သိုၵ်းမၢၼ်ႈ ပိၵ်ႉသဵၼ်ႈတၢင်း ၵႂႃႇမႃး တၢင်းၾၢႆႇဢွၵ်ႇဝဵင်းလၢႆးၶႃႈ ၼႄးဝႃႈ သိုၵ်း SSPP ထႅမ်ႁႅင်းသိုၵ်းတူင်ႉ ၼိုင်ၵႂႃႇမႃး၊ ၵူၼ်းဝဵင်းလၢႆးၶႃႈလၢတ်ႈ။

မိူဝ်ႈဝႃး ဝၼ်းတီႈ 28/6/2023 ယၢမ်းၵၢင်ဝၼ်း သိုၵ်းမၢၼ်ႈ ယိုတ်းမိူင်း ပိၵ်ႉဢိုတ်းပႅတ်ႈ သဵၼ်ႈတၢင်း တီႈႁူဝ်တဵင်း ၼိူဝ် သဵၼ်ႈတၢင်းလူင် လၢႆးၶႃႈ – မိူင်းၼွင် တၢင်းၾၢႆႇဢွၵ်ႇဝဵင်း ၼႂ်းၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်း ၸၢၼ်း ႁၢမ်ႈၵူၼ်းမိူင်းၵႂႃႇမႃး ၵမ်ႉၼိုင်ႈ။

ၵူၼ်းပိုၼ်ႉတီႈ ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ – “ ပဵၼ်ယၢမ်းၵၢင်ဝၼ်း သိုၵ်းမၢၼ်ႈ ပိၵ်ႉတၢင်း တီႈႁူဝ်တဵင်း တၢင်းတေၶိုၼ်ႈၵႂႃႇဝၢၼ်ႈမၢၵ်ႇလၢင်း။ ၶဝ်ငိၼ်းၶၢဝ်ႇဝႃႈ သိုၵ်းၶူဝ်းၶဵဝ်ၶဝ်ႁွတ်ႈထိုင်ဝႆႉ တၢင်းၾၢႆႇဢွၵ်ႇဝၢၼ်ႈမၢၵ်ႇလၢင်းၼမ် ။ သိုၵ်းမၢၼ်ႈဢမ်ႇၶႂ်ႈပၼ်သိုၵ်းၶူဝ်းၶဵဝ် ၶၢမ်ႈမႃးတၢင်းလၢႆးၶႃႈ။ ၵူၺ်းၵႃႈ ၽိူဝ်ႇႁူႉဝႃႈသိုၵ်းၶူဝ်းၶဵဝ်မီးႁႅင်းယႂ်ႇ သိုၵ်းမၢၼ်ႈၸင်ႇတေထွႆၶိုၼ်း”- ဝႃႈၼႆ။

လိူဝ်ၼၼ်ႉ သဵၼ်ႈတၢင်းလၢႆးၶႃႈ – မိူင်းၵိုင် သၢႆၼၼ်ႉၵေႃႈ သိုၵ်းမၢၼ်ႈ ယိုတ်းမိူင်း ႁၢမ်ႈဢမ်ႇပၼ်ၵူၼ်းၵႂႃႇမႃး မိူဝ်ႈဝႃး ဝၼ်းတီႈ 28/6/2023 ယၢမ်းၵၢင်ၶမ်ႈၵၢင်ၶိုၼ်း ဝႃႈၼႆ။

ၵူၼ်းပိုၼ်ႉတီႈ ၽူႈယိင်း ဢႃယု 50 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ပဵၼ်တူဝ်သိုၵ်းမၢၼ်ႈ ၵေႃႉလၢတ်ႈတီႈၵူၼ်းဝၢၼ်ႈ တီႈ သဵၼ်ႈတၢင်းလၢႆးၶႃႈ – မိူင်းၵိုင် တီႈဝၢၼ်ႈၼွင်ပၢင်ႇၼၼ်ႉ ဢမ်ႇပၼ်ၽႂ်လတ်းၽၢၼ်ႇၵႂႃႇမႃးဝႃႈၼႆ။ ယွၼ်ႉ သင်လႄႈ ဢမ်ႇပၼ်ၵႂႃႇမႃးတႄႉ ႁဝ်းၶႃႈၵေႃႈ ဢမ်ႇႁူႉၶႃႈ။ ယၢမ်းလဵဝ် တီႈဝဵင်းလၢႆးၶႃႈၼႆႉ ပေႃးၵၢင်ၶမ်ႈၵၢင် ၶိုၼ်းၼႆႉ ၵူၼ်းမိူင်း ပေႃးယဵၼ်သီႇယဝ်ႉ ဢမ်ႇမီးၽႂ်ႁတ်းၵႂႃႇမႃးၵၼ်ယဝ်ႉ ၵူဝ်ၶႃႈဢေႃႈ”- ဝႃႈၼႆ။

ၼႂ်းၸႄႈဝဵင်းလၢႆးၶႃႈၼႆႉ မီးဝႆႉတပ်ႉသိုၵ်းမၢၼ်ႈ ယိုတ်းမိူင်း ပၵ်းဝႆႉ 2 တပ်ႉ တေပဵၼ်တပ်ႉ ၶလယ 64 တင်း ၶမယ 515 ။ တပ်ႉ ၼႆႉ ပၵ်းဝႆႉၼႂ်းၵႄႈလၢႆးၶႃႈ – မိူင်းၵိုင်။

“ယၢမ်းလဵဝ် ၼႂ်းတပ်ႉသိုၵ်းမၢၼ်ႈ တီႈဝဵင်းလၢႆးၶႃႈၼႆႉ မၼ်းဢမ်ႇမီးၵူၼ်းသိုၵ်းၼမ်ယဝ်ႉ။ မီးၼၢင်းယိင်းမေးၶဝ် ပႂ်ႉတပ်ႉၵူၺ်း။ သင်သိုၵ်းတႆး ႁူမ်ႈၵၼ် ၶဝ်ႈလူမ်ႇတႄႉ ၶဝ်ဢမ်ႇလူဝ်ႇယိုဝ်းယဝ်ႉ ပိူၼ်ႈတေယုၵ်ႉမိုဝ်းပၼ်ၶဝ်ယဝ်ႉ ဢၼ်ၼႆႉသမ်ႉ ဢမ်ႇၸႂ်ႈၸိူင်ႉ ၼႆ ႁဝ်းၼင်ႇၵၼ် သမ်ႉယိုဝ်းၵၼ်ၼႆႉ တႃႇၵူၼ်းမိူင်းတႆး တေလႆႈၸႂ်ယႂ်ႇတီႈၶဝ်ၼၼ်ႉ ဢမ်ႇမီးတၢင်းမၼ်းယဝ်ႉ”- ၵူၼ်းပိုၼ်ႉ တီႈ ဝဵင်းလၢႆးၶႃႈ သိုပ်ႇလၢတ်ႈၼႄၼင်ႇၼႆ။

ၶၢဝ်းတၢင်း 2-3 ဝၼ်းထပ်းၵၼ်မႃးၼႆႉ သိုၵ်းမၢၼ်ႈ ယိုတ်းမိူင်း ထႅမ်ႁႅင်းသိုၵ်း လုၵ်ႉတၢင်းၼမ်ႉၸၢင် – ၶူဝ်လမ် ၸိူဝ်း ၼႆႉမႃး တူင်ႉၼိုင် တၢင်းၾၢႆႇဢွၵ်ႇဝဵင်းလၢႆးၶႃႈၼႆႉထႅင်ႈၼမ် ယဝ်ႉၵေႃႈ ဢဝ်ၶိူင်ႈမိၼ် မႃးပၼ်ႇလဵပ်ႈႁႃ တပ်ႉ SSPP ၸိူဝ်းၼႆႉထႅင်ႈ။

ၼႂ်းလိူၼ်ၵျုၼ်ႊၼႆႉ တပ်ႉသိုၵ်းမၢၼ်ႈ ၸႂ်ႉ SSPP ထွႆဢွၵ်ႇၼႂ်းပိုၼ်ႉတီႈ ဝဵင်းလၢႆးၶႃႈၼႆႉ 2 ပွၵ်ႈယဝ်ႉ ၵူၺ်းၵႃႈ တင်း SSPP တႄႉ ဢမ်ႇယွမ်းထွႆ သင်သိုၵ်းမၢၼ်ႈ တိုၵ်ႉသိုပ်ႇဢိူမ်ႈၸမ်ယူႇၸိုင် သဵင်ၵွင်ႈၼႆႉ တေၸၢင်ႈတႅၵ်ႇဢမ်ႇႁၢၼ်ႉ ၽူႈတူင်ႉၼိုင် ၵၢၼ် သိုၵ်း တၢင်းပွတ်းလၢႆးၶႃႈလၢတ်ႈ။