ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆးၶွပ်ႈတဵမ် 76 ပီ ဢၼ်ၸတ်းႁဵတ်းတီႈ ငဝ်ႈငုၼ်းလွႆတႆးလႅင်း ပီၼႆႉ ၵူၼ်းမိူင်းတႆးပတ်းပိုၼ်ႉ ႁၢင်ႈႁႅၼ်းတႃႇၵႂႃႇၶဝ်ႈႁူမ်ႈၼမ်ယူႇသေတႃႉ ၵွၼ်ႇပဵၼ်ပွႆး ဝၼ်းသွင်ဝၼ်း ၽူႈၵွၼ်းတိူင်းသိုၵ်း ၶူဝ်လမ် လၢတ်ႈဝႃႈ ဢမ်ႇၶႂ်ႈႁၼ်ၵူၼ်းမိူင်းတႆးလႆၶိုၼ်ႈလွႆတႆးလႅင်းၼႆလႄႈ ၵူၼ်းမိူင်းမႆႈၸႂ်လွင်ႈႁူမ်ႇလူမ်ႈၶၢဝ်းတၢင်းလႄႈ ပွႆးဢမ်ႇပေႃးၵိုၼ်း ဝႃႈၼႆ။

ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 76 ပီၼႆႉ RCSS လႄႈၵူၼ်းမိူင်းပၼ်ႇ ႁၢင်ႈႁႅၼ်းတေၸတ်းပၢင်ပွႆး ယႂ်ႇလူင်တီႈဝဵင်းပၼ်ႇသေတႃႉ ၽိူဝ်ႇထိုင်ႁၢင်လိူၼ် ၵျႅၼ်ႊၼိဝ်ႊရီႊမႃး ၽူႈၵွၼ်းတိူင်းသိုၵ်းၶူဝ်လမ်လႄႈ သိုၵ်းမၢၼ်ႈတိူင်းသိုၵ်း ယပၶ ၸီႉသင်ႇႁၢမ်ႈ၊ ထိုင်တီႈလႆႈၶၢႆႉၵႂႃႇၸတ်းတီႈငဝ်ႈငုၼ်းလွႆတႆးလႅင်း ၼႂ်းဝၼ်းတီႈ 4-7/02/2023 ။

ဝၢႆးလင်ၽႅၼ်ၵၢၼ်လႅၵ်ႈလၢႆႈတေၵႂႃႇၸတ်းတီႈလွႆတႆးလႅင်းယဝ်ႉ ၸွမ်ႁၢၼ်ၸေႃႇၸေႃႇၼႅင်ႇ ၽူႈၵွၼ်းတိူင်းသိုၵ်းမၢၼ်ႈ ဝၼ်းဢွၵ်ႇၵၢင် ယလၶ ၶူဝ်လမ် ၶိုၼ်းၵပ်းသိုပ်ႇၸူးတီႈၸဝ်ႈၼႃႈတီႈ RCSS/SSA ၼႂ်းၸႄႈဝဵင်းမိူင်းပၼ်ႇသေလၢတ်ႈဝႃႈ ဢမ်ႇၶႂ်ႈႁၼ်ရူတ်ႉၵႃး ၵူၼ်းမိူင်းတႆး လႆၶိုၼ်ႈလွႆတႆးလႅင်း ၶဝ်ႈပွႆးဝၼ်းၸိူဝ်ႉၸၢတ်ႈၸိုင်ႈတႆး -ၼႆလႄႈ ႁဵတ်းႁႂ်ႈၵူၼ်းမိူင်းတႆး ပွတ်း ၸၢၼ်း – ပွတ်းႁွင်ႇ ဢမ်ႇႁတ်းၵႂႃႇၶဝ်ႈႁူမ်ႈ ၼႆယဝ်ႉ။

ၵူၼ်းၸမ်ၸႂ်တင်းၸဝ်ႈၼႃႈတီႈ RCSS ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –“ပဵၼ်ၶိင်း (တၢႆးမူး) ၽူႈၵွၼ်းတိူင်းသိုၵ်းၶူဝ်လမ်ၼႆႉယဝ်ႉလၢတ်ႈ။ မၼ်းဝႃႈ ၵဝ်ဢမ်ႇၶႂ်ႈႁၼ်ရူတ်ႉၵႃး၊ ၵူၼ်းၵႂႃႇပွႆးတီႈလွႆတႆးလႅင်း တႄႇဢဝ် ဝၼ်းတီႈ 3-7 ၼႆဝႃႇ။ ၵွပ်ႈၼႆလႄႈ ပီၼႆႉ ၵူၼ်းမိူင်းတႆး ပွတ်းၸၢၼ်း – ပွတ်းႁွင်ႇ ပိူၼ်ႈၵေႃႈတေႁူႉလွင်ႈၼႆႉသေလႄႈ ဢမ်ႇပေႃးႁတ်းၵႂႃႇၶဝ်ႈႁူမ်ႈပၢင်ပွႆး တီႈငဝ်ႈငုၼ်း။ ၵူႈပီ ပေႃးထိုင်ၶၢဝ်းပွႆးၼႆ ၵူၼ်းမိူင်းတႆး ပတ်းပိုၼ်ႉမႃးၶဝ်ႈႁူမ်ႈ ၵိုၼ်းၶွၼ်ႈ ”- ဝႃႈၼႆ။

ၵူၼ်းမိူင်းတႆးဢၼ်ၵႂႃႇၶဝ်ႈႁူမ်ႈပၢင်ပွႆးတီႈလွႆတႆးလႅင်း ၵမ်ႈၼမ် တေၵႂႃႇတၢင်းၼမ်ႉၸၢင် – မိူင်းၼၢႆး – လၢင်းၶိူဝ်း – ၶၢမ်ႈတႃႈသူပ်းတဵင်း – ႁူဝ်မိူင်း သေ ၶိုၼ်ႈၸူးလွႆတႆးလႅင်း။ သဵၼ်ႈတၢင်းၼၼ်ႉသမ်ႉ ပဵၼ်ၼႂ်းပိုၼ်ႉတီႈ တိူင်းသိုၵ်းၶူဝ်လမ် ယလၶ တူင်ႉၼိုင်ဝႆႉ ။

ၸွမ်ႁၢၼ် ၸေႃႇၸေႃႇၼႅင်ႇ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် ယလၶ ၶူဝ်လမ်ၼႆႉ ၶိုၼ်ႈမႃးတႅၼ်းတီႈ ၸွမ်သိုၵ်း တၢၼ်းလႅင်ႇ မိူဝ်ႈဝၼ်းတီႈ 2/2/2021 ဝၢႆးသိုၵ်းမၢၼ်ႈ ယိုတ်းမိူင်း 1 ဝၼ်း ။

ၵူၺ်းၵႃႈ ၽူႈၵွၼ်းတိူင်းသိုၵ်း ယလၶ သင်ႇႁၢမ်ႈၸိူင်ႉၼၼ်ယူႇသေတႃႉ တီႈပၢင်ပွႆးဝၼ်းၸိူဝ်ႉၸၢတ်ႈ ၸိုင်ႈတႆး ၶွပ်ႈတဵမ် 76 ပီ တီႈငဝ်ႈၸိုင်ႈလွႆတႆးလႅင်းၼႆႉတႄႉ ၽူႈၼမ်းသိုၵ်းမၢၼ်ႈ ၵႂႃႇၶဝ်ႈႁူမ်ႈ 3 ၵေႃႉ။ ပဵၼ်ၸွမ်သိုၵ်းဢေးဝိၼ်း ဢွၼ်ႁူဝ်၊ ပႃးတင်းၵႅမ်ၽူႈၵွၼ်းတိူင်းသၢမ်ၸဵင်ႇ ၵဵင်းတုင်လႄႈ ၵႅမ် ၽူႈၵွၼ်းတိူင်း ယလၶ ၶူဝ်လမ် ၸိူဝ်းၼႆႉလူးၵွၼ်ႇ-ဝႃႈၼႆ။

ယၢမ်းလဵဝ် ၸွမ်သိုၵ်း တၢၼ်းလႅင်ႇ ၽူႈၵွၼ်းတိူင်းသိုၵ်းၶူဝ်လမ် ၵေႃႉၵဝ်ႇၼၼ်ႉ လႆႈၶိုၼ်ႈတၼ်းႁဵင်း ၵႂႃႇပဵၼ် ၵႅမ်ၽွင်းလူင် ႁွင်ႈၵၢၼ်ၽွင်းလူင်ၾၢႆႇၼႂ်းမိူင်းလႄႈ ၽူႈ ၵွၼ်းတပ်ႉပလိၵ်ႈၸိုင်ႈမိူင်း။

RCSS/SSA ၼႆႉ လူင်းလၢႆးမိုဝ်းၵိုတ်းတိုၵ်း ဝႆႉတင်းလူင်ပွင်ၸိုင်ႈမၢၼ်ႈပၢၼ်တဵင်းၸဵင်ႇသေ ၶဝ်ႈပႃးၼႂ်းၶၵ်ႉၵၢၼ်လွင်ႈငမ်းယဵၼ်မႃးတႃႇသေႇ။