ဢိင်ၼိူဝ်ၵူၼ်းဝၢၼ်ႈၵူၼ်းသူၼ် ၶႂ်ႈလႆႈၶိုၼ်းတီႈလိၼ်သူၼ်သေ မီးပၼ်ႁႃထဵင်မေႃးၵၼ် တင်းၸုမ်းပျီႇတူႉၸိတ်ႉပၢင်ႇလႅင်းသႂ် ထိုင်တီႈပေႃးလႆႈလၼ်ႇၵွင်ႈတေႃႇၵၼ် သေဢဝ်ပဵၼ်ၶၢဝ်ႇယႂ်ႇၼႂ်းသိုဝ်ႇၶၢဝ်ႇမၢၼ်ႈလၢႆတီႈ။

ဝၼ်းတီႈ 14/5/2018 ၸုမ်းပျီႇတူႉၸိတ်ႉပၢင်ႇလႅင်းသႂ် (မၢၵ်ႇၵႅင်း) တင်းၵူၼ်းဝၢၼ်ႈထဵင်မေႃးၵၼ် လွင်ႈတီႈလိၼ် 400 ဢေႊၶိူဝ်ႊ ဢၼ်မီးၼႂ်းၵႄႈဝၢၼ်ႈသၢႆးငိုၼ်းတင်းဝၢၼ်ႈၼမ်ႉပုၼ်း ဢိူင်ႇတွင်ၼဝ်ႈ ၸႄႈဝဵင်းၼမ်ႉ  ၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸၢႆးမိၼ်ႉဢွၼ်ႇ ၵူၼ်းဝၢၼ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ၸုမ်းပျီႇတူႉၸိတ်ႉၶဝ်ၶဝ်ႈမႃးသေ မႃးႁႄႉႁၢမ်ႈလွၵ်ႇငိုတ်ႈႁဝ်းၶႃႈ ႁဝ်းၶႃႈၶႂ်ႈလႆႈတီႈလိၼ်ၸိူဝ်းၼႆလႄႈ တႃႇၽုၵ်ႇၵိၼ်လဵင်ႉတွင်ႉလႄႈ ၸင်ႇဢွၼ်ၵၼ်မႃးတီႇ ” ဝႃႈၼႆ။

တီႈလိၼ်ၸိူဝ်းၼႆႉ ယူႇတီႈၸုမ်းပၢင်ႇလႅင်းသႂ်ႇ ၵႂႃႇတၢင်ႇယွၼ်းၶႂၢင်ႉတီႈၾၢႆႇတႅၵ်ႈၼႃႈလိၼ်ၸႄႈတွၼ်ႈလွႆလႅမ်  တႃႇၽုၵ်ႇတူၼ်ႈမႆႉသႅၼ်တူၼ်ႈ ႁႂ်ပႃႇမႆႉလိူင်ႇၼမ်။

ၸၢႆးသၢႆလႅင်း ၵႅမ်ႁူဝ်ပဝ်ႈထုင်ႉပၢင်ႇလႅင်းသႂ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – ” တီႈလိၼ်ၼႆႉတိုၵ်ႉမီးပၼ်ႁႃ ၵၼ် သူယႃႇၽူမ်ႈႁဵတ်းၼႆသေ ၾၢင်ႉသေဢုပ်ႇၶဝ်၊ မိူဝ်ႈဝႃႈၼႆႉ ၶဝ်သမ်ႉဢမ်ႇထွမ်ႇသေ ဢဝ်ၵႃးထုၺ်လိၼ်မႃးထုၺ် ႁဝ်းၶႂ်ႈဢုပ်ႇၶဝ်လီလီ၊ ၶဝ်ၵေႃႈဢမ်ႇၸႂ်ႈၵူၼ်းဝၢၼ်ႈႁိမ်းႁွမ်းၼႆႉ ၶဝ်လုၵ်ႉတၢင်ႇတီႈမႃး တီႈလိၼ်ၼႆႉၵေႃႈ ဢၢၼ်းၽုၵ်ႇတူၼ်ႈမႆႉသႅၼ်တူၼ်ႈ တႃႇၵူၼ်းဝၢၼ်ႈၵူၺ်းၼင်ႇၵဝ်ႇ ” ဝႃႈၼႆ။

ၵဵဝ်ႇလူၺ်ႈလွင်ႈတီႈလိၼ်ၼႆႉသေ မိူဝ်ႈဝၼ်းတီႈ 10/5/2018 ၼၼ်ႉၵေႃႈ ၵူၼ်းဝၢၼ်ႈမွၵ်ႇၽူႈသိုဝ်ႇၶၢဝ်ႇတၢင်းတူၼ်ႈတီးမႃးသေ ႁဵတ်းပၢင်သပ်းၸႅင်ႈၶၢဝ်ႇယဝ်ႉၵမ်းၼိုင်ႈ။ ပၢင်ႇလႅင်းသႂ်တႄႉဝႃႈ ၵူၼ်းဝၢၼ်ႈၸိူဝ်းၼႆႉ ၵူႈပွၵ်ႈ   ၶဝ်ၶိုၼ်ႈႁဵတ်းသူၼ်းၼိူဝ်လွႆ၊ ၽိူဝ်ႇၵၢၼ်ၼိူဝ်လွႆဢမ်ႇလီ ထုင်ႉၼႆႉသမ်ႉၵႃႈၶၼ်တီႈလိၼ်ယႂ်ႇမႃးလႄႈ တမ်းဝၢင်း ၽႅၼ်ၵၢၼ်မႃးယွၼ်းၶိုၼ်း။