မိူဝ်ႈၼႆႉ ဝၼ်းတီႈ 27/11/2023 ယၢမ်းဝၢႆးဝၼ်းမွၵ်ႈ 2 မူင်း တရူၼ်းမႃးပွႆႇမၢၵ်ႇ သႂ်ႇတီႈၵူဝ်ႇတွင်ႇ ၶိူင်ႈၾႆးၾႃႉ (ဢွင်ႈတီႈ ၵဵပ်းၶွင် ၶိူင်ႈၾႆးၾႃႉ) တီႈ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထုၵ်ႇၾႆႈမႆႈၵႂႃႇ ဝႃႈၼႆ။

ၸဝ်ႈၵုၼ်ႇ တီႈ 105 လၵ်း လၢတ်ႈတီႈၽူႈတွႆႇႁွၵ်ႈဝႃႈ – “တီႈၵူဝ်ႇတွင်ႇၼႆႉ ၶဝ်ဢဝ်တရူၼ်းမႃးပွႆႇမၢၵ်ႇသႂ်ႇ 2 လုၵ်ႈသေ   ထုၵ်ႇၾႆးမႆႈၵႂႃႇ မိူဝ်ႈၵႆႈ ယၢမ်းဝၢႆးဝၼ်းမွၵ်ႈ 2 မူင်းၼႆႉၶႃႈ။ ပဵၼ်ၵူဝ်ႇတွင်ႇၶိူင်ႈၾႆးၾႃႉဢေႃႈ”- ဝႃႈၼႆ။

ယၢမ်းလဵဝ် သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ် မႃးပွႆႇမၢၵ်ႇ တီႈ 105 လၵ်းထႅင်ႈ 2 လမ်း ယဝ်ႉၵေႃႈ ၶိူင်ႈမိၼ်ၸိူဝ်းၼႆႉ ပၼ်ႇလဵပ်ႈ ၸွမ်းဝဵင်းမူႇၸေႊ ဢမ်ႇယွမ်း 3 ႁွပ်ႈယဝ်ႉ ၵူၼ်းပိုၼ်ႉတီႈလၢတ်ႈ။

မိူဝ်ႈဝႃး ဝၼ်းတီႈ 26/11/2023 ယၢမ်းၵၢင်ၶမ်ႈမွၵ်ႈ 7 မူင်းၶိုင်ႈ သိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီ ပွတ်းႁွင်ႇ ပဵၼ် ပၢင်တိုၵ်းၵၼ် ႁၢဝ်ႈႁႅင်း တီႈ 105 လၵ်း ၸႄႈဝဵင်းမူႇၸေႊသေ ၸၢၵ်ႇမၢၵ်ႇတိူဝ်ႉသႂ်ႇ ၵူၼ်းၼုမ်ႇ ၽူႈၸၢႆး ဢႃယုမွၵ်ႈ 27 လူႉ တၢႆ ထင်တီႈၵေႃႉၼိုင်ႈ။