ဝၼ်းမိူဝ်ႈ ၼႆႉ 25/10/2022 ဝၼ်းၵေႃႇတင်ႈ ၸုမ်းလွတ်ႈလႅဝ်းၶၢင် ၶွပ်ႈတဵမ် 62 ပီ၊ ၽူႈၼမ်းၶၢင် ၸွမ်သိုၵ်းလူင် ဢႅၼ်ႊပၼ်ႊလ လၢတ်ႈဝႃႈ တေသႂ်ႇႁႅင်း “ပၢင်လုၵ်ႉၽိုၼ်ႉၶၢဝ်းၽိူဝ်ႁုၼ်ႈ Spring Revolution ” သေ ၵူၼ်ႇပူတ်း ၸုမ်းသိုၵ်းမၢၼ်ႈမၢၼ်ႈယိုတ်းဢႃႇၼႃႇ ႁႂ်ႈလႆႈဝႃႈၼႆႉ။
ဝၼ်းၵေႃႇတင်ႈ ၸုမ်းလွတ်ႈလႅဝ်းၶၢင် KIO ၶွပ်ႈတဵမ် 62 ပီ ၼႆႉ ၸုမ်းၶၢင် ဢွၵ်ႇလိၵ်ႈပိုၼ်ၽၢဝ်ႇ 7 ၶေႃႈ – ပႃးလွင်ႈမွင်ၸႂ်ၸွမ်း ၵူၼ်းၸိူဝ်းလႆႈလူႉတၢႆ ယွၼ်ႉသိုၵ်းမၢၼ်ႈ ဢဝ်ႁိူဝ်းမိၼ် 3 လမ်း ပွႆႇမၢၵ်ႇသႂ်ႇ ပၢင်ပွၼ်း၊ ႁဵတ်းႁႂ်ႈၵူၼ်းမိူင်းလူႉတၢႆ 60၊ မၢတ်ႇၸဵပ်းတၢင်းၼမ်၊ ပႃးလွင်ႈ ၽူႈၼမ်းမၢၼ်ႈ ၵူႈသိုပ်ႇၵူႈပၢၼ် ၸႂ်ႉလွၵ်းလၢႆး ၵူၼ်းၶိူဝ်းလူင်ပေႉၵိၼ်ၵူၼ်းၶိူဝ်းဢွၼ်ႇ ၸဵမ်ၸိူဝ်းၼႆႉသေ ဢမ်ႇၵႃး ၸွမ်သိုၵ်းလူင် ဢပၼ်ႊလ ၵေႃႉပဵၼ် ႁူဝ်ပဝ်ႈ သိုၵ်းၶၢင်လွတ်ႈလႅဝ်း KIA မွၵ်ႇလၢတ်ႈၶေႃႈၵႂၢမ်း။
ၸွမ်သိုၵ်းလူင် ဢပၼ်ႊလ ႁူဝ်ပဝ်ႈ ၸုမ်းလွတ်ႈလႅဝ်းၶၢင် KIO တပ်ႉသိုၵ်းလွတ်ႈလႅဝ်းၶၢင် KIA လၢတ်ႈ တီႈပၢင်ၵႅဝ်ႇ ဝၼ်းၵေႃႇတင်ႈ တပ်ႉသိုၵ်းလွတ်ႈလႅဝ်းၶၢင် KIO ဝႃႈ – “ဢၼ်ၸုမ်းသိုၵ်းမၢၼ်ႈ ယိုတ်း ဢႃႇၼႃႇ ပေႉၵိၼ်ၶႃႈႁႅမ်ၵူၼ်း ဝၢၼ်ႈၵူၼ်းမိူင်းၼႆႉ ပေႃးၽႂ်ၸုမ်းလႂ် ယင်းဝႆႉၸႂ်ဝႃႈ ဢမ်ႇၵဵဝ်ႇ ၸဝ်ႈၵဝ်ႇၼႆၸိုင် တေႁဵတ်းႁႂ်ႈ ၶမ်ယူႇတႂ်ႈၸဝ်ႈဢႃႇၼႃႇ သိုၵ်းမၢၼ်ႈ ၶၢဝ်းယၢဝ်းသေ ယၢပ်ႇၽိုတ်ႇ ၶမ်ၵိၼ်းၸႂ်ၵႂႃႇထႅင်ႈၶၢဝ်းယၢဝ်း၊ ၵွပ်ႈၼၼ် ထိုင်ၶၢဝ်းလူဝ်ႇသႂ်ႇႁႅင်းပၢင် လုၵ်ႉၽိုၼ်ႉၶၢဝ်းၽိူဝ်မႂ်ႇႁုၼ်ႈ ၵႂႃႇထႅင်ႈ” – ဝႃႈၼႆ။
မိူဝ်ႈဝၼ်းတီႈ 23/10/2022 ယၢမ်းၵၢင်ၶမ်ႈ 8:30 မူင်း သိုၵ်းမၢၼ်ႈ ၸႂ်ႉၶိူင်ႈမိၼ်ၵျႅတ်ႉ 3 လမ်းသေ ပွႆႇမၢၵ်ႇလူင် တူၵ်းသႂ်ႇ ပၢင်ပွႆး သူင်သိူဝ်းႁပ်ႉတွၼ်ႈ ဝၼ်းၵေႃႇတင်ႈ ၸုမ်းလွတ်ႈလႅဝ်းၶၢင် KIO တီႈ ထုင်ႉ ဢၼၼ်ပႃႊ ၸႄႈဝဵင်း ၽႃၵၢၼ်ႉ ႁဵတ်းႁႂ်ႈၵူၼ်းမႃးပွႆး ၵူၼ်းႁဵတ်းၵၢၼ်ပၢႆးမၢၵ်ႈမီး ၶုတ်းသႅင်ၶဝ်၊ မေႃႁွင်ႉၵႂၢမ်း၊ ၸၢႆးၸိူင်းငဝ်းတူင်ႉ ပႃးၸဵမ် ၽူႈမီးၸၼ်ႉ ၼႂ်းၸုမ်းသိုၵ်းၶၢင် ၵမ်ႈၽွင်ႈ လူႉသဵင်ႈသုတ်းမုၼ်ၵႂႃႇ 60 ၵေႃႉပၢႆ။
ဢိင်ၼိူဝ်လွင်ႈၼႆႉ ၸၢဝ်းၶၢဝ်လႄႈ ၸုမ်းၸိူဝ်းလုၵ်ႉၽိုၼ်ႉ ၸုမ်းသိုၵ်းမၢၼ်ႈယိုတ်းဢႃႇၼႃႇ တၢင်းလၢႆ မွင်ၸႂ် ငဝ်ႈသဝ်ႈၸွမ်း ဢၼ်ၸုမ်းသိုၵ်းမၢၼ်ႈ ၸႂ်ႉလၢႆးႁုၵ်းႁၢႆႉ ႁဵတ်းတေႃႇ ၶၢင်။
ၸုမ်းသိုၵ်းမၢၼ်ႈၼႆႉ မိူဝ်ႈပီ 2014 ၵေႃႈ ယၢမ်ႈၸႂ်ႉၶိူင်ႈၵွင်ႈလူင် ယိုဝ်းသႂ်ႇ ၸၼ်ႉၸွမ်သိုၵ်း ငဝ်ႈငုၼ်းသိုၵ်းၶၢင် KIA တီႈၼၼ်ႈၵေႃႈ ၵူၼ်းၼုမ်ႇတဢၢင်း(လွႆ) တင်း ၵူၼ်းၼုမ်ႇ ရၶႅင်ႇ ၸိူဝ်းတိုၵ်ႉၶိုၼ်ႈၸၼ်ႉၸွမ်သိုၵ်း ဝႆႉ ယူႇၸိူဝ်းၼႆႉ လႆႈလူႉတၢႆ ထင်တီႈ တင်းမူတ်း 9 ၵေႃႉ။
ၽူႈလဵပ်ႈႁဵၼ်းၵၢၼ်ႈမိူင်းၵမ်ႈၽွင်ႈထတ်းသၢင်ဝႃႈ ဢၼ်ၸုမ်းသိုၵ်းမၢၼ်ႈ ႁဵတ်းတေႃႇၶၢင်ၵမ်းၼႆႉ (1) ပၢင်ပွႆး ၵဵဝ်ႇၵပ်း ဝၼ်းလုၵ်ႉၽိုၼ်ႉၶၢင် သမ်ႉဢမ်ႇႁဵတ်းတီႈ ၼႃႈလိၼ်ပူတ်းပွႆႇ ဢၼ်သိုၵ်းၶၢင်ၵုမ်းၵမ် ၸွမ်းလႅၼ်လိၼ်ၶႄႇ ၊ (2) သိုၵ်းမၢၼ်ႈ ပႅင်းၸင်းၼိူဝ် ၶၢင် ဢၼ်ပူၵ်းပွင် သိုၵ်းတဢၢင်း(လွႆ) ၊ သိုၵ်းရၶႅင်ႇ AA ၊ သိုၵ်း PDF သိုၵ်းၵႅတ်ႇၶႄႇ ပိုၼ်ႉတီႈ – ပဵၼ်ယွၼ်ႉ ၶႂ်ႈဢဝ်လၢႆးႁၢႆႉ တွပ်ႇတႅၼ်း သင်သွၼ် လူၺ်ႈလၢႆး ပၢတ်ႇၶေႃးၵႆႇ ၼႄလိင်း ၼၼ်ႉယဝ်ႉဝႃႈၼႆ။
