သိုၵ်းမၢၼ်ႈပိုၼ်ၽၢဝ်ႇပၼ်တူတ်ႈတၢမ်ႇ ဢူးထုၼ်းထုၼ်းႁဵင်ႇ ၵႅမ်ႁူဝ်ပဝ်ႈသၽႃးၵူၼ်းမိူင်း (ၽွင်းပၢၼ်လူင်ပွင်ၸိုင်ႈၼူၵ်ႉယုင်း NLD) တူတ်ႈၶွၵ်ႈ 20 ပီ။
သိုၵ်းမၢၼ်ႈပိုၼ်ၽၢဝ်ႇၵႂႃႇမိူဝ်ႈဝႃးဝၼ်းတီႈ 29/11/2022 ။ ဢူးထုၼ်းထုၼ်းႁဵင်ႇၼႆႉ သိုၵ်းမၢၼ်ႈတီႉၺွပ်းၵုမ်းၶင်ၶွၵ်ႈဝႆႉတီႈၶွၵ်ႈလူင်လႃႈသဵဝ်ႈ။
ၽူႈတၢင်လၢတ်ႈမၼ်းၸၢႆးလၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈပိုၼ်ၽၢဝ်ႇပၼ်တူတ်ႈတၢမ်ႇၶွၵ်ႈ မၼ်းထႅင်ႈ 20 ပီ မိူဝ်ႈဝႃးၼႆႉဢေႃႈ။ လူၺ်ႈမၢႆမီႈ ႁၢၵ်းလင်ဝၢၼ်ႈမိူင်းၼႆၶႃႈဝႃႇ။ တၢင်းဢၼ်ၺႃးဝႆႉ 4 ပီၵမ်းဢွၼ်တၢင်းၼၼ်ႉသေၼႆ ဢၼ်မၼ်းၺႃးတူတ်ႈၶွၵ်ႈဝႆႉယၢမ်းလဵဝ်မီး 24 ပီဢေႃႈယၢမ်းလဵဝ်။ ” ဝႃႈၼႆ။
ၵႅမ်ႁူဝ်ပဝ်ႈသၽႃးၵူၼ်းမိူင်း ဢူးထုၼ်းထုၼ်းႁဵင်ႇၼႆႉ ၺႃးတီႉၺွပ်း ဝၼ်းဢၼ်သိုၵ်းမၢၼ်ႈယိုတ်းဢႃႇၼႃႇဝၢၼ်ႈမိူင်းမိူဝ်ႈဝၼ်းတီႈ 1/2/2021 ၼၼ်ႉၵမ်းလဵဝ်။ ထိုင်ဝၼ်းတီႈ 7/2/2021 ၼၼ်ႉ သိုၵ်းမၢၼ်ႈၶိုၼ်းပွႆႇပၼ်ၶိုၼ်းၵမ်းၼိုင်ႈသေ ၶိုၼ်းတီႉၺွပ်းမိူဝ်ႈဝၼ်းတီႈ 10/2/2021 မႃးတေႃႇထိုင်ဝၼ်းမိူဝ်ႈၼႆႉ ။ ထိုင်ဝၼ်းတီႈ 22/12/2021 မႃး သိုၵ်းမၢၼ်ႈဢဝ်လိူင်ႈၸွႆးတြႃးလူၺ်ႈမၢႆမီႈ 505 ၵ လႄႈ ၶ သေပၼ်တူတ်ႈတၢမ်ႇၶွၵ်ႈမၼ်းဝႆႉ 4 ပီ။
ဢူးထုၼ်းထုၼ်းႁဵင်ႇၼႆႉ ယူႇၼႂ်းပႃႇတီႇၼူၵ်ႉယုင်း NLD သေ ၶဝ်ႈၶေႉၶဵင်ႇပၢင်လိူၵ်ႈတင်ႈမႃး ၼႂ်းပီ 1990၊ 2015 လႄႈ 2020 ။ ဢွင်ႇပေႉပၢင်လိူၵ်ႈတင်ႈသေ ထုၵ်ႇလိူၵ်ႈပဵၼ်ၽူႈတႅၼ်းသၽႃးၵူၼ်းမိူင်း ၸႄႈဝဵင်းၼွင်ၶဵဝ်မႃး ၵူႈၵမ်း။
ၽွင်းပၢၼ်လူင်ပွင်ၸိုင်ႈၼူၵ်ႉယုင်းၽွင်းငမ်းဝၢၼ်ႈမိူင်းၶၢဝ်းတၢင်း 4 ပီမႃးၼႆႉ ဢူးထုၼ်းထုၼ်းႁဵင်ႇ လႆႈႁပ်ႉပဵၼ်ၵႅမ်ႁူဝ်ပဝ်ႈသၽႃးၵူၼ်းမိူင်းၵူၺ်းဢမ်ႇၵႃး လႆႈႁပ်ႉၶဝ်ႈပႃးၼႂ်းၸုမ်းပွင်ၵၢၼ် ငဝ်ႈငုၼ်းပႃႇတီႇ NLD ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ