တႄႇဢဝ် ႁူဝ်လိူၼ် ဢေႊပရိူဝ်ႊမႃး ၽူႈမီးၸၼ်ႉသိုၵ်းမၢၼ်ႈ ၼႂ်းတိူင်းသိုၵ်းသၢမ်ၸဵင်ႇၵဵင်းတုင် ဢဝ်ၸၢၵ်ႈမႃးလုတ်ႇလၢင်ႉ ႁဵတ်းလွင်ႈမူတ်းသႂ် ၼမ်ႉၼွင်တုင် ဢၼ်မီးၼႂ်းၵၢင်ဝဵင်းၵဵင်းတုင် ။

ၵူၼ်းၵဵင်းတုင် ၼၢင်းယိင်းဢႃယု 50 ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ- “ ၸႂ်ႈယဝ်ႉဝႃႈ ၶဝ်ႈႁဵတ်းမႃး ၸဵမ်မိူဝ်ႈ ႁူဝ်လိူၼ်ၼႆႉၼေႈ။ ဢမ်ႇယၢမ်ႈႁၼ်ၶဝ်ဢဝ်ၶိူင်ႈၸၢၵ်ႈလူင်ၸိူင်ႉၼႆမႃးလုတ်ႇဢွၵ်ႇသေပွၵ်ႈ။ၵူႈပွၵ်ႈတႄႉ ၶဝ်ဢဝ် ၵႃးၾၢႆႇလိူမ်ႈလႆႇၶဝ်မႃးၽဵဝ်ႈဢဝ်ယုၵ်းယၢၵ်းမၼ်းၵႂႃႇႁဵတ်းၼႆၵွႆး။ မိူဝ်ႈလဵဝ်တႄႉ လုတ်ႇ ဢုင်၊ သၢႆး ဢွၵ်ႇႁေ ၶိုၼ်းၵႂႃႇတဵၵ်းၼမ်ႉတီႈၼမ်ႉၵဵင်းၽွင်းပုၼ်ႉမႃးသႂ်ႇ ၼႆၼေႈ ။ႁဵတ်းႁႂ်ႈၼမ်ႉသႂ်ၶိုၼ်းၼႆဝႃႈ။ ၶဝ်တေႁဵတ်းသင်တႄႉတႄႉဢမ်ႇႁူႉ ။ ဢမ်ႇၼၼ်ဢၼ်ၶၢဝ်ႇလိုဝ်းဝႃႈ တေဢဝ်ႁိူဝ်းသၢင်းၽေႃးမႃးဝႆႉသေ တေပိုတ်ႇသႅင်ႇတၢင်းၵိၼ် ဢၼ်ဝႃႈၼၼ်ႉႁိုဝ် ” – ဝႃႈၼႆ။

ၼွင်တုင်ၵၢင်ဝဵင်းၼႆႉ ၵူႈပီပူၼ်ႉမႃး ပေႃးထိုင် လိူၼ်ႁႃႈလိူၼ်ႁူၵ်းၼႆ ပႃၼႂ်းၼွင် ၵႆႉတၢႆ။ ႁဵတ်းႁႂ်ႈၼမ်ႉတူႇၼဝ်ႈ ၵူၼ်းမိူင်းၸိူဝ်းယူႇႁိမ်းႁွမ်းၼၼ်ႉ ဢမ်ႇလႆႈလူမ်းၸိုၼ်ႈသႂ် ။

ၵူၼ်းၵဵင်းတုင်ၼၢင်းယိင်းဢႃယု 50 ၵေႃႉၼိုင်ႈသိုပ်ႇလၢတ်ႈဝႃႈ-   “  ပေႃးဝၢႆးသၢင်းၵျၢၼ်ႇၼႆပဵၼ်ၵူႈပီယဝ်ႉ ပႃၼႂ်း ၼွင်တုင် တၢႆပေႃးၽိူၵ်ႇပေႃးၶၢဝ်ၵႂႃႇမူတ်း။ၵူၺ်းၼႃႇ ပီၼႆႉတႄႉ ပႃၵေႃႈပႆႇႁၼ်တၢႆ ၼင်ႇၵဝ်ႇ။ ၶဝ်သမ်ႉမႃး ၽဵဝ်ႈ လၢင်းၼွင်ပဵၼ်တေႉပဵၼ်ဝႃႈၼေႈ။ သဵၼ်ႈတၢင်းလဵပ်ႈၼွင်တုင်ၸိူဝ်းၼႆႉၵေႃႈၶဝ်မႄး ။ ယဝ်ႉၵေႃႈ တီႈတၢင်းၼႃႈ ႁိူၼ်းႁဝ်းၸိူဝ်းၼႆႉ ၶဝ်မႃးသိူဝ်ႇပႃးမူတ်းဢေႃႈ  ။ ႁဝ်းယူႇၸမ်ၼွင်တုင်ၶႃႈၼႃႇ”-  ဝႃႈၼႆ။

သိုၵ်းမၢၼ်ႈႁဵတ်းလွင်ႈပႅၵ်ႇလၢၵ်ႇၸိူင်ႉၼႆ ယွၼ်ႉသင်ၼႆတႄႉၵူၼ်းမိူင်းဢမ်ႇပွင်ႇၸႂ်။ ၵူၺ်းၵႃႈ ႁၢင်လိူၼ်မၢတ်ႉၶျ် ၸွမ်ႁၢၼ် ၼႂ်းတပ်ႉတိူင်းသၢမ်ၸဵင်ႇၵဵင်းတုင်ၵေႃႉၼိုင်ႈႁူမ်ႈလၢႆလၢႆႁွင်ႈၵၢၼ်သေ ၶဝ်ႈၵူတ်ႇထတ်း  ႁေႃၵဵင်းတုင် ဢၼ်တိုၵ်ႉသၢင်ႈမႂ်ႇၼၼ်ႉသေယဝ်ႉ ၸိသင်ႇႁႂ်ႈႁဵတ်းပႃးလွင်ႈမူတ်းသႂ်ၼွင်တုင်ၼၼ်ႉထႅင်ႈ။ ၵူၼ်းပိုၼ်ႉတီႈဝႃႈ တေပဵၼ်ယွၼ်ႉဝႃႈသၢင်ႈႁေႃမႂ်ႇ ၸမ်တေယဝ်ႉတူဝ်ႈယဝ်ႉလႄႈႁိုဝ်ၼႆယူႇ။

ၵူၼ်းၼုမ်ႇၼႂ်းဝဵင်းၵဵင်းတုင်ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“  ဢၼ်ၶဝ်လုတ်ႇဢုင်ၼႂ်းၼွင်ဢွၵ်ႇၼၼ်ႉလႆႈ ငိၼ်းဝႃႈ ၶဝ်လႆႈၸၢင်ႈ ၼိုင်ႈၸူဝ်ႈမူင်းလႂ် 7 သႅၼ် ၼႆဢေႃႈ။ၼိုင်ႈဝၼ်းလႂ် 10 ၸူဝ်ႈမူင်းၼႆဝႃႈ တေႁဵတ်းတႃႇ ၶၢဝ်းတၢင်း 3 လိူၼ်ၼႆဢေႃႈ။ လီဝႃႈတႄႉ ၶဝ်လီပၼ်တၢင်းႁူႉၵူၼ်းမိူင်းႁႂ်ႈမေႃဝႆႉ ၵႃႈၶၼ်ၼမ်ႉၼွင် ၊ ႁႂ်ႈႁၵ်ႉသႃ လွင်ႈမူတ်းသႂ်ၼႆႉဢွၼ်တၢင်းဢေႃႈ။   ၼႆႉသမ်ႉ ပေႃးၽဵဝ်ႈယဝ်ႉၵေႃႈ ၼမ်ႉတူႇၼမ်ႉၼဝ်ႈၵူၼ်းမိူင်းသမ်ႉ တိုၵ်ႉလႆ ၶဝ်ႈယူႇႁဵတ်းၼႆတႄႉ မိူၼ်တင်းၶဝ် ၽျုင်း(မူၺ်ႇ) ၽၼ်ႇတႃႇငိုၼ်းတွင်းၵူၺ်းယဝ်ႉ။ ငိုၼ်းၸိူဝ်းၼႆႉၵေႃႈ မၼ်းၵေႃႈလႆႈမႃးတီႈၵူၼ်းမိူင်းၵူၺ်းၼင်ႇၵဝ်ႇလူး ” – ဝႃႈၼႆ။

ၼွင်တုင်ၼႆႉ မီးဝႆႉၼႂ်းၵၢင်ဝဵင်းၵဵင်းတုင်သေ ပဵၼ်တီႈၸၼ်ၸႂ် ၵူၼ်းၼွၵ်ႈမိူင်းၼႂ်းမိူင်း မႃးဢႅဝ်ႇယဵမ်ႈတွင်ႈတဵဝ်း။ တၢင်းၵႂၢင်ႈၼမ်ႉၼွင် မီး 35 ဢေႊၶိူဝ်ႊ။ ပဵၼ်ၼွင်ဢၼ်ၵိုၵ်းပိုၼ်းမိူင်းၵဵင်းတုင်မႃး ၸဵမ်မိူဝ်ႈၵေႃႇတႄႇမိူင်းၵဵင်းတုင်လႄႈ ၼင်ႇႁိုဝ်တေဢမ်ႇလူႉဢမ်ႇႁၢႆၼၼ်ႉၵူၼ်းမိူင်း ၵူၼ်းၼုမ်ႇၵဵင်းတုင်ထုၵ်ႇလီႁၵ်ႉသႃလုမ်းလႃးလီလီ – ထဝ်ႈဝၢၼ်ႈထဝ်ႈမိူင်းၵဵင်းတုင်တႄႉလၢတ်ႈၼင်ႇၼႆ။