ၵူၼ်းၼုမ်ႇတႆး – ၶၢင် ၶႅင်ႇမၢၵ်ႇၼင် သၢင်ႈလွင်ႈမိုတ်ႈၵိုဝ်း

144

ၵူၼ်းၼုမ်ႇတႆး – ၶၢင် ဢႃယု 18 ပီ လူင်းတႂ်ႈ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ၶႅင်ႇမၢၵ်ႇၼင် ပဵၼ်ပွၵ်ႈၵမ်းႁႅၵ်း တီႈ ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ။

Photo: ၵူၼ်းၼုမ်ႇပိုၼ်ႉတီႈ/ ၵူၼ်းၼုမ်ႇတႆး – ၶၢင် ၶႅင်ႇမၢၵ်ႇၼင် သၢင်ႈလွင်ႈမိုတ်ႈၵိုဝ်း ဝၼ်းတီႈ 16/7/2022

ပူၼ်ႉမႃး မိူဝ်ႈဝၼ်းတီႈ 16/7/2022 ၼၼ်ႉ ၵူၼ်းၼုမ်ႇတႆး ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ၸတ်းႁဵတ်းပၢင်ပိတ်ႉမၢၵ်ႇ ၼင်ၸွမ်း ၵူၼ်းၼုမ်ႇၶၢင် ယိူင်းဢၢၼ်း တႃႇၵူၼ်းၼုမ်ႇၸၢဝ်းၶိူဝ်းၼႂ်းမိူင်းတႆး ပေႃးတေႁၢင်ႇၵႆယႃႈမဝ်းၵမ်၊ မိုတ်ႈၵိုဝ်းၸမ်ၸႂ် ၵၼ်ၶိုၼ်ႈမႃးလႄႈ ႁႂ်ႈမေႃပိၼ်ႇပၢႆႇ ၸွႆႈထႅမ်ၵၼ် ၼႆယဝ်ႉ။

ၵူၼ်းၼုမ်ႇပိတ်ႉမၢၵ်ႇၼင် ၼႂ်းၸႄႈဝဵင်းႁူဝ်ပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ပိတ်ႉၵမ်းၼႆႉ ပဵၼ်ၵူၼ်းၼုမ်ႇ သႅၼ်းဢႃ ယု 18 ပီ လူင်းတႂ်ႈ ပဵၼ်ပွၵ်ႈၵမ်းႁႅၵ်ႈ။ ပၢင်လဵၼ်ႈမၢၵ်ႇၼင်ၼႆႉ ႁဵတ်းမႃးၵူႈပီ။ ဢၼ်ႁဝ်းၶႃႈၸၢဝ်းတႆး လႆႈၶဝ်ႈႁူမ်ႈ လဵၼ်ႈ ၸွမ်းၵၼ်မႃးၼႆႉ မီးၶၢဝ်းတၢင်း 2-3 ပီယဝ်ႉ”- ဝႃႈၼႆ။

ပၢင်ပိတ်ႉမၢၵ်ႇၼင်ပွၵ်ႈၼႆႉ ယူႇတီႈၵူၼ်းၼုမ်ႇၶဝ် လႆႈႁႅင်းၸႂ်တီႈၽူႈမႃးပၼ်ႁႅင်းတင်းၼမ် ဢၼ်လမ်ႇလွင်ႈတႄႉ လႆႈႁႅင်းၸႂ် ၽူႈႁူမ်ႈၽၢၵ်ႈ ဢၼ်ၶတ်းၸႂ်မႃးပိတ်ႉမၢၵ်ႇၼင် ၸွမ်းၵၼ် ၼႆယဝ်ႉ။

ၽူႈၶဝ်ႈပၼ်ႁႅင်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းဝႃႈ မိူၼ်ၸိူင်ႉၼင်ႇလုၵ်ႈဢွၼ်ႇၸၢႆးတႆးႁဝ်း ၵူႈဝၢၼ်ႈၵူႈမိူင်း ႁဝ်းမႃးလဵၼ်ႈမၢၵ်ႇၼင်ၼႆႉ ဢူၺ်းၵေႃႉႁဝ်းၵေႃႈ တေၼမ်၊ လွင်ႈၽေးယႃႈမဝ်းၵမ်ၵေႃႈ တေႁၢင်ႇၵႆမၼ်းလႄႈ ၶႂ်ႈၽၢၵ်ႇထိုင် လုၵ်ႈဢွၼ်ႇၸၢႆးတႆးႁဝ်း ၵူႈဝၢၼ်ႈၵူႈမိူင်း ႁႂ်ႈမေႃႁၵ်ႉၵၼ် ယႃႇပေႁႂ်ႈမီး လွင်ႈၽိတ်းၽႅၵ်ႇၵၼ်”- ဝႃႈၼႆ။

ၸႄႈဝဵင်းႁူဝ်ပၢင်ႇၼႆႉ မီးၸၢဝ်းၶိူဝ်းတႆး၊ ၶၢင်၊ ၶႄႇလႄႈ တၢင်ႇၸၢဝ်းၶိူဝ်း ႁူမ်ႈယူႇသဝ်းဝႆႉ ၸွမ်းၵၼ် ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ