တႄႇဢဝ် ဝၼ်းတီႈ 08/09/2024 ၼႆႉၵႂႃႇ ၼႂ်းမိူင်းတႆးပွတ်းဢွၵ်ႇလႄႈ ပွတ်းႁွင်ႇ ၸိူဝ်းၼႆႉ ၾူၼ်တေတူၵ်းၼမ်ႁႅင်း ၸၢင်ႈပဵၼ်ၼမ်ႉလူၵ်ႈၼမ်ႉၼွင်း လိၼ်ၵူၼ်ႇ လွႆၵူၼ်ႇ ၸိူဝ်းၼႆႉ ယွၼ်ႉလူမ်းလႅင်ႉ တၢႆႊၾူၼ်ႊ ယႃႇၵီႇ (YAGI) ၽတ်ႉ ၶဝ်ႈမႃးလႄႈ ႁႂ်ႈလႆႈၾၢင်ႉ (သတိ) ယူႇသဝ်းၵၼ် ဝႃႈၼႆ။

မိူၼ်ၼင်ႇ ၼႂ်းတိူင်းၸႄႈၵႅင်း ပွတ်းၼိူဝ်ၵေႃႈ ၾူၼ်တေတူၵ်းၼမ်ႁႅင်းသေ ၼမ်ႉၶႅဝ်းတွင်း ၸၢင်ႈၼွင်းၶိုၼ်ႈ၊ တီႈ ၼေႇပျီႇတေႃႇ၊ မဵတ်ႉထီႇလႃႇလႄႈ ၼႂ်းတိူင်းဝဵင်းလိူဝ်ႇ (မၼ်းတလေး) ပွတ်းတႂ်ႈ ၸိူဝ်းၼႆႉၵေႃႈ ၾူၼ်တေတူၵ်းၼမ်ႁႅင်း – ၼႆယဝ်ႉ။

တႄႇဢဝ် ဝၼ်းတီႈ 11-17/09/2024 ၼႆႉ ၼႂ်းပၢင်ႇလၢႆႇပင်းၵလႃးလႄႈ ပၢင်လၢႆႇၶႄႇ ပွတ်းၸၢၼ်း ၸိူဝ်းၼႆႉ တေမီးမႃးလူမ်းလႅင်ႉထႅင်ႈ။ ၼႂ်းမိူင်းမၢၼ်ႈ ပွတ်းတႂ်ႈသမ်ႉ လႆႈမႆႈၸႂ် မႄႈၼမ်ႉ ဢၼ်မီးတီႈမိူင်းမၢၼ်ႈ ပွတ်းၼိူဝ် လုပ်ႇထူမ်ႈၼွင်းလူင်းမႃးၼႆ – ဢူးဝိၼ်းၼၢႆႇ ၽူႈလူင်ႉလႅၼ်ႇၾၢႆႇၾိင်ႈၾႃႉရႃႇသီႇ ၾူၼ်လူမ်း လၢတ်ႈပၼ်ၾၢင်ႉဝႆႉၼင်ႇၼႆ။

ယွၼ်ႉလူမ်းလႅင်ႉ တၢႆႊၾူၼ်ႊ ယႃႊၵီႊၼႆႉ ၽတ်ႉထွင်းၶဝ်ႈၼႂ်းမိူင်းဝႅတ့်ၼၢမ်း ပွတ်းၸၢၼ်းသေ မီးၵူၼ်းလူႉတၢႆ 24 ၵေႃႉ၊ မၢတ်ႇၸဵပ်း 200 ပၢႆ၊ ႁူင်းႁဵၼ်း၊ သၢႆၵၢၼ်မိၼ်ၸိူဝ်းၼႆႉ လႆႈၵိုတ်းယင်ႉဝႆႉ၊ တီႈလိၼ်ၽုၵ်ႇသွမ်ႈ သူၼ်ႁႆႈၼႃးၵေႃႈ လူႉသုမ်းတင်းၼမ် – ၼႆယဝ်ႉ။

မိူၼ်ၼႆ တီႈမိူင်းၶႄႇ ပွတ်းၸၢၼ်းၵေႃႈ ယွၼ်ႉလူမ်းလႅင်ႉ ယႃႇၵီႇ ၽတ်ႉပဝ်ႇၶဝ်ႈလႄႈ မီးၵူၼ်းလူႉတၢႆ 3 ၵေႃႉ၊ မၢတ်ႇ ၸဵပ်း 95 ၵေႃႉ၊ ၵူၼ်းမိူင်းၼပ်ႉႁူဝ်သႅၼ် လႆႈၶၢႆႉပၢႆႈ ၵႂႃႇသွၼ်ႈဝႆႉ ဢွင်ႈတီႈလွတ်ႈၽေးၵၼ် ဝႃႈၼႆ။

လူမ်းလႅင်ႉ တၢႆႊၾူၼ်ႊ ယႃႇၵီႇၼႆႉ ပဵၼ်လူမ်းလႅင်ႉ ဢၼ်ႁႅင်းယႂ်ႇလိူဝ်ပိူၼ်ႈထီႉသွင် ၼႂ်းပီ 2024 သေ ႁႅင်းလူမ်းပဵင်း ၵၼ်တၢင်းလူမ်းလႅင်ႉ ႁႃႊရီႊၵဵင်း ၸၼ်ႉထီႉ 5 – ၼႆယဝ်ႉ။

ၽူႈလူင်ႉလႅၼ်ႇ ၾၢႆႇပၢႆးသၢႆႈၶဝ်တႄႉ လၢတ်ႈဝႃႈ ယွၼ်ႉၾိင်ႈၾႃႉရႃႇသီႇလႅၵ်ႈလၢႆႈလႄႈ ၼမ်ႉသမုၵ်ႉတြႃႊ ဢုၼ်ႇၶိုၼ်ႈမႃးသေ ၸင်ႇႁဵတ်းႁႂ်ႈလူမ်းလႅင်ႉ တၢႆႊၾူၼ်ႊ တိူဝ်းႁႅင်းယႂ်ႇၶိုၼ်ႈမႃး၊ ၵႆႉပဵၼ်မႃးထပ်းၵၼ်လႄႈ ၽတ်ႉပဝ်ႇၶဝ်ႈၼိူဝ်ၵွင်းလွႆလႆႈႁိုင်။

လိူဝ်ၼၼ်ႉ လူမ်းလႅင်ႉၼႆႉ ထိင်းသိမ်း ထၢတ်ႈၼမ်ႉ/ ထၢတ်ႈယမ်းမိုၵ်းဝႆႉ လႆႈႁိုင်လႄႈ ၸင်ႇႁဵတ်းႁႂ်ႈၾူၼ် တူၵ်းလူင်းမႃးၶိုၼ်းၼမ်ႁႅင်း – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။