“ႁူင်းႁဵၼ်းဢွၼ်ႇ ႁူင်းႁဵၼ်းဢွၼ်ႇမီးလင်လဵဝ် မီးႁိမ်းပႃႇမႆ့ၶဵဝ်…”သဵင်ႁွင့်ဝွၵ်းၵႂၢမ်းဢွၼ်ႇ လင်မေႃးမႃးတီႈ ၸလွပ်ႈ(သႃလႃး) ဢၼ်မီးယူႇၼႂ်းၵႄႈလွႆတီႈၼိုင်ႈၼၼ့်။

ၸိူင်းႁူဝ်ၼႆ့ ၵမ်းဢွၼ်တၢင်းသုတ်း လႆႈငိၼ်းသဵင်ဝွၵ်းလုၵ်ႈဢွၼ်ႇဢွၵ်ႇမႃးလႄႈ ၼႂ်းၸႂ်ႁပ့်ႁူႉလႆႈဝႃႈ လုၵ်ႈဢွၼ်ႇတႆး လႆႈသွၼ်ႁဵၼ်းလိၵ်ႈတႆး…  လွင်ႈၼႆ့ယဝ့် ၸၼ်ၸႂ်ၶႂ်ႈတူၺ်းၸိူင်းတေႃႇပေႃးသုတ်း။

ၼႂ်းၸိူင်းႁူဝ်ၼႆ့  ၼႄၾၢင်ႁၢင်ႈ ၵူၼ်းမိူင်းတႆး ၺႃးတဵၵ်းတဵင်ပေႉၵိၼ်ၽွင်းပၢၼ်ပီ 1990 ၼၼ့်သေ လႆႈႁၼ်ဝႃႈတေႃႇထိုင်ယၢမ်းလဵဝ် သိုၵ်းမၢၼ်ႈပေ့ၵိၼ်လူလၢႆၵူၼ်းမိူင်း ဢမ်ႇထၢတ်ႇဢမ်ႇဝၢႆး။

ဢၼ်ထၢင်ႇၸႅင်ႈလႄႈ ဢၼ်လီတိူဝ့်ဢူၵ်းထိုင်ၸႂ်သေပိူၼ်ႈၼႂ်းၸိူင်းၼႆ့တႄ့ 1.ဢၼ်သိုၵ်းမၢၼ်ႈ ပႂ်ႉႁႄ့တၢင်း ၵူၼ်းဝၢၼ်ႈၸဝ်ႈလေႃႉသွင်ၵေႃ့ၽူဝ်မေးၶီႇလေႃ့မႃးၼၼ့်သေ ထၢမ်တႂ်ႈထၢမ်ၼိူဝ်ယဝ့် ယိုဝ်းပႅတ်ႈၼၢင်းယိင်းတၢႆထင်တီႈ 2.သိုၵ်းမၢၼ်ႈယိုဝ်းၵွင်ႈလွၵ်ႇငိုတ်ႈ ၵူၼ်းမႃးသိုဝ့်မႃးၶၢႆၼႂ်းၵၢတ်ႇႁႂ်ႈတိုၼ်ႇသၢၼ်ႈၵူဝ်ႁႄ 3.ထၢင်ႇထိူမ်ဢၼ်ၼၼ့်ဢၼ်ၼႃႈသေ တိၺွပ်းပူႇၵၢင့်ပူႇၵႄႇၼႂ်းပွၵ့်ၼႂ်းဢိူင်ႇ 4. ၵၼ့်ၸၼ်လူလၢႆၸိူဝ်းပဵၼ် မေႃသွၼ် လႄႈၼၢင်းယိင်းဢွၼ်ႇၼႂ်းဝၢၼ်ႈၼႂ်းသူၼ် ၸဵမ်ၸိူဝ်းၼႆ့။

ၽူႈၸတ်းၸိူင်း(Director) ထႅမ်ၶိူဝ်းလၢတ်ႈၽူႈတွႆႇႁွၵ်ႈဝႃႈ- “ ၸိူင်းငဝ်းတူင့်ဢၼ်လႆႈၼပ့်ယမ် ၸွမ်ပိဝ်တႆးဢွၼ်တၢင်းသေ ၸင်ႇတူၺ်းလႆႈၼၼ့် တေပဵၼ်ၸိူင်းႁူဝ်ၼႆ့ ဢွၼ်တၢင်းသုတ်းၼႆ-  တေႃႈၼင်ႇၼႂ်းၾၼ်ၵေႃႈ ၶႃႈဢမ်ႇတွၼ့်ယၢမ်ႈၾၼ်မႃးသေပွၵ်ႈ” – ဝႃႈၼႆ။

တႃႇတေပဵၼ်မႃးၸိူင်း The Teacher & The School ၼႆ့ လုၵ်ႈႁဵၼ်းၸိူဝ်းလဵပ်ႈႁဵၼ်းငဝ်းတူင့်ၶဝ် ဢွၼ်ၵၼ်ၶူင်သၢင်ႈပေႃ့ၸိူင်းမႃးႁင်းၵူၺ်း။ၽူႈဢွၼ်ႁူဝ်တႄ့ ပဵၼ် ၵူၼ်းၼုမ်ႇတႆးတရႅၵ်ႊထိူဝ်ႊ ၸၢႆးထႅမ်ၶိူဝ်း။လႆႈဝႃႈ ၽူႈဢွၼ်ႁူဝ်ၵေႃႈၸႂ်ႈ မေႃသွၼ်ငဝ်းတူင့်ၵေႃႈပဵၼ်။

ၽူႈၸတ်းၸိူင်း(Director) ထႅမ်ၶိူဝ်း လၢတ်ႈဝႃႈ- “ ႁဝ်းၶႃႈ လႆႈဢဝ်ၶၢဝ်းယၢမ်းတႃႇလဵပ်ႈႁဵၼ်းလိၵ်ႈၵဵဝ်ႇၵပ်းငဝ်းတူင့် လႄႈၽိုၵ်းတူဝ်ထူပ်း မွၵ်ႈ 4 လိူၼ်ၼႆ့ဢေႃႈ။ဢၼ်လုၵ်ႈႁဵၼ်းၶဝ် လႆႈၼႄႁၢင်ႈငဝ်းတူင့်ၸိူဝ်းၼႆ့မႃးၵေႃႈ ဢိင်ၼိူဝ်လွင်ႈပိူင်ပဵၼ်တႄ့မၼ်းသေ ႁဵတ်းဢွၵ်ႇၵူၺ်းဢေႃႈ” – ဝႃႈၼႆ။

ၸိူင်းႁူဝ်ၼႆ့ တႃႇၵူႈၸၢဝ်းၶိူဝ်းတေတူၺ်းသေႁူႉပွင်ႇလႆႈၼၼ့် လႆႈတႅမ်ႈလိၵ်ႈဢိင်းၵလဵတ်ႈသႂ်ႇဝႆႉပႃး Sub-title ။ ၶၢဝ်းယၢမ်းၸိူင်းႁိုင်မွၵ်ႈ 30 မိၼိတ့်။ ၼႂ်းၶၢဝ်းယၢမ်းပွတ်း ဢွၼ်ႇၼႆႉၵူၺ်းသေတႃ့ ၼႄပၼ်လွင်ႈဢၼ်ဝႃႈ သိုၵ်းမၢၼ်ႈမိူၵ်ႈမႂ်ႈထိုင်တီႈထိုင်လႅၼ်။

ယူႇတီႈၵူၼ်းတူၺ်းၸိူင်း The teacher & The School ၼႆ့ၵေႃ့ၼိုင်ႈသေ ၶႂ်ႈလၢတ်ႈဝႃႈ ၸိူင်းႁူဝ်ၼႆ့ ဢမ်ႇၸႂ်ႈတႃႇတႆးၵူၺ်း တၢင်ႇၸၢဝ်းၶိူဝ်းဢၼ်ယၢမ်ႈၺႃးမႃးၸိူင့်ၼႆၵေႃႈ တိုၼ်းတေမီးယဝ့်။ယွၼ့်ၼၼ် တၢင်ႇၸၢဝ်းၶိူဝ်းၵေႃႈ ၶႂ်ႈႁႂ်ႈႁူႉႁၼ်ၸွမ်း။

ၸိူင်းႁူဝ်ၼႆ့ တေလႆႈႁၼ်ဝႃႈ မၼ်းဢိင်ၼိူဝ်ပိူင်ပဵၼ် လွင်ႈတေ့ တႄႇမိူဝ်ႈ ပီ 1990 ၼၼ့်မႃးသေ သိုၵ်းမၢၼ်ႈမိူၵ်ႈလိူင်းတေႃႇၵူၼ်းမိူင်းတႆးမႃးၶၢဝ်းယၢဝ်း။လွၼ့်ၵႅၼ်ၸိူင်းႁူဝ်ၼႆ့တႄ့ၵေႃႈ မၼ်းၼႄဝႃႈ မိူဝ်ႈပၢၼ် တႅပ်း 4 တႅပ်းၼၼ့် သိုၵ်းမၢၼ်ႈမိူၵ်ႈမႂ်ႈ  ႁႄ့ႁၢမ်ႈ ၵၢၼ်သွၼ်လိၵ်ႈတႆးၼႂ်းမိူင်းတႆးပတ်းပိုၼ့်။

ထႅင်ႈလွင်ႈၼိုင်ႈ ၸိူင်းႁူဝ်ၼႆ့ 1.ဢဝ်ၾၢင်ႁၢင်ႈတၢင်းႁၵ့်မေႃသွၼ်လႄႈ မေႃယႃတႄႇငဝ်ႈၸိူင်းဝႆ့ 2.ၸဝ်ႈႁႆႈၸဝ်ႈၼႃးၼႂ်းမိူင်းတႆး ယဵပ်ႇၺႃးမၢၵ်ႇမႅင်းဢၼ်သိုၵ်းမၢၼ်ႈႁၢင်ႈၵၢင်ဝႆ့ၼၼ့်သေ လူ့သုမ်းသၢႆၸႂ် 3.ၼၢင်းယိင်းတႆး ၺႃးသိုၵ်းမၢၼ်ႈမိူၵ်ႈၵၼ့်ၸၼ်လူလၢႆဢဝ်တၢႆ ၸဵမ်ၸိူဝ်းၼႆ့သေ လွင်ႈလီထိုင်ဢူၵ်းထိုင်ၸႂ်မီးတင်းၼမ်။

ၽူႈၸတ်းၸိူင်း(Director) ထႅမ်ၶိူဝ်း သိုပ်ႇလၢတ်ႈဝႃႈ-“ ၸိူင်းၼႆ့ ဢိင်ၼိူဝ် ပိူင်ပဵၼ် တႅပ်း 4 တႅပ်း သေ ပေႃ့မႃး။ၶၢဝ်းယၢမ်းပေႃ့ငဝ်းတူင့် မီးမွၵ်ႈ 10 ဝၼ်း။ၸိူင်းႁူဝ်ၼႆ့ တၢင်းႁိုင် မီး 30 မိၼိတ့်ဢေႃႈ”- ဝႃႈၼႆ။

ၸိူင်း(ငဝ်းတူင့်)ႁူဝ်ၼႆ့ လႆႈႁၼ် ပေႃ့ထႆႇဝႆ့တီႈ ၼႃႈလိၼ်ၶိုၵ့်တွၼ်းတီႈၼိုင်ႈၼႂ်းမိူင်းတႆး။

ၼင်ႇႁိုဝ် ၸိူင်းႁူဝ်ၼႆ့ ပေႃးတေမီးတိုဝ့်တၢင်း လႆႈပိုတ်ႇၼႂ်းႁူင်းၼင်လူင် တီႈမိူင်းၸိုင်ႈထႆး လႄႈ မိူင်းၵျႃႇပၢၼ်ႇလႆႈထႅင်ႈၼၼ့်ၵေႃႈ တေၶတ်းၸႂ်ထႅင်ႈ ၽူႈၸတ်းၸိူင်း(Director)ၸၢႆးထႅမ်ၶိူဝ်း လၢတ်ႈၼင်ႇၼႆ။

တွၼ်ႈတႃႇၵူၼ်းမိူင်းတႆးလႄႈ ၼႂ်းမိူင်းႁူမ်ႈတုမ်တႄႉ တဵၵ်းလိင်ႉ https://t.me/TheTeacherAndTheSchool ၼႆႉသေ သိုဝ်ႉတူၺ်းလႆႈယူႇ။ ငိုၼ်းၵွင်ၵၢင်တၢင်းမူတ်း တေၶိုၼ်းဢဝ်ႁဵတ်းငိုၼ်းတိုၼ်းတႃႇႁႂ်ႈလုၵ်ႈႁဵၼ်းလႆႈသၢင်ႈၼမ်ႉမိုဝ်းမႃးထႅင်ႈ ၸၢႆးထႅမ်ၶိူဝ်းလၢတ်ႈၼင်ႇၼႆ။

သိုပ်ႇတူၺ်း တွင်ႈထၢမ် ၽူႈၸတ်းၸိူင်း ထႅမ်ၶိူဝ်း – https://www.facebook.com/shannews/videos/736042824758922/