ၶၢပ်ႈတူဝ် ၸဝ်ႈၵၼ်းၸဵတ်း တေပူၼ်ႉၼႂ်းႁၢင်လိူၼ်ၼႆႉ

ၸွမ်သိုၵ်း ၸဝ်ႈၵၼ်းၸဵတ်း (ႁိုဝ်) ပေႃႈထဝ်ႈၵၼ်းၸဵတ်း လူႉသဵင်ႈလူၺ်ႈတၢင်းပဵၼ်ၵူၼ်းထဝ်ႈ တီႈဝဵင်းၵဵင်းမႂ်ႇ ၸိုင်ႈထႆး ၽွင်းဢႃယု 87 ပီ တေပူၼ်ႉၶၢပ်ႈတူဝ် မၼ်းၸဝ်ႈ ၼႂ်းႁၢင်လိူၼ်ၼႆႉ။

တႄႇဢဝ် ဝၼ်းတီႈ 26-29/1/2024 ၼႆႉ တေယူႇတီႈ လုၵ်ႈလၢင်းၼၢင်းမေး ၸိူဝ်ႉၶိူဝ်းပီႈၼွင်ႉလႄႈ ၶွင်ႇသီႇဢဝ်ၶိုၼ်း ၸိုင်ႈ တႆး (RCSS) သေ လႆႈဢဝ်ၶၢပ်ႈတူဝ် ၸွမ်သိုၵ်း ၸဝ်ႈၵၼ်းၸဵတ်း မႃးၸတ်းပၢင်ၸႃပၼ ဝႆႉတီႈဝတ်ႉပဵင်းလူင် ဝဵင်းႁႅင် ၸႄႈတွၼ်ႈၵဵင်းမႂ်ႇ ၸိုင်ႈထႆး လႅၼ်လိၼ်တႆး – ထႆး။ ၼႂ်းပၢင်ၸႃပၼၼႆႉ မီးပၢင်လူႇတၢၼ်း ၵၢင်ၼႂ်လႄႈ ၵၢင်ၶမ်ႈ ၵူႈဝၼ်း ၼႆယဝ်ႉ။

ပေႃးထိုင်မႃး ဝၼ်းတီႈ 30/1/2024 ယၢမ်းၵၢင်ၼႂ် 9 မူင်းၸိုင် တေလူႇတၢၼ်ႇၽႄၵုသူလ်၊ ယၢမ်းၵၢင်ဝၼ်း 11 မူင်း တေၵၢပ်ႇသွမ်းသင်ၶၸဝ်ႈ/ လဵင်ႉလူပီႈၼွင်ႉၶႅၵ်ႇလႄႈ ယၢမ်းၵၢင်ဝၼ်း 12:30 မူင်းသမ်ႉ တေယုၵ်ႉဢဝ်ၶၢပ်ႈတူဝ် ပေႃႈထဝ်ႈ ၵၼ်း ၸဵတ်း ၵႂႃႇတီႈၶုမ်ပႃႇၸ ႁိမ်းဝၢၼ်ႈၵုင်းၵျေႃး ၼႆယဝ်ႉ။

ၸွမ်သိုၵ်း ၸဝ်ႈၵၼ်းၸဵတ်းၼႆႉ လႆႈလူႉသဵင်ႈၵႂႃႇ တီႈႁိူၼ်းမၼ်းၸဝ်ႈ ၸႄႈဝဵင်းသၼ်ၵမ်ႈၽႅင်း ၸႄႈတွၼ်ႈၵဵင်းမႂ်ႇ ၸိုင်ႈတႆး မိူဝ်ႈဝၼ်းတီႈ 24/1/2024 ဝၼ်းပုတ်ႉ ယမ်းၵၢင်ၶမ်ႈ 8 မူင်း။

ၸဝ်ႈၵၼ်းၸဵတ်းၼႆႉ ပဵၼ်လုၵ်ႈၸၢႆး လီႁူႇလူႇ – ပႃႈၵျွင်းၸိင်ႇ၊ ၵိူတ်ႇမိူဝ်ႈ ဝၼ်းတီႈ 12/6/1937 ၊ တီႈၵိူတ်ႇ ဝၢၼ်ႈသ ၼဵၼ်း ဢိူင်ႇသၼဵၼ်း ၸႄႈဝဵင်းပၢင်လူင် (ၵူႈပွၵ်ႈ ၸႄႈဝဵင်းမိူင်းၸဝ်ႈၾႃႉ လၢႆးၶႃႈ) ၊ တႄႇၼႃႈႁိူၼ်းၵိုၵ်းၸွမ်း – ၼၢင်းၶိုၼ်၊ ၼၢင်းမူၼ်း၊ ၼၢင်းထူၺ်းလႄႈ ၼၢင်းဢိင်ႇ။ မီးလုၵ်ႈလၢင်း တင်းမူတ်း 11 ၵေႃႉ။

တႄႇၶဝ်ႈႁၢပ်ႇၵၢၼ် ၸိူဝ်ႉၸၢတ်ႈမႃး မိူဝ်ႈၽွင်းဢႃယု 15 ပီ ၼႂ်းပီ 1952 ၼၼ်ႉသေ ထိုင်မႃး ပီ 1995 ၼႆႉ ယွၼ်းၸပ်းတၢင်းပဵၼ်(ရေႃးၵႃႇ) ၶႃၶႅင်လႄႈ လႆႈၵိုတ်းလိုဝ်ႈၼႃႈၵၢၼ်ပုၼ်ႈၽွၼ်းဝႆႉသေ ယႃတူဝ်ယူႇဝႆႉတီႈၵဵင်းမႂ်ႇ ၸိုင်ႈထႆး ႁၢၼ်ႉတေႃႇထိုင်ပေႃး လူႉသဵင်ႈ ၼႆယဝ်ႉ။