ၼမ်ႉၾူၼ် ၼွင်းထူမ်ႈ ၼႂ်းၵၢတ်ႇလူင်မျိတ်ႉၵျီးၼႃး

မိူဝ်ႈၼႆႉ ဝၼ်းတီႈ 27/06/2024 ယၢမ်းၵၢင်ၼႂ်ၸဝ်ႉ ၼမ်ႉၾူၼ် ၼွင်းထူမ်ႈ ၼႂ်းၵၢတ်ႇလူင်ၸေႈၼႃး (မျိတ်ႉၵျီးၼႃး) ၸႄႈမိူင်းၶၢင် ယွၼ်ႉႁွင်ႈၼမ်ႉလႆၵႅပ်ႈ/ တၼ် ၾၢႆႇလိူမ်ႈလႆႇ ဢမ်ႇႁဵတ်းၵၢၼ် လၢင်းႁွင်ႈပၼ် ဝႃႈၼႆ။  

ၵူၼ်းပိုၼ်ႉတီႈ ဝဵင်းၸေႈၼႃး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ်ၸဝ်ႉ 2 မူင်းပၢႆ ၾူၼ်တူၵ်းႁႅင်း ဢမ်ႇထၢတ်ႇသေ ႁဵတ်းႁႂ်ႈၼမ်ႉၾူၼ် ယိုင်ႈၼွင်းထူမ်ႈ တီႈၼႂ်းၵၢတ်ႇလူင်ၶႃႈဢေႃႈ။ ပေႃးလၢတ်ႈသိုဝ်ႈ သိုဝ်ႈၵေႃႈ ယွၼ်ႉၾၢႆႇလိူမ်ႈလႆႇၶဝ် ဢမ်ႇႁဵတ်းၵၢၼ် ဢမ်ႇလၢင်းႁွင်ႉပၼ်သေ ႁဵတ်းႁႂ်ႈႁွင်ႈၼမ်ႉတၼ်/ ၵႅပ်ႈ ၼမ်ႉဢမ်ႇၸၢင်ႈလႆလီၼၼ်ႉၶႃႈယဝ်ႉ။ ဢၼ်ၼမ်ႉထူမ်ႈသေ တိူဝ်ႉၺႃးၶူဝ်းၵုၼ်ႇ ၵူၼ်းမိူင်းလူႉသုမ်း ၸိူင်ႉၼၼ်တႄႉ ဢမ်ႇမီးၼင်ႇၵဝ်ႇၶႃႈ”- ဝႃႈၼႆ။

တီႈၵၢတ်ႇလူင်ၸေႈၼႃးၼၼ်ႉ ၼႂ်းလိူၼ်မေႊ – လိူၼ်ၵျုၼ်ႊ ထပ်းၵၼ်မႃးၼႆႉ ယွၼ်ႉၾူၼ်တူၵ်းႁႅင်းသေ ၼမ်ႉၼွင်းထူမ်ႈ ဢမ်ႇယွမ်း 3-4 ပွၵ်ႈယဝ်ႉ ဝႃႈၼႆ။

“ႁဝ်းၶႃႈ တုၵ်းယွၼ်းထိုင် တီႈၾၢႆႇလိူမ်ႇလႆႇၶဝ်ဝႃႈ ႁႂ်ႈၵႆႉလၢင်းႁွင်ႈပၼ် ၼင်ႇႁိုဝ် ၼမ်ႉတေလႆလွင်ႈလီ ယွၼ်ႉၾူၼ်တူၵ်းႁႅင်းသေ ႁဝ်းၶႃႈ ၵူၼ်းၶၢႆၵၢတ်ႇၼႆႉ တုၵ်ႉၶႁႅင်းၼႃႇ ၵမ်းၵမ်းလႆႈၶၢႆႉၶူဝ်းၵုၼ်ႇဝႆႉတီႈသုင် တီႈလွတ်ႈၼမ်ႉယူသေႇသေႇလႄႈ ၼႂ်းသွင်လိူၼ်ၼႆႉ ႁဝ်းၶႃႈၶၢႆႉၶူဝ်းၵုၼ်ႇ ဢမ်ႇယွမ်း 4 ပွၵ်ႈယဝ်ႉ ပေႃး ဢမ်ႇၶၢႆႉၵေႃႈ ၵူဝ်ၼမ်ႉထူမ်ႈၼၼ်ႉၶႃႈယဝ်ႉ။ မိူဝ်ႈၼႆႉ ယွၼ်ႉၼမ်ႉထူမ်ႈၵၢတ်ႇသေ ဢမ်ႇမီးၵူၼ်းမႃးသိုဝ်ႉ ၸၢႆႇၵၢတ်ႇၶႃႈ။ မီးၵူၼ်းၶၢႆၵၢတ်ႇ ၼင်ႈတူၺ်းၼႃႈ ၵၼ်ၵူၺ်းဢေႃႈ”- ၵူၼ်းဝဵင်းၸေႈၼႃး သိုပ်ႇလၢတ်ႈ ၼႄ ၼင်ႇၼႆ။

ၼမ်ႉၾူၼ်ၼွင်းထူမ်ႈ ၼႂ်းၵၢတ်ႇလူင်ၸေႈၼႃးၼႆႉ ၵမ်ႈၼမ် ပဵၼ်တီႈၶူင်ႈတီႈယၢၼ်း ၸိူဝ်းႁၢၼ်ႉၶၢႆၶူဝ်း ၸိူဝ်းၼၼ်ႉတႄႉ ပေႃးၾူၼ်တူၵ်းႁႅင်းၸိုင် လႆႈပိၵ်ႉဢိုတ်းႁၢၼ်ႉ၊ ၼႅတ်ႈၶၢႆႉၶူဝ်းဝႆႉတီႈသုင်လႄႈ ႁဵတ်းႁႂ်ႈ ၵူၼ်းၶၢႆၵၢတ်ႇ ထူပ်းတၢင်းယၢပ်ႇၽိုတ်ႇႁႅင်း။

မိူၼ်ၼင်ႇ ၼႂ်းၸိုင်ႈတႆးပွတ်းဢွၵ်ႇၶူင်း ၼႂ်းၵႄႈတႃႈၵေႃႈ – မိူင်းပဵင်းၼႆႉၵေႃႈ ယွၼ်ႉၾူၼ်တူၵ်းသေ သဵၼ်ႈ တၢင်းပိူဝ်ႉ ဢုင်ႁႅင်း ႁဵတ်းႁႂ်ႈရူတ်ႉၵႃး ဢိုတ်းၶမ်တၢင်းႁိုင်။ ယဝ်ႉၵေႃႈ သဵၼ်ႈတၢင်းထိူၼ်ႇ ၼႂ်းၵႄႈလႃႈသဵဝ်ႈ – မူႇၸေႊ၊ လႃႈသဵဝ်ႈ – သီႇပေႃႉ – ၵျွၵ်ႉမႄး ၸိူဝ်းၼၼ်ႉၵေႃႈ တၢင်းပိူဝ်ႉဢုင် ၼမ်ႉႁူၺ်ႈ ၼွင်းထူမ်ႈ ၸွမ်း သဵၼ်ႈတၢင်းၼမ်သေ ႁဵတ်းႁႂ်ႈရူတ်ႉၵႃး လႆလွင်ႈၸွမ်းၼမ်ႉၵေႃႈမီး ၼႆယဝ်ႉ။