ထဝ်ႈယိင်းၵေႃႉၼိုင်ႈ ၵိုင်ႉၵၢင်ႉပိၼ်ႈလူမ်ႉတၢႆ ၽွင်းပႂ်ႉႁဵတ်းဝႂ်ၶၢမ်ႈလႅၼ်လိၼ်တီႈၶူဝ် တႃႈၶီႈလဵၵ်း-မႄႈသၢႆ ၸႄႈဝဵင်းတႃႈၶီႈလဵၵ်း။
မိူဝ်ႈၼႆႉ ဝၼ်းတီႈ 2/5/2023 ယၢမ်းၵၢင်ၼႂ် 9 မူင်း မႄႈပႃႈၵေႃႉၼိုင်ႈ လႄႈလုၵ်ႈယိင်းမၼ်း ၵႂႃႇႁဵတ်းဝႂ်ၶၢမ်ႈၶူဝ်လႅၼ်လိၼ် တႃႈၶီႈလဵၵ်း-မႄႈသၢႆ၊ ၽွင်းၼၼ်ႉၵေႃႉပဵၼ်မႄႈ မဝ်းလူမ်ႉသေ သဵင်ႈၸႂ်ၵႂႃႇပႃး၊ ၵူၼ်းႁိမ်းႁွမ်းတူၵ်းၸႂ်။
ၵေႃႉပဵၼ်လုၵ်ႈယိင်း လၢတ်ႈဝႃႈ – “ ႁႃးသွင်မႄႈလုၵ်ႈ တေဢၢၼ်းၵႂႃႇလႄႇ မႄႈသၢႆ ။ မႄႈႁဝ်းလၢတ်ႈဝႃႈ ႁူဝ်မဝ်းၼႆႁေ ၵိုင်ႉၵၢင်ႉပိၼ်ႈလူမ်ႉၵႂႃႇၶႃႈဢေႃႈ။ မႅၼ်ႈၽွင်းတိုၵ်ႉႁဵတ်းဝတ်းဝႂ်ၶၢမ်ႈၶူဝ်ယူႇ။ လူမ်ႉႁေၵေႃႈ ဢဝ်ၸႂ်သဵင်ႈၵႂႃႇၸွမ်းဢေႃႈ။ ၵိုင်ႉၵၢင်ႉၼႃႇၶႃႈ။ မႄႈႁဝ်း မီးရေႃးၵႃႇ လိူတ်ႈၶိုၼ်ႈ ဢေႃႈ” – ဝႃႈၼႆ။
ၸူဝ်ႈသိုၵ်းမၢၼ်ႈလႄႈ လူင်ပွင်ၸိုင်ႈမိူင်းထႆး ၽွမ်ႉၸႂ်ၵၼ်ပိုတ်ႇၶူဝ်တႃႈၶီႈလဵၵ်း မႄႈသၢႆမႃးၶၢဝ်းတၢင်း 2-3 လိူၼ်မႃးၼႆႉ ၵူၼ်းမိူင်း သွင်ၾင်ႇ ၶဝ်ႈထႅဝ်ႁဵတ်းဝႂ်ၶၢမ်ႈလႅၼ်လိၼ် – ၶဝ်ႈဢွၵ်ႇၵႂႃႇမႃးသိုဝ်ႉၶၢႆၵၼ်မီးၵူႈဝၼ်း။ ၼိုင်ႈဝၼ်း ႁူဝ်ၼပ်ႉၵူၼ်းမီးမွၵ်ႈ 1000 ။ လႆႈပၼ်ၶၢဝ်းယၢမ်းတႃႇႁဵတ်းဝႂ်ၶၢမ်ႈလႅၼ်လိၼ်။ပေႃးပဵၼ်ၼၢင်းယိင်းလႄႈၵူၼ်းထဝ်ႈ ၵႆႉပဵၼ်မဝ်းလူမ်ႉ။
ထဝ်ႈယိင်းၵေႃႉဢၼ်လူႉတၢႆၵႂႃႇၼႆႉ ၸိုဝ်ႈ ၶိၼ်ႇမႃႇယီႇ ဢႃယု 57 ပီ ယူႇ ဝၢၼ်ႈလွႆတေႃႇၶမ်း ၸႄႈဝဵင်းတႃႈၶီႈလဵၵ်း ။ မိူဝ်ႈလဵဝ် ဢဝ်တူဝ်တၢႆမၼ်းၼၢင်းၵႂႃႇၵူတ်ႇထတ်းတီႈႁူင်းယႃ ၊ မေႃယႃယိုၼ်ယၼ်လၢတ်ႈဝႃႈ တၢႆယွၼ်ႉ သဵၼ်ႈလိူတ်ႈဢွၵ်းဢေႃၶၢတ်ႇ ဝႃႈၼႆ။
ၼႂ်းလိူၼ်ဢေႊပရိူဝ်ႊလႄႈလိူၼ်မေႊ ပီၼႆႉ လူမ်းမႆႈလိူဝ်ႁႅင်း။ ၵူၼ်းပဵၼ်/တၢႆယွၼ်ႉလူမ်းမႆႈၵေႃႈၶႂ်ႈဝႃႈမီးၵူႈဝဵင်း ။
မိူဝ်ႈဝၼ်းတီႈ 28/4/2023 ၼၼ်ႉၵေႃႈ ၵူၼ်းၸၢႆးၵေႃႉၼိုင်ႈၸႄႈဝဵင်းတႃႈၶီႈလဵၵ်း မႆႈၼႃႇၼႆသေ ပိုတ်ႇၽတ်ႉလူမ်းသႂ်ႇတူဝ်သေၼွၼ်းတင်းၶိုၼ်း ထိုင်မိူင်းလႅင်းမႃး သဵၼ်ႈလိူတ်ႈဢွၵ်းဢေႃတႅၵ်ႇသေတၢႆၵေႃႈမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ