သိုၵ်းမၢၼ်ႈဝဵင်းလႃႈသဵဝ်ႈပိုၼ်ၽၢဝ်ႇဝႃႈ တေလူင်းၵူတ်ႇထတ်းသဵၼ်ႈသၢႆမၢႆၶႅၵ်ႇလႄႈ ၽႂ်မီးၶႅၵ်ႇမႃးလိုဝ်ႈသဝ်းတီႈႁိူၼ်း ႁႂ်ႈလႆႈၵႂႃႇတၢင်ႇသဵၼ်ႈမၢႆၶႅၵ်ႇဝႃႈၼႆ။
ဝၼ်းတီႈ 21/12/2022 သိုၵ်းမၢၼ်ႈလႄႈ ၽူႈၵွၼ်းၸႄႈဝဵင်းဢိၵ်ႇ ၽူႈၵွၼ်းပွၵ်ႉယွမ်ႇ လူင်းၼႂ်းပွၵ်ႉယွမ်ႇသေ ၶိုၼ်ႈႁိူၼ်းလူင်းႁိူၼ်းသေ ၵူတ်ႇထတ်းသဵၼ်ႈသၢႆမၢႆၶႅၵ်ႇ လိူဝ်ၼၼ်ႉၵူတ်ႇထတ်းတူၺ်းပႃးသဵၼ်ႈသၢႆမၢႆႁူဝ်ႁိူၼ်း ထၢမ်ႁႃပႃးၵူၼ်းၼႂ်းသဵၼ်ႈမၢႆႁူဝ်ႁိူၼ်းၼၼ်ႉ- လႆႈႁူႉၼင်ႇၼႆ။
“ၶဝ်လႆႈၶၢဝ်ႇသင်တႄႉဢမ်ႇႁူႉ ။ၶိုၼ်ႈႁိူၼ်းလူင်းႁိူၼ်းသေ ထတ်းသဵၼ်ႈသၢႆမၢႆၶႅၵ်ႇၵူႈလင်ႁိူၼ်းဢေႃႈ။ ၵူၼ်းၼႂ်းပွၵ်ႉၵေႃႈ လႆႈထၢႆႇႁၢင်ႈၵူၼ်းၼႂ်းမုင်ႉႁေႃႁိူၼ်းၽႂ်မၼ်းႁူမ်ႈၵၼ်သေလႄႈ ဢဝ်ပႃးသဵၼ်ႈမၢႆႁူဝ်ႁိူၼ်းသေ လႆႈၵႂႃႇတီႈလုမ်းၵွၼ်းပွၵ်ႉဢေႃႈ။ၶဝ်ၵေႃႈထၢမ်ဝႃႈ ၵူၼ်းဢၼ်မီးသဵၼ်ႈၸိုဝ်ႈသေလႄႈ ဢမ်ႇပႃးၼႂ်းႁၢင်ႈၼႆႉ ပဵၼ်ၽႂ်မၼ်းယူႇလႂ် ၼႆၸိူဝ်းၼႆႉဢေႃႈ။”- ၽူႈၸၢႆး ဢႃယု ၸမ် 40 ပီ ၵူၼ်းလႃႈသဵဝ်ႈၵေႃႉၼိုင်ႈလၢတ်ႈၼင်ႇၼႆ။
ၽွင်းသိုၵ်းလႄႈၽူႈၵွၼ်းၸႄႈဝဵင်းလူင်းၵူတ်ႇထတ်းၼႂ်းပိုၼ်ႉတီႈၼၼ်ႉၵေႃႈ ပေႃးမီးၵူၼ်းဢၼ်ဢမ်ႇမီးၼႂ်းသဵၼ်ႈမၢႆႁူဝ်ႁိူၼ်း သေလႄႈယူႇဝႆႉၸွမ်းတီႈႁိူၼ်းၼၼ်ႉ ႁႂ်ႈလႆႈဢဝ်လိၵ်ႈၵမ်ႉတီႈၽူႈၵွၼ်းပွၵ်ႉသေယူႇသဝ်းၵႂႃႇလၢတ်ႈပႃးၼင်ႇၼႆ။
“ပိူင်လူင်ၶဝ်ၶႂ်ႈႁူႉ ၸွင်ႇမီးၶႅၵ်ႇ ။ ပဵၼ်ၽႂ်လုၵ်ႉလႂ်မႃး။ သမ်ႉထတ်းပႃးသဵၼ်ႈမၢႆႁူဝ်ႁိူၼ်းၸိူင်ႉၼႆၼႆႉ သုၼ်ႇလႆႈၵူၼ်းမိူင်းၼိုင်ႈၵေႃႉၼႆႉမၼ်းဢမ်ႇမီးသင်ယဝ်ႉၶႃႈ။ ဢမ်ႇမီးလွင်ႈႁူမ်ႇလူမ်ႈ သင်သေဢိတ်းၶႃႈ”- ဝႃႈၼႆ။
မိူၼ်ၼႆၼင်ႇၵဝ်ႇ တီႈဝဵင်းလူင် တူၼ်ႈတီး၊ မူႇၸေႊ၊ ၼမ်ႉၶမ်း ဢိၵ်ႇ ဝဵင်းယႂ်ႇဝဵင်းလူင်လၢႆလၢႆဝဵင်းၼႂ်းၸိုင်ႈတႆး ၵေႃႈသိုၵ်းမၢၼ်ႈ ၵႆႉၵႆႉလူင်းၵူတ်ႇထတ်းသဵၼ်ႈမၢႆၶႅၵ်ႇ လူၺ်ႈဢမ်ႇတၼ်းလႆႈၸႅင်ႈဝႆႉလူင်ႈၼႃႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ