မိူဝ်ႈၼႆႉ ဝၼ်းတီႈ 18/8/2022 ယၢမ်းဝၢႆးဝၼ်း 4 မူင်း ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ဢၼ်ၶဝ်ႈယူတ်းယႃတူဝ်ဝႆႉ တီႈႁူင်း ယႃလူင်ၵုင်းထဵပ်ႈ (မိူင်းၵွၵ်ႇ) ၸိုင်ႈထႆးၼၼ်ႉ ယူႇလီၸိုၼ်ႈၶႅၼ်းမႃးယဝ်ႉသေ လူင်းႁူင်းယႃယဝ်ႉ ၸဝ်ႈၶူးလူင် ၺႃႇၼသီႇရိ လၢတ်ႈ။
ၸဝ်ႈၶူးလူင် ၺႃႇၼသီႇရိ (ၸဝ်ႈမၢၼ်ႇတႃဢွၼ်ႇ) ႁူဝ်ပဝ်ႈၵိင်ႇၽႄငဝ်ႈငုၼ်းမုၵ်ႉ ၸုမ်းလူင်သင်ႇၶႃႇ ၸိုင်ႈတႆး ပွတ်းဢွၵ်ႇ ၶူင်း လၢတ်ႈတီႈၽူႈတွႆႇႁွၵ်ႈဝႃႈ –“မိူဝ်ႈၼႆႉ ၶူးဝႃးပေႃႈ လူင်းႁူင်းယႃယဝ်ႉ လႆႈႁၼ်ၶူးဝႃး လူင်းႁူင်းယႃမႃးၼႆႉ တူၺ်းၼႃႈတႃ ၶူးဝႃးပေႃႈ ၸိုၼ်ႈလီမႃးတႄႉတႄႉယဝ်ႉ။ ယူႇတီႈႁူင်းယႃလူင်ၶဝ် မၵ်းမၼ်ႈပၼ်ၶႂၢင်ႉလူင်းယဝ်ႉ။ ၵူၺ်းၵႃႈ လွင်ႈၵၢၼ်သိုပ်ႇၶၢဝ်း တၢင်း ၶူးဝႃးပေႃႈတႄႉ တေသိုပ်ႇၶၢဝ်းတၢင်းလႂ်တႄႉ ပႆႇႁူႉ”- ဝႃႈၼႆ။
ၸဝ်ႈသိလ်ထမ်း ၶူးဝႃးဝုၼ်းၸုမ်ႉၼႆႉ ၶဝ်ႈယူတ်းယႃတူဝ် တီႈႁူင်းယႃလူင်ၵုင်းထဵပ်ႈ (မိူင်းၵွၵ်ႇ) ၸိုင်ႈထႆး မိူဝ်ႈဝၼ်းတီႈ 10/8/2022 ပူၼ်ႉမႃးသေ တေႃႇထိုင် မိူဝ်ႈၼႆႉ ဝၼ်းတီႈ 18 ၸင်ႇလူင်းႁူင်းယႃ။ ၸဝ်ႈသိလ်ထမ်း ၶူးဝႃးဝုၼ်းၸုမ်ႉ ၶဝ်ႈယူတ်း ယႃတူဝ် ယွၼ်ႉတၢင်း ပဵၼ်ၼၢဝ်ၼူၵ်ႉ။
မိူဝ်ႈၼႆႉ ဝၼ်းတီႈ 18 ယူႇတီႈ သင်ၶၸဝ်ႈ၊ တၵ်ႇၵႃႇပီႈၼွင်ႉထႆး၊ ပီႈၼွင်ႉတႆးလႄႈ ၽူႈႁၢပ်ႇၵၢၼ် ၼႂ်းႁူင်းယႃ၊ ပလိၵ်ႈ ၽူႈမီး ပုၼ်ႈၽွၼ်း ၸိူဝ်းၼႆႉ ဢွၼ်ၵၼ်ၵႂႃႇပႂ်ႉႁပ်ႉတွၼ်ႈဝႆႉသႃ တီႈႁူင်းယႃလူင် ၵုင်းထဵပ်ႈတင်းၼမ်လၢႆ။