ၵူၼ်းၸၢႆးၵေႃႉၼိုင်ႈ ၺႃးၽၼ်းတီႈၼိူဝ်တၢင်း ႁိမ်းပွၵ်ႉ 11 ၸႄႈဝဵင်းလႃႈသဵဝ်ႈ မၢတ်ႇၸဵပ်းႁၢဝ်ႈႁႅင်း။
မၼ်းၸၢႆးၺႃးၽၼ်း မိူဝ်ႈဝႃး ဝၼ်းတီႈ 21/6/2023 ယၢမ်းၵၢင်ၼႂ် 8 မူင်းၶိုင်ႈ မၢတ်ႇၸဵပ်းႁၢဝ်ႈႁႅင်း ထိုင်တီႈ လႆႈႁၢမ်သူင်ႇ ႁူင်းယႃ ။
ၽူႈတူင်ႉၼိုင်ႈ ၼႂ်းၸုမ်းၵူၼ်းၼုမ်ႇလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ ၸႂ်ႈဢေႃႈ ၵူၼ်းႁိမ်းႁွမ်း ထူဝ်း မႃးလၢတ်ႈလႄႈ ၸုမ်းႁဝ်း ၵႂႃႇဢဝ်သူင်ႇထိုင်ႁူင်းယႃၵူၺ်းဢေႃႈ ။ ၵွပ်ႈသင်လႄႈ ၺႃးၽၼ်းၼႆတႄႉဢမ်ႇႁူႉၸွမ်း ထိုင်မိူဝ်ႈလဵဝ် ပႆႇမီးပီႈၼွင်ႉမၼ်းၵေႃႉလႂ်ၵပ်းသိုပ်ႇမႃး ၾၢႆႇပလိၵ်ႈၶဝ် တိုၵ်ႉၸွပ်ႇတိုၵ်ႉလမ်းလွင်ႈပိူင်ပဵၼ်မၼ်း တေႉတေႉယူႇ ” – ဝႃႈၼႆ။
ၵေႃႉဢၼ်ၺႃးၽၼ်းၼႆႉ ဢႃယု မီး 40 ပီ ယူႇပွၵ်ႉ 9 တီႈတၢင်းၽႄၵႂႃႇဝၢၼ်ႈၶိူဝ်းၼိမ်း မိူဝ်ႈလဵဝ် ယူတ်းယႃတူဝ်ဝႆႉ ယူႇတီႈ ႁူင်းယႃလူင်ၸႄႈဝဵင်းလႃႈသဵဝ်ႈ ။
မိူဝ်ႈၼႆႉ ဝၼ်းတီႈ 22/6/2023 ၼႆႉၵေႃႈ ထူပ်းႁၼ်တူဝ်တၢႆၵူၼ်းၸၢႆးၵေႃႉၼိုင်ႈ တီႈတၢင်းၽႄၵႂႃႇတၢင်ႉယၢၼ်း ႁိမ်းဝၢၼ်ႈလွႆလွမ်ႉ ၸႄႈဝဵင်းလႃႈသဵဝ်ႈ။
မိူဝ်ႈလိူၼ်ပူၼ်ႉမႃးၼႆႉၵေႃႈ ထူပ်းႁၼ်တူဝ်တၢႆ ၵူၼ်းၸၢႆးၵေႃႉၼိုင်ႈ ၺႃးယိုဝ်းသေ ပႅတ်ႈဝႆႉႁိမ်းပႃႇႁဵဝ်ႈ (ငါးပါးသီလသင်္ချိုင်း) ၼႂ်းဢိူင်ႇၵွင်းၵႄး ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
