မိူဝ်ႈၼႆႉ ဝၼ်းတီႈ 8/4/2024 ယၢမ်းဝၢႆးဝၼ်း 3 မူင်းၶိုင်ႈ ႁၢၼ်ႉၶၢႆၶမ်း ဢေႇဝရတ်ႉ ဢၼ်ပိုတ်ႇၶၢႆဝႆႉ ၼႂ်းၵၢင်ဝဵင်းမိူင်းယွင်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ၺႃးၵူၼ်းဢမ်ႇႁူႉၾၢႆႇ 4 ၵေႃႉ ၶဝ်ႈၸူၼ် ယိုဝ်းသႂ်ႇၸဝ်ႈၶွင် ႁၢၼ်ႉ မၢတ်ႇၸဵပ်းၵေႃႉၼိုင်ႈလႄႈ ၵူၼ်းႁိမ်းႁွမ်း လူႉတၢႆၸွမ်းၵေႃႉၼိုင်ႈ။
ၵူၼ်းပိုၼ်ႉတီႈ မိူင်းယွင်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ မီးၵူၼ်းႁၢႆႉ 4 ၵေႃႉ ၶဝ်ယိုဝ်းၵွင်ႈလွၵ်ႇငိုတ်ႈ တီႈၼႂ်းႁၢၼ်ႉၶမ်းၼၼ်ႉ ပဵၼ်လၢႆၵမ်း။ ၼႂ်းႁၢၼ်ႉၶမ်းၼၼ်ႉ မီးဝႆႉလုၵ်ႈၸၢႆး ၸဝ်ႈၶွင်ႁၢၼ်ႉၵေႃႉၼိုင်ႈလႄႈ ၵူၼ်း ႁဵတ်းၵၢၼ်ၶဝ်ၵေႃႉၼိုင်ႈ။ ၸဝ်ႈၶွင်ႁၢၼ်သမ်ႉ လႅၼ်ႈပၢႆႈ တၼ်းၺႃးယိုဝ်း တိူဝ်ႉသႂ်ႇတီႈၶႃသေ လႆႈမၢတ်ႇၸဵပ်းႁႅင်း။ ၵူၼ်းႁဵတ်းၵၢၼ် တီႈၼၼ်ႈတႄႉ ဢမ်ႇတၼ်းပဵၼ်သင်။ မိူဝ်ႈသဵင်ၵွင်ႈတႅၵ်ႇၼၼ်ႉ ၵူၼ်းယူႇႁိမ်းႁွမ်းၼၼ်ႉသမ်ႉ မႃးငွၵ်ႈတူၺ်းလႄႈ ၺႃးယိုဝ်းတီႈၵွၵ်းႁူဝ်မၼ်းၼၢင်း လူႉတၢႆထင်တီႈဢေႃႈ။ ၵေႃႉၺႃးယိုဝ်းတၢႆၼၼ်ႉ မီးလုၵ်ႈဢွၼ်ႇလဵၵ်ႉဝႆႉဢေႃႈ”- ဝႃႈၼႆ။
ၵူၼ်းမိူင်း ဢၼ်ၺႃးယိုဝ်းတၢႆၼၼ်ႉ ၸိုဝ်ႈႁွင်ႉ ၼၢင်းၶမ်းမွၼ်း ဢႃယု 20 ပီပၢႆ ပဵၼ်မေႈႁိူၼ်းၼုမ်ႇ မီးဝႆႉ လုၵ်ႈဢွၼ်ႇလဵၵ်ႉၵေႃႉၼိုင်ႈ။ လုၵ်ႈၸၢႆး ၸဝ်ႈၶွင်ႁၢၼ်ႉၶမ်း ဢၼ်ၺႃးယိုဝ်းၼၼ်ႉ တိူဝ်ႉၺႃး မၢၵ်ႇၵွင်ႈ တီႈၶႃမၢၵ်ႇၵၢဝ်ႈ ၾၢႆႇသၢႆႉ ၸိုဝ်ႈႁွင်ႉ ၸၢႆးၶမ်းတိပ်ႉ ဢႃယု 20 ပီပၢႆ ယူႇဝၢၼ်ႈႁူဝ်ၶူင်ႇ ပွၵ်ႉ 8 ဝဵင်းမိူင်းယွင်း။ ၵူၼ်းၸူၼ် ၸိူဝ်းၼၼ်ႉတႄႉ တၼ်းလႆႈၶမ်းၵႂႃႇ တင်းၼမ် ၼႆယဝ်ႉ။
“ၵူၼ်းၸူၼ် ၸိူဝ်းၼၼ်ႉ ၶဝ်ၶဝ်ႈမႃးသေ ဢဝ်ၵွင်ႈၸမ်ႈသႂ်ႇ ၸဝ်ႈႁၢၼ်ႉၼၼ်ႉၵမ်းလဵဝ် ယဝ်ႉၵေႃႈ ဢဝ်ၶမ်း ဢၼ်မီးၼႂ်းတူႈမၢၼ်ႇၼၼ်ႉၵႂႃႇ ဢမ်ႇယွမ်း 3 ၽႅင်၊ ဢၼ်ပဵၼ်ၽႅင်သီလႅင်ၼၼ်ႉ။ ၼမ်ႉၼၵ်းမၼ်း တေမီးၵႃႈႁိုဝ်တႄႉ ဢမ်ႇ ႁူႉ။ ယဝ်ႉၵေႃႈ လူႉသုမ်းၶၼ်ငိုၼ်းၵႃႈႁိုဝ်ၵေႃႈ ပႆႇႁူႉ”- ၵူၼ်းပိုၼ်ႉတီႈ မိူင်းယွင်း သိုပ်ႇလၢတ်ႈၼႄၼင်ႇၼႆ။
ႁၢၼ်ႉၶမ်း ဢေႇဝရတ်ႉၼႆႉ တိုၵ်ႉပိုတ်ႇမႃး မီးၶၢဝ်းတၢင်း 2 ပီပၢႆ ။ ဝၢႆးသေ ၸူၼ်ၶဝ်ႈယိုဝ်းယဝ်ႉ ပလိၵ်ႈမၢၼ်ႈတင်း သိုၵ်းမၢၼ်ႈတႄႉ ဢွၼ်ၵၼ်မႃး ၵူတ်ႇထတ်းၸွမ်းပွၵ်ႉယွမ်ႇ ပေႃးၸွတ်ႇၵႂႃႇၵူႈတီႈလႄႈ ထိုင်တီႈႁဵတ်းႁႂ်ႈ ၵူၼ်းမိူင်းပေႃးတူၵ်းၸႂ်ၵူဝ်ႁႄ ဝႃႈၼႆ။
လွင်ႈၸူၼ်ၵၼ် ၸိူင်ႉၼႆၼႆႉ တီႈမိူင်းယွင်းၼႆႉ ဢမ်ႇတွၼ်ႉမီးမႃးသေပွၵ်ႈ ပွၵ်ႈၼႆႉ တေလႆႈဝႃႈ ပဵၼ်ပွၵ်ႈႁႅၵ်ႈယဝ်ႉ။ ဝၢႆးမီးၵူၼ်းၶဝ်ႈၸူၼ်ႁၢၼ်ႉၶၢႆၶမ်းၼႆႉယဝ်ႉ ႁဵတ်းႁႂ်ႈၵူၼ်းမိူင်း ၸိူဝ်းပိုတ်ႇႁၢၼ်ႉၶၢႆၶူဝ်းၵုၼ်ႇ ၸိူဝ်းၼၼ်ႉၵေႃႈ ဢွၼ် ၵၼ် ၼႅတ်ႈပိၵ်ႉဢိုတ်းႁၢၼ်ႉၵၼ်သေ ပွၵ်ႈႁိူၼ်းၽႂ်မၼ်း မၢင်ၸိူဝ်း ဢမ်ႇႁတ်းဢွၵ်ႇၼွၵ်ႈႁိူၼ်း ၵူဝ်ၸိူဝ်းၼႆႉ။
