သဵင်ၵွင်ႈတႅၵ်ႇ ႁိမ်းႁူင်းပလိၵ်ႈမၢႆ 2 တီႈႁူဝ်တၢင်းၵႃႇၵွႆႇယေး ၼႂ်းၸႄႈဝဵင်းလႃႈသဵဝ်ႈ ။

မိူဝ်ႈၼႆႉ ဝၼ်းတီႈ 7/8/2023 ယၢမ်းႁူဝ်ၼႂ်ၸဝ်ႉမိူင်းပႆႇလႅင်း 1 မူင်းၼၼ်ႉ မီးၸုမ်း ဢမ်ႇႁူႉၾၢႆႇ မႃးယိုဝ်းၵွင်ႈ တီႈႁူဝ်တၢင်းၵႃႇၵွႆႇယေး(ႁူဝ်သဵၼ်ႈတၢင်းၾၢႆႇၵႅတ်ႇၶႄ) ႁိမ်းႁူင်းပလိၵ်ႈ မၢႆ 2  ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

ၵူၼ်းၼႂ်းပိုၼ်ႉတီႈလႃႈသဵဝ်ႈၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “  ပိူၼ်ႈမႃးယိုဝ်း  မွၵ်ႈ 1 မူင်း ၵၢင်ၶိုၼ်းၼႆႉ ။မႃးယိုဝ်း ႁူဝ်တၢင်းၼၼ်ႉ ၶႂ်ႈယိုဝ်းၽႂ်ၵေႃႈ ဢမ်ႇႁူႉ။ တီႈၼၼ်ႉ ၸမ်ၵၼ်တင်း တပ်ႉတိူင်းသိုၵ်းမၢၼ်ႈ ရမၶ (အရှေ့မြောက်ပိုင်းတိုင်း စစ်ဌာနချုပ် ရမခ စစ်တိုင်းရုံး) ဢေႃႈ ” –  ဝႃႈၼႆ။

မိူဝ်ႈဝၼ်းတီႈ 6/8/2023 ယၢမ်းၵၢင်ၼႂ်မွၵ်ႈ 10 မူင်းၶိုင်ႈၼႆႉၵေႃႈ မၢၵ်ႇတႅၵ်ႇတီႈ ႁူင်းႁႅမ်း သၼ်ႊၼီႊ ဢၼ်မီးတၢင်းလင် ႁူင်းၼႄငဝ်း တဵင်းထၢႆႉ  ပွၵ်ႉ 6 လွႆယဵဝ်ႈ ဝဵင်းလႃႈသဵဝ်ႈ။

ၵူၼ်းၼႂ်းပိုၼ်ႉတီႈလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ဢၼ်ၶဝ်ယိုဝ်းယူႇၸိူဝ်းၼၼ်ႉ ဢမ်ႇႁူႉဝႃႈ ၽႂ် ယိုဝ်း ၽႂ် ။ ဢမ်ႇမီးၽႂ် တိူဝ်ႉမၢတ်ႇၸဵပ်းၼင်ႇၵဝ်ႇ။လွင်ႈပိုတ်းယိုဝ်းၵၼ်ၸိူဝ်းၼႆႉ ၵေႃႈ ၶႂ်ႈဝႃႈ ပဵၼ်ယူႇတင်းဝဵင်းယဝ်ႉ ” – ဝႃႈၼႆ။

ဝၢႆးသေ သိုၵ်းမၢၼ်ႈယိုတ်းမိူင်းမႃး ၼႂ်းၸႄႈဝဵင်းလႃႈသဵဝ်ႈၼႆႉ မၢၵ်ႇၵမ်းၵမ်း တႅၵ်ႇ ၊ လွင်ႈပိုတ်းယိုဝ်းၵေႃႈ မီးမႃးၼမ် ၊ ယွၼ်ႉၼၼ် ၵၢၼ်ႁႃၵိၼ်လဵင်ႉတွင်ႉၵေႃႈ ယၢပ်ႇၽိုတ်ႇ၊ ၵူၼ်းမိူင်းၵိၼ်းၸႂ်ၼႂ်းၵႄႈၵၢၼ်မိူင်းၵၢၼ်သိုၵ်းၼႆယဝ်ႉ။

ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈလႃႈသဵဝ်ႈၵေႃႈၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ တီႈလႃႈသဵဝ်ႈၼႆႉ ၶႂ်ႈပဵၼ်ၵူႈတီႈယဝ်ႉ။ပေႃးၵႂႃႇတၢင်းၼွၵ်ႈၼႆ ဢမ်ႇမီးလွင်ႈႁူမ်ႇလူမ်ႈယဝ်ႉ။   ၶၼ်ၵုၼ်ႇၵေႃႈ ၶိုၼ်ႈသုင် ၵၢၼ်ႁႃငိုၼ်းသမ်ႉယၢပ်ႇ ဢမ်ႇႁူႉတေလႆႈယူႇၵိၼ်ၸိူင်ႉႁိုဝ်ယဝ်ႉ။ပေႃးၵူၼ်းၼႂ်းႁေႃၼႂ်းႁိူၼ်းၼမ် ၶႅၼ်းၵိၼ်းၸႂ်ယဝ်ႉ။ယွၼ်ႉၵၢၼ်ဝၢၼ်ႈၵၢၼ်မိူင်းၸိူဝ်းၼႆႉသေ ၵူၼ်းမိူင်း လႆႈၶၢမ်ႇၶီႈသူမ်ႈၼႂ်းၵႄႈမၼ်း ” – ဝႃႈၼႆ။

 မၢၵ်ႇတႅၵ်ႇတီႈ ႁူင်းႁႅမ်း သၼ်ႊၼီႊ ဢၼ်မီးတၢင်းလင် ႁူင်းၼႄငဝ်း တဵင်းထၢႆႉယူၵ်ႉသျိၼ်ႇ ပွၵ်ႉ 6 လွႆယဵဝ်ႈ ဝဵင်းလႃႈသဵဝ်ႈ မိူဝ်ႈဝၼ်းတီႈ 7/8/2023 ၼၼ်ႉ မီးၵူၼ်းမၢတ်ႇၸဵပ်း ၵေႃႉၼိုင်ႈ လႆႈႁူႉၼင်ႇၼႆ ။