ၶုၼ်ႁေႃၶမ်းၶျႃးလ်သ် မိူင်းဢိင်းၵလဵတ်ႈ ဢႃယု 75 ပီၼႆႉ ၵူတ်ႇထတ်းထူပ်းၵၼ်တၢင်းပဵၼ် မလဵင်း ၵႅၼ်ႇသႃႇ တီႈတွမ်ႇမၢၵ်ႇယဵဝ်ႈ(တွမ်ႇလုၵ်ႈမၢၵ်ႇ) – ယူႇတီႈႁေႃၶမ်း ပႅၵ်ႊၵိမ်ႊႁႅမ်ႊပိုၼ်ၽၢဝ်ႇဢွၵ်ႇမႃးၼင်ႇၼႆ။

ၸဝ်ႈမုၼ်ယႂ်ႇၶုၼ်ႁေႃၶမ်းၶျႃးလ်သ်ၼႆႉ ပိုၼ်ၽၢဝ်ႇလၢတ်ႈဝႃႈ တေၵိုတ်းလိုဝ်ႈလွင်ႈႁူပ်ႉထူပ်းၶဝ်ႈဢွၵ်ႇတင်းၵူၼ်းမိူင်းဝႆႉသေတႃႉ ၼႃႈၵၢၼ်တႃငၢၼ်းမၼ်းၸဝ်ႈတႄႉ တေသိုပ်ႇႁဵတ်းသၢင်ႈၵႂႃႇ မိူၼ်ၵဝ်ႇ၊ တႄႇႁပ်ႉလွင်ႈယူတ်းတူဝ်ဝၼ်းၸၼ်ၼႆႉၵႂႃႇ၊ ၽွင်းယူတ်းယႃတူဝ်ယူႇၼႆႉတႄႉ ၼႃႈၵၢၼ်တႃငၢၼ်းဢၼ်လမ်ႇလွင်ႈ တေႁႂ်ႈၵူၼ်းႁူႉလွင်ႈႁၼ်တၢင်းၼႂ်းႁၢင်ႈႁေႃ ႁဵတ်းသၢင်ႈဝႆႉပၼ်- ဝႃႈၼႆ။

ၵူၺ်းၵႃႈ ပဵၼ်ၶႅၼ်ႊသိူဝ်ႊ ၸၼ်ႉလႂ်ယဝ်ႉ ၼႆတႄႉဢမ်ႇပိုၼ်ၽၢဝ်ႇပႃး။ ယၢမ်းလဵဝ်တႄႉ လုၵ်ႈၸၢႆးမၼ်းၸဝ်ႈ သွင်ၸဝ်ႈတႄႉ မၼ်းၸဝ်ႈလႆႈၸႅင်ႈလၢတ်ႈပွင်ႇၶၢဝ်ႇယဝ်ႉသေ ၵေႃႉပဵၼ်လုၵ်ႈၸၢႆးဢွၼ်ႇ ႁႄႇရီႇ ဢၼ်ၵႂႃႇမီးယူႇမိူင်းဢမေႊရိၵၼ်ႊၼၼ်ႉၵေႃႈတေမႃးၸႂ်း ၵေႃႉပဵၼ်ပေႃႈ ၼႂ်းဢမ်ႇႁိုင်ဢမ်ႇၼၢၼ်းၼႆႉ ဝႃႈၼႆ။ ယၢမ်းလဵဝ် ၸဝ်ႈႁေႃၶမ်းၶျႃႊလ်သ်ၼႆႉ တႅင်ႇတင်ႈဝႆႉၸုမ်းၵိူဝ်းၵုမ်ႇသုၼ်ႇတူဝ်မၼ်းၸဝ်ႈ ၼႂ်းႁေႃၶမ်းဢိင်းၵလဵတ်ႈ၊ တေမီး မေးၼၢင်းၸဝ်ႈ ၸဝ်ႈၼၢင်းၵမီႇလႃႇ၊ လုၵ်ႈၸၢႆးၸဝ်ႈ ဝီႊလီႊယမ်ႊ၊ ၼွင်ႉယိင်းၸဝ်ႈ- ဢႅၼ်ႊ၊ ၼွင်ႉၸၢႆး ဢႅတ်ႉတွပ်ႉ ၸိူဝ်းၼႆႉ။ ဢၼ်ပဵၼ်လုၵ်ႈပႂ်ႉၸဝ်ႈ ၵႅတ်ႉတရိၼ်ႊတႄႉ ၸင်ႇႁႃၽႃႇတွင်ႉယဝ်ႉ ယူတ်းယႃတူဝ်ဝႆႉလႄႈဢမ်ႇပႃး။ ဢၼ်ပဵၼ်လုၵ်ႈၸၢႆးၵေႃႉလဵၵ်ႉၸဝ်ႈ ႁႄႇရီႇလႄႈ ၼွင်ႉၸၢႆးၸဝ်ႈ ဢႅၼ်ႊတရူး ၵေႃႈ ဢမ်ႇၶဝ်ႈပႃးၼႂ်းသဵၼ်ႈမၢႆ ၽူႈၵိူဝ်းၵုမ် – ၶၢဝ်ႇ ပီႇပီႇသီႇႁၢႆးငၢၼ်းဝႆႉၼင်ႇၼႆ။

ၵေႃႉပဵၼ်ပေႃႈၸဝ်ႈမုၼ်ယႂ်ႇၶုၼ်ႁေႃၶမ်းၶျႃးလ်သ် ၼႆႉ သဵင်ႈၵၢမ်ႇသုတ်းမုၼ်ၵႂႃႇ မိူဝ်ႈပီ 2021 ၽွင်းတၢင်းပဵၼ်ၶူဝ်ႊဝိတ်ႉလၢမ်းၽႄႈၼၼ်ႉသေ ၵေႃႉပဵၼ်မႄႈ- ဢၼ်ပဵၼ်ၼၢင်းႁေႃၶမ်း ဢႄႊလိသပႅတ်ႉ ၼၼ်ႉတႄႉ ၸင်ႇႁႃၸၢမ်ႇပူႈၼွၼ်းၽေးၵႂႃႇပီၵၢႆ 2022 ၼႆႉၵူၺ်း။