သိုၵ်းမၢၼ်ႈယိုတ်းမိူင်း လႄႈ သိုၵ်းတဢၢင်း TNLA ပိုတ်းယိုဝ်းၵၼ် ႁၢဝ်ႈႁႅင်းလႄႈ ႁဵတ်းႁႂ်ႈ ၵူၼ်းပိုၼ်ႉတီႈ ၶၢႆႉပၢႆႈဢွၵ်ႇဝၢၼ်ႈ ႁူဝ်ၵူၼ်း 600 ပၢႆ။

မိူဝ်ႈဝၼ်းတီႈ 29 ထိုင် 30/8/2023 သိုၵ်းမၢၼ်ႈယိုတ်းမိူင်း လႄႈ သိုၵ်းတဢၢင်း TNLA ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းၸေႊလၢၼ်ႉလႄႈ ၵူၼ်းမိူင်းၸိူဝ်းယူႇႁိမ်းႁွမ်း လႆႈပၢႆႈၽေးသိုၵ်း ႁူဝ်ၵူၼ်း ဢမ်ႇယွမ်း 600 ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ ၸဵမ်ၵူၼ်းထဝ်ႈၵူၼ်းၵႄႇ မႄႈလုၵ်ႈဢွၼ်ႇလဵၵ်ႉၶဝ်ၸိူဝ်းၼႆႉ လႆႈဝႃႈ ယၢပ်ႇၸႂ်တေႉယဝ်ႉၶႃႈ။ ၼႂ်းဝၢၼ်ႈတႄႉ တေၵိုတ်းၵူၼ်းၸၢႆးဢၼ်တိုၵ်ႉၼုမ်ႇတိုၵ်ႉၵမ် ပႂ်ႉဝႆႉၵူၺ်းယဝ်ႉၶႃႈ လိူဝ်ၼၼ်ႉ ဢမ်ႇၶႂ်ႈၵိုတ်းၽႂ်ယဝ်ႉ။ၵမ်ႈၽွင်ႈၵေႃႈ ဢမ်ႇၸၢင်ႈႁဵတ်းႁိုဝ် ၵႃႈလႆႈပႂ်ႉတူၺ်းႁိူၼ်းလႄႈ ဢမ်ႇၸၢင်ႈပၢႆႈ ” – ဝႃႈၼႆ။

 ၵူၼ်းမိူင်းၸိူဝ်းလႆႈပၢႆႈၽေးသိုၵ်း တီႈၸေႊလၢၼ်ႉၼႆႉ တေမီးလၢႆလၢႆဝၢၼ်ႈ မိူၼ်ၼင်ႇ မၢၼ်ႈၵၢင် ၊ မၢၼ်ႈသၵ်း ၊  ဝၢၼ်ႈၼမ်ႉၵတ်း ၸဵမ်ၸိူဝ်း   ။ မိူဝ်ႈလဵဝ် ယၢပ်ႇၽိုတ်ႇတီႈယူႇတီႈၼွၼ်း လႄႈ ၶဝ်ႈၼမ်ႉတၢင်းၵိၼ်။

ၵူၼ်းၼႂ်းပိုၼ်ႉတီႈမူႇၸေႊၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ မွၵ်ႈဝၼ်းသွင်ဝၼ်းၼႆႉတႄႉ ပီႈၼွင်ႉၽႂ်မၼ်းလႄႈ ၵျွင်းမုၼ်ႈၸဝ်ႈ လဵင်ႉလူၸွႆႈထႅမ်ပၼ်လႆႈယူႇသေတႃႉၵေႃႈ ပေႃးႁိုင်မႃးတႄႉ တေဢမ်ႇငၢႆႈ” – ဝႃႈၼႆ။

ပၢင်တိုၵ်းတီႈၸေႊလၢၼ်ႉၼႆႉ ၾၢႆႇသိုၵ်းမၢၼ်ႈ ႁွင်ႉဢဝ်တပ်ႉၸုမ်းလၢႆၾၢႆႇ ၸွႆႈတိုၵ်း မိူၼ်ၼင်ႇ တပ်ႉၶမယ  420 ၊ ၶမယ 417 ။ လိူဝ်ၼၼ်ႉ  မိူၼ်ၼင်ႇ ၸုမ်းသိုၵ်းပျီႇတူႉၸိတ်ႉၼမ်ႉၶမ်းလႄႈ ၸုမ်းပျီႇတူႉၸိတ်ႉတၢင်ႇမူႇတၢင်ႇၸုမ်းၵေႃႈ ႁွင်ႉပႃး ။

ယၢမ်းလဵဝ် သိုၵ်းမၢၼ်ႈယူႇသဝ်းဝႆႉ ၼႂ်းႁူင်းႁဵၼ်ၸၼ်ႉသုင်ၸေႊလၢၼ်ႉၼၼ်ႉသေ သိုၵ်းတဢၢင်း TNLA သမ်ႉ ယူႇသဝ်းဝႆႉ တီႈဝတ်ႉၵျွင်းၸဝ်ႈၼၢင်းမွၼ်းလႃႈ ပွၵ်ႉၵၢင် ႁဵတ်းႁႂ်ႈ ၵူၼ်းၼႂ်းပိုၼ်ႉတီႈ ယူႇယၢပ်ႇ။

ၼႂ်းလိူၼ်ဢေႃႊၵတ်ႊသ်ၼႆႉၵူၺ်းၼင်ႇၵဝ်ႇ ၵူၼ်းပိုၼ်ႉတီႈ ၼႂ်းဢိူင်ႇၼမ်ႉၽၵ်းၵႃ တိူဝ်ႉၺႃး ၸၢၵ်ႇမၢၵ်ႇသိုၵ်းမၢၼ်ႈ တူၵ်းသႂ်ႇ လူႉတၢႆထင်တီႈ 4 ၵေႃႉ မၢတ်ႇၸဵပ်း 3 ၵေႃႉ။