သိုၵ်းမၢၼ်ႈ ၼႄၶေႃႈဢၢင်ႈ PDF ၼႆသေ ၵူတ်ႇထတ်းထဵတ်ႈထၢမ်ၵူၼ်းမိူင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း ၊ ၶဝ်ႈသွၵ်ႈထိုင်ၼႂ်းႁိူၼ်းၼႂ်းယေး ၵူတ်ႇထတ်းပႃးၼႂ်းမိုဝ်းထိုဝ် ၸိူဝ်းၼႆႉ။
မိူဝ်ႈဝၼ်းတီ 13/12/2022 ယၢမ်းႁူဝ်ၶမ်ႈ သိုၵ်းမၢၼ်ႈ ၵႂၢတ်ႇလၢင်ႉပိုၼ်ႉတီႈ သွၵ်ႈတဝ်ထိူၼ်ႇ ႁၼ် ပၢင်ပၵ်းသဝ်း PDF ဢၼ်မီးၾၢႆႇတူၵ်း ဝဵင်းယႂႃႇငၢၼ်ႇ၊ ဝၢႆးၼၼ့်မႃး သိုၵ်းမၢၼ်ႈထႅမ်ႁႅင်းသိုၵ်းဢဝ်လွင်ႈႁူမ်ႇလူမ်ႈ ထဵတ်ႈထၢမ်လွၵ်ႇငိုတ်ႈၵူၼ်းမိူင်းႁၢဝ်ႈႁႅင်း။
ၵူၼ်း ဝဵင်းယႂႃႇငၢၼ်ႇ ၵေႃ့ၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ လွင်ႈၸိူဝ်းၼႆ့ ဢမ်ႇၶႂ်ႈလၢတ်ႈသင်ၶႃႈ ၼႂ်းၾူၼ်းၼႆ့ ၶဝ်ၸႅတ်ႈႁႅင်းၼႃႇၶႃႈ မိူဝ်ႈလဵဝ်။ ၶဝ်တိုၼ်း ထၢင်ႇထိူမ်ဝႃႈ ပဵၼ်ၵူၼ်း PDF လူင်ၵႂႃႇမူတ်းယဝ်ႉၶႃႈတီႈဝဵင်းယႂႃႇငၢၼ်ႇၼႆႉ။ ၶဝ်ပိုတ်ႇတူၺ်းၾူၼ်းႁဝ်း ဢေႃႈ။ယူႇယၢပ်ႇၼႃႇမိူဝ်ႈလဵဝ် ”-ဝႃႈၼႆ။
ၸုမ်းသိုၵ်း PDF ဢၼ်ပၵ်းပၢင်သဝ်းဝႆႉတီႈယႂႃႇငၢၼ်ႇၼၼ်ႉ လႆႈငိၼ်းၶၢဝ်ႇဝႃႈသိုၵ်းမၢၼ်ႈတေသွၵ်ႈထိူၼ်ႇၼႆလႄႈ ၼႅတ်ႈႁၢင်ႈႁႅင်းငိူင်ႉဝႄႈဝႆႉဢွၼ်တၢင်းလႄႈတၼ်းပူၼ်ႉလွတ်ႈမူတ်း။ တီႈပၢင်သဝ်းၶဝ်ၵိုတ်းၵွင်ႈၵဝ်ႇ 3 လဝ်းဢၼ်ဢမ်ႇတၼ်းလႆႈဢဝ်ၵႂႃႇ- ၽူႈမီးၸၼ့် PDF ၵေႃ့ၼိုင်ႈလၢတ်ႈၼင်ႇၼႆ။
ပၢင်သဝ်းဢၼ်မၢၼ်ႈ ႁုပ်ႈသိမ်းလႆႈၼႆ့ ၸမ်ဝၢၼ်ႈၼပၢၼ်းၵျီး(နွားဘန်းကြီးကျေးရွာ) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။ၼႂ်းႁၢင်ပီ 2022 ၼႆ့ တပ့်ၸုမ်း PDF ဝဵင်းပင်းတရ၊ ဝဵင်းဢွင်ႇပၢၼ်း ၊ ယႂႃႇငၢၼ်ႇ မီးလွင်ႈလႅၵ်ႈလၢႆႈၶၢႆ့တီႈယူႇၵၼ် ။ဢၼ်ၶၢႆ့ၵႂႃႇတၢင်းမိူင်းယၢင်းလႅင်သေ ၺႃးသိုၵ်းမၢၼ်ႈ တီႉၺွပ်းၵေႃႈမီးဝႃႈၼႆ။
သိုၵ်းမၢၼ်ႈထႅမ်ႁႅင်းသိုၵ်းဢဝ်ႁူမ်ႇလူမ်ႈတီႈဝဵင်းယႂႃႇငၢၼ်ႇမႃး ၸဵမ်မိူဝ်ႈလိူၼ်ႁႃႈ ဢေႊပရႄႊ ပူၼ်ႉမႃး သိုၵ်းမၢၼ်ႈၵူတ်ႇထတ်းၵူၼ်းမိူင်းၵႂႃႇမႃးႁၢဝ်ႈႁႅင်း ၊ မၢင်ၵေႃႉၺႃးတီႉၺွပ်း ၵုမ်းၶင်တူဝ်၊ ၺႃးပေႃႉထုပ်ႉၸမ်တၢႆၵေႃႈမီး။
မိူဝ်ႈဝၼ်းတီႈ 13/12/2022 ၼႆ့ၵူၺ်း တီႈဝဵင်းဢွင်ႇပၢၼ်း ၸိုင်ႈတႆးပွတ်းၸၢၼ်း ၵူၼ်းၼုမ်ႇ 10 ၵေႃ့ ၺႃးသိုၵ်းမၢၼ်ႈတီႉ။ၼႂ်းၼၼ့် ပႃးၼၢင်းယိင်း 2 ၵေႃ့ ။ သိုၵ်းမၢၼ်ႈထၢင်ႇထိူမ်ၸီႉၼႄးၸိူဝ်းၶဝ် ပဵၼ်ၵူၼ်းပၼ်ၶၢဝ်ႇၵမ့်ၸွႆႈ PDF။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ