သိုၵ်းမၢၼ်ႈတင်း သိုၵ်းၸၢဝ်းၶိူဝ်း တူင်ႉၼိုင်ထႅမ်ႁႅင်းသိုၵ်း ၸွမ်းႁိမ်းႁွမ်း ၸႄႈဝဵင်းလႃႈသဵဝ်ႈလႄႈ သိုၵ်းမၢၼ်ႈ ယႃႉသဵၼ်ႈတႃႈသၢႆတၢင်း ဢမ်ႇပၼ်ၶဝ်ႈဢွၵ်ႇလႃႈသဵဝ်ႈ ဝႃႈၼႆ။

ၼႂ်းဝူင်ႈၼႆႉ သိုၵ်းမၢၼ်ႈ ယိုတ်းမိူင်းလႄႈ သိုၵ်းၸၢဝ်းၶိူဝ်း တူင်ႉၼိုင်ထႅမ်ႁႅင်းသိုၵ်းၸွမ်း ႁိမ်းႁွမ်း ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇသေ ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ် ပဵၼ်ပၢင်တိုၵ်းၵိူတ်ႇၶိုၼ်ႈထႅင်ႈ ၼႆယဝ်ႉ။  

သိုၵ်းမၢၼ်ႈၼႆႉ ယႃႉထုၺ်ထႆ သဵၼ်ႈတၢင်းၶဝ်ႈဢွၵ်ႇဝဵင်းလႃႈသဵဝ်ႈ ၵူႈသဵၼ်ႈလႄႈ ႁဵတ်းႁႂ်ႈၵႃးတၢင်ႇၵူၼ်း၊ ၵႃးတၢင်ႇၶူဝ်းၵုၼ်ႇ ၵႂႃႇမႃးယၢပ်ႇလႄႈ ၶၼ်ၵုၼ်ႇသိၼ်ၵႃႉ ၶိုၼ်ႈၵူႈယၢင်ႇ။

မိူၼ်ၼင်ႇ သဵၼ်ႈတၢင်း လႃႈသဵဝ်ႈ – မိူင်းလီ – သႅၼ်ဝီ၊ သဵၼ်ႈတၢင်း လႃႈသဵဝ်ႈ – ၵွင်းႁုင်း – မိူင်းယၢင်း၊ ၼႂ်းၵႄႈၽၢႆတွင်း – ၵုင်းသႃႇ၊ သဵၼ်ႈတၢင်း တႃႈတေႈ – သီႇပေႃႉ – လႃႈသဵဝ်ႈ၊ ၼမ်ႉသၼ်ႇ – ၼမ်ႉတူႈ – မၢၼ်ႈၸၢမ် – လႃႈသဵဝ်ႈ ၸိူဝ်းၼႆႉ ဢမ်ႇၸၢင်ႈၵႂႃႇမႃး။

မၢင်တီႈၵေႃႈ သိုၵ်းမၢၼ်ႈ သင်ႇပိၵ်ႉဝႆႉ ၵမ်ႈၼမ်တႄႉ သိုၵ်းမၢၼ်ႈၶုတ်းယႃႉ သဵၼ်ႈတၢင်း ၼင်ႇႁိုဝ် ၵႃးတေဢမ်ႇၸၢင်ႈလတ်းၵႂႃႇမႃးလႆႈ။ တႃႇၵူၼ်းပႆလႄႈ ရူတ်ႉၶိူင်ႈၵူၺ်း ၸၢင်ႈၵႂႃႇမႃး ၼႆယဝ်ႉ။

ၵွၼ်ႇၼႃႈ သိုၵ်းမၢၼ်ႈ တေၶုတ်းယႃႉသဵၼ်ႈတၢင်းၼၼ်ႉ – ၵူၼ်းပိုၼ်ႉတီႈလၢတ်ႈဝႃႈ သိုၵ်းၵဝ်ႈၵၢင်ႉလႄႈ သိုၵ်းတဢၢင်း ၼပ်ႉႁူဝ်ပၢၵ်ႇ လူင်းမႃးတၢင်းႁိမ်းဝဵင်းလႃႈသဵဝ်ႈသေ လွမ်ႉႁွပ်ႈဝႆႉလႄႈ ႁဵတ်းႁႂ်ႈသိုၵ်းမၢၼ်ႈၵေႃႈ ထႅမ်ႁႅင်းသိုၵ်းသေ ပိၵ်ႉသဵၼ်ႈတၢင်းဝႆႉ – ဝႃႈၼႆ။

ဢိင်ၼိူဝ် လွင်ႈၼႆႉ ၵူၼ်းပိုၼ်ႉတီႈၵႂႃႇမႃးၵႃႉၶၢႆ ႁႃၵိၼ်လဵင်ႉတွင်ႉယၢပ်ႇ။ ၶၼ်ၶူဝ်းၵုၼ်ႇ သိၼ်ၵႃႉၵႃႈယႂ်ႇ။ ဢၼ်မႆႈၸႂ်သေပိူၼ်ႈတႄႉ ၵူဝ်ပၢင်တိုၵ်းပဵၼ်ၶိုၼ်းၵူၺ်းယဝ်ႉ ဝႃႈၼႆ။

ၵူၼ်းမိူင်းမႆႈၸႂ် ယူႇသေတႃႉ ဢၼ်ပဵၼ်ႁၢၼ်ႉတၢင်းၵိၼ် ၶွင်ၽူႈမီးၸၼ်ႉ ၼႂ်းတပ်ႉသိုၵ်း၊ မိူၼ်ၼင်ႇ ႁၢၼ်ႉပီႊယႃႊ၊ ႁၢၼ်ႉလဝ်ႈ၊ ႁၢၼ်ႉႁွတ်ႉပွတ်ႉလႄႈ ႁၢၼ်ႉတၢင်းၵိၼ် ၵၢင်ၶမ်ႈတႄႉ ဢမ်ႇသူၼ်ၸႂ် ၶေႃႈပိုၼ်ၽၢဝ်ႇ မႃႇသျႄႇလေႃး ႁၢမ်ႈဢွၵ်ႇႁိူၼ်း ယၢမ်းၵၢင်ၶမ်ႈ 6 မူင်း ထိုင်ယၢမ်းၵၢင်ၼႂ် 6 မူင်း ၼၼ်ႉသေ ပိုတ်ႇယူႇတေႃႇထိုင်ၵၢင်ၶိုၼ်း 9 မူင်း။ လွင်ႈၼႆႉ သိုၵ်းမၢၼ်ႈၵေႃႈ ဢမ်ႇဢဝ်လိူင်ႈပၼ်တူတ်ႈတၢမ်ႇသင်။

သင်ပဵၼ်ၵူၼ်းၼႂ်းပွၵ်ႉၼႂ်းယွမ်ႇ ဢွၵ်ႇႁိူၼ်းယၢမ်းၵၢင်ၶမ်ႈၵၢင်ၶိုၼ်းတႄႉ သိုၵ်းမၢၼ်ႈ တီႉၺွပ်းပေႃႉထုပ်ႉ ႁၢဝ်ႈႁႅင်း –  ၵူၼ်းလႃႈသဵဝ်ႈလၢတ်ႈၼင်ႇၼႆ။