ၼႂ်းလိူၼ် ၵျုၼ်ႊၼႆႉ သိုၵ်းမၢၼ်ႈ တဵၵ်းၸႂ်ႉႁႂ်ႈၵူၼ်းမိူင်း ၼႂ်းဢိူင်ႇၶုမ်ႇၸူင် ၸႄႈဝဵင်းလႃႈသဵဝ်ႈ ပုတ်ႈၵၼ် တေႃႉၼမ်ႉသူင်ႇပၼ် တႃႇၸႂ်ႉသွႆလႄႈတႃႇၵိၼ် ၵူၼ်းမိူင်းႁူပ်ႉတင်းယၢပ်ႇၽိုတ်ႇ။
ၵူၼ်းၼႂ်းပိုၼ်ႉတီႈ ၼႂ်းၸႄႈဝဵင်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ – ” ၼိုင်ႈဝၼ်းလႂ် ၸႂ်ႉတေႃႉၼမ်ႉသူင်ႇ တႃႇထူဝ်ႈ ၼိုင်ႈလမ်း ။ ရူတ်ႉၶိူင်ႈၵေႃႈၶဝ်ၶႂ်ႈလႆႈ။ ၶဝ်လူဝ်ႇၵႂႃႇမႃးၼႆဝႃႇ။ သင်ႇမႃးဝႃႈ ပေႃးဢမ်ႇႁဵတ်းၸွမ်းဢမ်ႇလႆႈၼႆဢေႃႈ။ ၵူၼ်းဝၢၼ်ႈႁဝ်းၵေႃႈ ပၼ်ႇပုတ်ႈၵၼ်ႁေ လႆႈတဵၵ်းၼမ်ႉ ပၼ်ၶဝ်ၼၼ်ႉယဝ်ႉ ” – ဝႃႈၼႆ။
သိုၵ်းမၢၼ်ႈၼႆႉ ယွၼ်းပႃး ထူဝ်ႈလမ်းၼိုင်ႈ၊ ရူတ်ႉၶိူင်ႈၼိုင်ႈလမ်း ။ သမ်ႉယွၼ်းပႃးၵူၼ်းႁေႃႈထူဝ်ႈ ၵူၼ်းတၵ်းၼမ်ႉ ၸိူဝ်းၼႆႉပႃးလႄႈၵူၼ်းမိူင်းယၢပ်ႇၽိုတ်ႇ ၶၢတ်ႇၵၢၼ်ၶၢတ်ႇငၢၼ်းၼမ်။
ဢိင်ၼိူဝ်လွင်ႈၼႆႉ ၵူၼ်းၼႂ်းပိုၼ်ႉတီႈ ၸႄႈဝဵင်းလႃႈသဵဝ်ႈလၢတ်ႈတီႈၽူႈတွႆႇႁွၵ်ႈဝႃႈ – “ မိူဝ်ႈလဵဝ်သမ်ႉ ပဵၼ်ၶၢဝ်းႁဵတ်းၵၢၼ်ႁဵတ်းငၢၼ်းၶႃႈဢေႃႈ မၢင်ၸိူဝ်းလူဝ်ႇထႆၼႃး မၢင်ၸိူဝ်းလူဝ်ႇၵႂႃႇႁႆႈၵႂႃႇသူၼ် ။ မိူဝ်ႈလဵဝ်သမ်ႉလႆႈၵႂႃႇႁဵတ်းၸွမ်းၼင်ႇ ၶဝ်ၸႂ်ႉၸိူင်ႉၼႆ ယၢပ်ႇဢေႃႈ ။ ယဝ်ႉၵေႃႈ မိူၼ်ႁၢင်ႈ ဢမ်ႇမီးလွင်ႈ ႁူမ်ႇလူမ်ႈမႃးထႅင်ႈယဝ်ႉ ” – ဝႃႈၼႆ ။
ဢွင်ႈတီႈ ဢၼ်သိုၵ်းမၢၼ်ႈတူင်ႉၼိုင် ယူႇသဝ်းၸိူဝ်းၼႆႉ မိူၼ်ၼင်ႇ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းၼႆႉၵေႃႈ လတ်းၽၢၼ်ႇၵႂႃႇမႃးလႄႈ ၵူၼ်းမိူင်းမႆႈၸႂ် ၵူဝ်လႆႈၶမ် ၼႂ်းၵႄႈပၢင်တိုၵ်းထႅင်ႈ ။
မိူဝ်ႈပူၼ်ႉမႃး ဝၼ်းတီႈ 2/6/2023 ၼႆႉၵေႃႈ သိုၵ်းမၢၼ်ႈတင်း သိုၵ်းၵဝ်ႈၵၢင်ႉ MNDAA ပိုတ်းယိုဝ်းၵၼ်ႁၢဝ်ႈႁႅင်းသေ ၾၢႆႇသိုၵ်းမၢၼ်ႈလၢမ်းလိမ်းယိုဝ်းၵွင်ႈလူင်ၵွင်ႈဢွၼ်ႇၵႂႃႇၵူႈႁူးၵူႈတၢင်းလႄႈ ၵူၼ်းမိူင်းပိုၼ်ႉတီႈ လႆႈၶၢႆႉပၢႆႈဢွၵ်ႇတီႈယူႇတီႈသဝ်းတင်းၼမ်။
မိူဝ်ႈလဵဝ် ပဵၼ်ၶၢဝ်း ႁဵတ်းႁႆႈႁဵတ်းသူၼ်လႄႈ ယႃႇႁႂ်ႈပဵၼ်ပၢင်တိုၵ်းၸွမ်း ႁိမ်းဢိူင်ႇႁိမ်းဝၢၼ်ႈထႅင်ႈ ၵူၺ်းၼႆ ၵူၼ်းမိူင်းတုၵ်းယွၼ်း ၸုမ်းယိပ်းၵွင်ႈၵၢင်ႇၶဝ်ဝႆႉၼင်ႇၼႆ ။
