မိူဝ်ႈၽုၵ်ႈ ဝၼ်းတီႈ 12/8/2022 တူၵ်းမႅၼ်ႈဝၼ်းမႄႈ (ဝၼ်းၵိူတ်ႇၸဝ်ႈၼၢင်းႁေႃၶမ်း တူၼ်ထူၼ်ႈ 9၊ ဢၼ်ပဵၼ်မႄႈ ၸဝ်ႈမုၼ်ယႂ်ႇၶုၼ် ႁေႃၶမ်းထႆး တူၼ်ထီႉ 10)  ဢႃယုၶွပ်ႈတဵမ် 90 ပီ၊ ယူႇတီႈ သင်ၶၸဝ်ႈလႄႈ ၸုမ်းၶႅၵ်ႇလီ ပၢင်ၸႃႉတႆး တေႁူမ်ႈၵၼ် ၸတ်းႁဵတ်းပၢင်တႆႈတဵၼ်း တိူင်ႇၵၢဝ်ႇယွၼ်းသူးပၼ်ၸဝ်ႈ လႄႈ ၶုၵ်းထူပ်းၵုင်ႇမုၼ်မႄႈၸဝ်ႈၵေးၸူး ၽႂ်မၼ်း။

ပၢင်တႆႈတဵၼ်းယွၼ်းသူးၼႆႉ တေၸတ်းတီႈၼႃႈဝၢင်း ၵွင်းမူး ဝတ်ႉပႃႇပဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။

ၸၢႆးသႅင်ႁၢၼ်ၾႃႉ ၽူႈၸွႆႈထႅမ်ၶႅၵ်ႇလီပၢင်ၸႃႉတႆး ဝတ်းပႃႇပဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ တေလႆႈဝႃႈ ပဵၼ်ပီႁႅၵ်ႈ ဢၼ်ပီႈၼွင်ႉတႆးႁဝ်းၶႃႈ ႁူမ်ႈၵၼ် ၸတ်းႁဵတ်း ယိူင်းဢၢၼ်းတႃႇႁႂ်ႈႁဝ်းၶႃႈ မႃးၽွမ်ႉၸႂ် ႁဵတ်းၵၢၼ်လီၵုသူလ်ႁူမ်ႈၵၼ် ယွၼ်းသူးပၼ် ၸဝ်ႈမႄႈမိူင်းထႆး။ ယဝ်ႉၵေႃႈ တႃႇပေႃႈမႄႈႁဝ်း ဢၼ်လႆႈလူႉႁၢႆတၢႆၵႂႃႇၸိူင်ႉၼၼ်ႉလႄႈသင်၊ ၸိူဝ်းတိုၵ်ႉလိပ်းၶီးယူႇလႄႈသင်၊ လိူဝ်ၼၼ်ႉ တႃႇမႄႈ မိူင်းတႆးလူင်ႁဝ်း ဢၼ်ပဵၼ်ၽိုၼ်းပဵၼ်ၾႆးဝႆႉယူႇ ၸိူဝ်းၼၼ်ႉၵေႃႈပႃး။ ႁဝ်းၶႃႈ ဢဝ်တိုဝ်ႉတၢင်း ဝၼ်းမႄႈၼႆႉ ယွၼ်းသူး ၽႄမဵတ်ႉတႃႇပၼ် တႃႇ တူဝ်ၸဝ်ႈၵဝ်ႇလႄႈ ပီႈၼွင်ႉၵူၼ်းမိူင်းတႆး – မိူင်းထႆး ႁႂ်ႈပေႃးၵတ်းယဵၼ်ၵႂႃႇ ဝၼ်းတႃမိူဝ်းၼႃႈ ”- ဝႃႈၼႆ။

ၵဵဝ်ႇၵပ်းလွင်ႈၼႆႉသေ ၸုမ်းၶႅၵ်ႇလီပၢင်ၸႃႉတႆး ၵဵင်းမႆႇ  မွၵ်ႇထိုင် ပီႈၼွင်ႉႁႅင်းၵၢၼ်ၸၢဝ်းၶိူဝ်းတႆး တီႈၸမ်ၵႆ ၵူႈၵေႃႉ ၶဝ်ႈႁူမ်ႈ ၸႂ်ၶုၵ်းထူပ်းၵုင်ႇၵေးၸူးမႄႈ ၽွမ်ႉ ၵၼ် တႆႈတဵၼ်း ၼႃးဝၢင်းၵွင်းမူး တိူင်ႉၵၢဝ်ႇယွၼ်းသူး တႄႇဢဝ် ယၢမ်းၵၢင်ၶမ်ႈ 7 မူင်း ထိုင် 9 မူင်း ၼႂ်းဝၼ်းတီႈ 12 /8/2022 ၼႆႉဝႃႈၼႆ။