သိုၵ်းမၢၼ်ႈ လမ်းလိမ်း ယိုဝ်းၵွင်ႈလူင် ၾၢႆႇလဵဝ် ႁၢဝ်ႈႁႅင်းလႄႈ ပေႃႈမႄႈလုၵ်ႈဢွၼ်ႇ မႆႈၸႂ်ၵူဝ်ပဵၼ် ပၢင်တိုၵ်း ဢမ်ႇႁတ်း တမ်းၸႂ် သူင်ႇလုၵ်ႈလၢင်းၽႂ်မၼ်းၵႂႃႇႁဵၼ်း။
တႄႇဢဝ် ဝၼ်းတီႈ 26/9/2022 ၼၼ်ႉမႃး တေႃႇထိုင် ဝၼ်းတီႈ 2/10/2022 ၼႆႉ ၶွင်ႇသီႇသိုၵ်းမၢၼ်ႈ ယိုတ်းမိူင်း တပ်ႉ ၶမယ 324 လမ်းလိမ်းယိုဝ်းၵွင်လူင်/ ၵွင်ႈဢွၼ်ႇ ၵႂႃႇၵူႈႁူးၵူႈတၢင်းသေ ႁဵတ်းႁႂ်ႈၵူၼ်း ပိုၼ်ႉတီႈ ၼႂ်းဢိူင်ႇသၢႆးၶၢဝ် ၸႄႈဝဵင်း ၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ မႆႈၸႂ် ၵူဝ်ပဵၼ် ပၢင်တိုၵ်းႁၢဝ်ႈႁႅင်း မၢင်ၵေႃႉ ဢမ်ႇႁတ်းတမ်းၸႂ် သူင်ႇလုၵ်ႈ လၢင်းၽႂ်မၼ်း ၵႂႃႇၶိုၼ်ႈႁူင်းႁဵၼ်း ပေႃးပဵၼ်ပၢင်တိုၵ်းမႃး ၵူဝ်ဢမ်ႇတၼ်းပၢႆႈ။
ၵူၼ်းဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 28 ၼၼ်ႉ သိုၵ်းမၢၼ်ႈ ယိုဝ်းၵွင်ႈလူင် ႁၢဝ်ႈႁႅင်းသေ ယၢမ်း ဝၢႆးဝၼ်း 1 မူင်း မေႃသွၼ်ၵပ်းၾူၼ်းၸူး ပေႃႈမႄႈလုၵ်ႈဢွၼ်ႇ ႁႂ်ႈၵႂႃႇႁပ်ႉလုၵ်ႈလၢင်း ၽႂ်မၼ်းပွၵ်ႈႁိူၼ်းမူတ်း။ မိူဝ်ႈဝၼ်း 29 ၼၼ်ႉ ပွႆႇၵႂႃႇၶိုၼ်ႈႁႅင်းထႅင်ႈ ပေႃႈမႄႈလုၵ်ႈဢွၼ်ႇ ၵူႈၵေႃႉ လႆႈပၼ်မၢႆၾူၼ်းဝႆႉ တီႈမေႃသွၼ်မူတ်းမူတ်းသေ သင်ဝႃႈ ငဝ်း လၢႆး ဢမ်ႇလီၼႆ ႁႂ်ႈမေႃသွၼ် ၵပ်းၾူၼ်းမႃးၵမ်းလဵဝ်။ ပေႃႈမႄႈလုၵ်ႈဢွၼ်ႇ မၢင်ၵေႃႉတႄႉ ဢမ်ႇႁတ်းတမ်းၸႂ် ပွႆႇလုၵ်ႈ လၢင်းၽႂ်မၼ်းၵႂႃႇၶိုၼ်ႈႁဵၼ်းၶႃႈ ယၢမ်းလဵဝ်ၼႆႉ”- ဝႃႈၼႆ။
လိူဝ်ၼၼ်ႉ ၸိူဝ်းတေၵႂႃႇႁဵတ်းသူၼ်ႁႆႈၼႃးၵေႃႈ ဢမ်ႇႁတ်းၵႂႃႇလွတ်ႈလွတ်ႈလႅဝ်းလႅဝ်း ၊ ယွၼ်ႉလူဝ်ႇပႂ်ႉတူၺ်းငဝ်း လၢႆးပၢင်တိုၵ်း၊ လူဝ်ႇပႂ်ႉႁပ်ႉလုၵ်ႈလၢင်း၊ မၢင်ၵေႃႉ မီးၵူၼ်းထဝ်ႈယူႇႁိူၼ်းဝႆႉလႄႈ သင်သဵင်ၵွင်ႈတႅၵ်ႇမႃး ၼင်ႇႁိုဝ် တေပၢႆႈၶိုတ်း တၼ်း ၸဵမ်ၸိူဝ်းၼႆႉ။ ႁဵတ်းႁႂ်ႈတုမ်ႉတိူဝ်ႉၼႃႈၵၢၼ်တႃငၢၼ်းၵူၼ်းဝၢၼ်ႈ။
“ၵူၼ်းဝၢၼ်ႈ ၸိူဝ်းယူႇၸွမ်းႁိမ်းႁွမ်း တပ်ႉၶမယ 324 ၼႆႉ ဢမ်ႇႁတ်းၵႂႃႇႁဵတ်းႁႆႈ ဢမ်ႇႁတ်းၵႂႃႇၼွၼ်း ယဝ်ႉၵေႃႈ ဢမ်ႇႁတ်း ၵႂႃႇမူတ်း ၵမ်ႈၽွင်ႈ ပႂ်ႉဝႆႉတီႈႁိူၼ်းသေ ၸိူဝ်းၵႂႃႇၵေႃႈ တၢင်းၵႂႃႇတၢင်းၵူဝ် ႁဵတ်းၼႆ လႆႈၾၢင်ႉဝႆႉယူႇၵူႈၶၢဝ်းယၢမ်း”- ၵူၼ်းဝဵင်း ၼမ်ႉတူႈ သိုပ်ႇလၢတ်ႈၼႄၼင်ႇၼႆ။
တပ်ႉၶမယ 324 ၼႆႉ ပၵ်းဝႆႉ ႁိမ်းၸမ် ႁူင်းႁဵၼ်းၸၼ်ႉၵၢင် မၢႆ 2 လႄႈ ၸၼ်ႉသုင် မၢႆ 1 တေယၢၼ်ၵႆၵၼ် တင်းႁူင်းႁဵၼ်းမွၵ်ႈ ၶိုင်ႈလၵ်း (3) ၽႃႇလူင်ႇၼႆႉ။
ဝၢၼ်ႈဢၼ်ယူႇၸမ်တပ်ႉ 324 ဢၼ်လႆႈမႆႈၸႂ်ဝႆႉၼၼ်ႉ တေပဵၼ်ဝၢၼ်ႈၽုၺ်း၊ ဝၢၼ်ႈၵွင်းသႃႇ၊ ဝၢၼ်ႈပႅင်းလွင်း၊ ဝၢၼ်ႈႁၢတ်ႇ လႅင်လႄႈ ဝၢၼ်ႈၸဵင်ႇသႃႇ ၸိူဝ်းၼႆႉ။
