ၸၢႆးၸိင်း ၵေႃႉဢၼ်ယဵပ်ႇၺႃးမၢၵ်ႇ တႅၵ်ႇတိူဝ်ႉသႂ်ႇ တီႈၸႄႈဝဵင်းမိူင်းၵိုင် ယၢမ်းလဵဝ် ယူတ်းယႃတူဝ်ဝႆႉတီႈႁူင်းယႃလွႆလႅမ်ၼၼ်ႉ ယၢပ်ႇၽိုတ်ႇ ၵႃႈယူတ်းယႃ လူဝ်ႇတၢင်းၸွႆႈထႅမ်ဝႆႉ ဝႃႈၼႆ။
မိူဝ်ႈဝႃး ဝၼ်းတီႈ 21/7/2022 ယူႇတီႈမေႃယႃ တီႈႁူင်းယႃ ၸႄႈဝဵင်းလွႆလႅမ် လႆႈၽႃႇတတ်းဢဝ်ဢွၵ်ႇၸၢၵ်ႇမၢၵ်ႇ ဢၼ်တိူဝ်ႉ ၶမ်ဝႆႉ တီႈတႂ်ႈဢူၵ်း တီႈၶႅၼ် ၸၢႆးၸိင်း ။ ၸၢၵ်ႇမၢၵ်ႇၸိူဝ်းၶမ်ဝႆႉတီႈၶႅၼ်တီႈၶႃၸိူဝ်းၼႆႉတႄႉတေဢဝ်ဢွၵ်ႇပၼ်သေယူတ်းယႃပၼ်ၵႂႃႇၵမ်းလွႆးလွႆး။ ယၢမ်းလဵဝ် လူဝ်ႇတၢင်းၸွႆႈထႅမ် ၵႃႈ ယူတ်းယႃ။
ၸၢႆးသု ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းလွႆလႅမ် လၢတ်ႈတီႈၽူႈတွႆႇႁွၵ်ႈဝႃႈ -“ယူႇတီႈၸုမ်းၸွႆႈထႅမ် ပရႁိတ တူင်ႇဝူင်းၵူၼ်းၶဝ် ၵပ်းသိုပ်ႇယွၼ်းတၢင်းၸွႆႈထႅမ်မႃးသေ ယူႇတီႈငဝ်းငုၼ်းပႃႇတီႇႁဝ်းၶႃႈ လႆႈၸွႆႈ တႃႇငိုၼ်း 2 သႅၼ်ပျႃး။ ပႃႇတီႇၸႄႈဝဵင်းလွႆလႅမ်သမ်ႉ 1 သႅၼ်ပျႃး ။ ႁူမ်ႈၵၼ် 3 သႅၼ်ပျႃး လႆႈၵႂႃႇၸွႆႈထႅမ်ပၼ်ယဝ်ႉ။ မိူဝ်ႈဝႃး မၼ်းၸၢႆး လႆႈၽႃႇတတ်း ဢဝ်ဢွၵ်ႇၸၢၵ်ႇမၢၵ်ႇ တီႈတႂ်ႈဢူၵ်း ယဝ်ႉ။ ယၢမ်းလဵဝ်ၵေႃႈလႆႈသႂ်ႇဢွၵ်ႊသီႊၵျိၼ်ႊဝႆႉ။ တၢင်းၸွႆႈ ထႅမ်တႄႉ တိုၵ်ႉလူဝ်ႇယူႇထႅင်ႈတင်းၼမ် တႃႇၵႃႈယူတ်းယႃ ၸိူဝ်းၼႆႉ”- ဝႃႈၼႆ။
ၸၢႆးၸိင်း ဢႃယု 30 ပီ ပဵၼ်ၸၢဝ်းတဢၢင်း ၊ ပဵၼ်ၵူၼ်းဝၢၼ်ႈမွၵ်ႇလႅင် ဢိူင်ႇပၢင်ႇၵေႇတု ၸႄႈဝဵင်းမိူင်းၵိုင် ။ ဝၼ်းတီႈ 20 ပူၼ်ႉမႃးၼႆႉ မၼ်းၸၢႆးၵႂႃႇလဵင်ႉဝူဝ်းၵႂၢႆးၼႂ်းထိူၼ်ႇ ၊ ယဵပ်ႇၺႃးမၢၵ်ႇတႅၵ်ႇ တိူဝ်ႉသႂ်ႇတူဝ်ၶိင်း။
ၸၢၵ်ႇမၢၵ်ႇဢၼ်ယႂ်ႇ ဢၼ်ၶမ်ဝႆႉၸွမ်းတူဝ်မၼ်းၸၢႆးတႄႉ မေႃယႃဢဝ်ဢွၵ်ႇပၼ်ယဝ်ႉ။ ၵိုတ်းၸၢၵ်ႇမၢၵ်ႇဢၼ်လဵၵ်ႉဢၼ်ဢွၼ်ႇၸွမ်းၶႃၸွမ်းၶႅၼ်။ ဢဝ်ဢွၵ်ႇပႆႇမူတ်း။ တေဢဝ်ဢွၵ်ႇၵႂႃႇၵမ်းလွႆးလွႆးဝႃႈၼႆ။
ယၢမ်းလဵဝ်မေးၼၢင်းမၼ်း မဢေးဢေး ပႂ်ႉလုမ်းလႃးဝႆႉယူႇတီႈႁူင်းယႃလွႆလႅမ်။ လုၵ်ႈလၢင်းတႄႉပႆႇမီး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ