႆၸိုင် ယိပ်းဝႆႉဝႂ်ၶၢမ်ႈမိူင်း PV ၵေႃႈလီ PJ ၵေႃႈယဝ်ႉ  ဢမ်ႇပၼ်ဢွၵ်ႇၼွၵ်ႈမိူင်းၼႆ – ၽူႈၶဝ်ႈၸုမ်း ၾၢႆႇသူင်ႇႁႅင်းၵၢၼ်ၼွၵ်ႈမိူင်း ၵေႃႉၼိုင်ႈ တွပ်ႇဝႆႉတီႈသိုဝ်ႇၶၢဝ်ႇ BBC ၼင်ႇၼႆ။

ယူႇတီႈ ၸုမ်းၾၢႆႇသူင်ႇႁႅင်းၵၢၼ်ၼွၵ်ႈမိူင်းၼၼ်ႉ လႆႈသူင်ႇၵႂႃႇၵူၼ်းမိူင်းမၢၼ်ႈ ၸိူဝ်းမီးဢႃယုၼႂ်းၵႄႈ 18 – 21 လႄႈ ဢႃယု 32 ၶိုၼ်ႈၼိူဝ်ၶဝ်ၵူၺ်း ဝႃႈၼႆဝႆႉ။

ၸွမ်းၼင်ႇပိူင်ႁဵတ်းသိုၵ်း ဢၼ်သိုၵ်းမၢၼ်ႈ မၵ်းမၢႆဝႆႉၸိုင် ၵူၼ်းၸၢႆးဢႃယု ၼႂ်းၵႄႈ 18 – 35 ၊ ၵူၼ်းယိင်းဢႃယု ၼႂ်း ၵႄႈ 18 – 27 ၵူႈၵေႃႉ တေလႆႈႁဵတ်းသိုၵ်း ၼႆယဝ်ႉ။  

လိူဝ်ၼၼ်ႉ ႁွင်ႈၵၢၼ်ၾၢႆႇႁႅင်းၵၢၼ် တႂ်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇတိုၵ်းသူၼ်းဝႆႉပႃးဝႃႈ – ၵူၼ်းမိူင်းၸိူဝ်းတေ ဢွၵ်ႇၼွၵ်ႈမိူင်း ၵႂႃႇႁဵတ်းၵၢၼ်ၼၼ်ႉ တေလႆႈမီးပႃး ဝႂ်ႁပ်ႉႁွင်းႁႅင်းၵၢၼ် OWIC လႄႈ ဝႂ်ၶၢမ်ႈမိူင်းႁဵတ်းၵၢၼ် PJ ၸိူဝ်းၼႆႉ။