သင်ၶၸဝ်ႈ ၸိုင်ႈတႆးပွတ်းႁွင်ႇ – ပွတ်းၸၢၼ်း ႁူမ်ႈၵၼ် ပိုတ်ႇႁူင်းႁဵၼ်းမုၼ်ၸဝ်ႈပၵ 7 ဢွင်ႈတီႈ ၼႂ်းၸႄႈဝဵင်းမိူင်းၵိုင် ဝႃႈၼႆ။
ဝၼ်းတီႈ 28/6/2022 လိူၼ်ၸဵတ်းလပ်း ဝၼ်းၸၼ် ယူႇတီႈ သင်ၶၸဝ်ႈ ဝဵင်းၼမ်ႉလၼ်ႈတင်း မိူင်းၵိုင် ႁူမ်ႈၵၼ် ပိုတ်ႇႁူင်းႁဵၼ်းတီႈၵျွင်းမုၼ်ၸဝ်ႈ (ဘက) ဘုန်းတော် ကြီးသင်ပညာရေးကျောင်း 7 ဢွင်ႈတီႈ။ တီႈဝၢၼ်ႈပၢင်သၵ်း (ငဝ်ႈငုၼ်းႁူင်းႁဵၼ်း)၊ ဝၢၼ်ႈၵုင်းလူင်၊ ဝၢၼ်ႈၽွင်း သႅင်၊ ဝၢၼ်ႈပူင်းယၢမ်း၊ ဝၢၼ်ႈၵုၼ်ၵွၵ်ႇ၊ ဝၢၼ်ႈပၢင်ဝႃႈလႄႈ ဝၢၼ်ႈၼွင်ပူး ၼႂ်းဢိူင်ႇပၢင်သၵ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း ၼႆယဝ်ႉ။
ၸဝ်ႈၶူး ၽူႈမီးပုၼ်းၽွၼ်း ၸဝ်ႈၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၼႂ်း 7 ဢွင်ႈတီႈၼႆႉ ပဵၼ်ဝၢၼ်ႈဢၼ်မီး ၼႂ်းဢိူင်ႇ ပၢင်သၵ်း ၸႄႈဝဵင်းမိူင်းၵိုင်။ ဢိင်ၼိူဝ်ငဝ်းလၢႆးၵူႈလွင်ႈလွင်ႈလႄႈ ႁူင်းႁဵၼ်းလူင်ပွင်ၸိုင်ႈပိုတ်ႇမႃးႁိုင်ယဝ်ႉသေတႃႉ ပႆႇလႆႈသွၼ် လႆႈႁဵၼ်းၸိူင်ႉပိူၼ်ႈ။ ထႅင်ႈလွင်ႈၼိုင်ႈၵေႃႈ ပဵၼ်ဝၢၼ်ႈဢၼ်တူၵ်းၸွၵ်ႉ၊ ၶၢဝ်းၾူၼ်ၵႂႃႇမႃးယၢပ်ႇၵိၼ်းဝႆႉၵေႃႈပိူင်ၼိုင်ႈ။ လိူဝ်ၼၼ်ႉ ပဵၼ်ဝၢၼ်ႈ ဢၼ်မီးၼႂ်းလႅၼ်လိၼ်ၸၢပ်ႈမိူင်းတႆးပွတ်း ႁွင်ႇ – ပွတ်းၸၢၼ်းဝႆႉၵေႃႈၸႂ်ႈလႄႈ ၸၼ်ႉလိၵ်ႈ ဢၼ်တေပူင်သွၼ်ၵႂႃႇတႄႉ တေသွၼ်ၵႂႃႇၸွမ်းၼင်ႇပိူင်ႁူင်းႁဵၼ်းလူင်ပွင်ၸိုင်ႈ ၸၼ်ႉငဝ်ႈတေႃႇ ၸၼ်ႉႁႃႈ”- ဝႃႈၼႆ။
ႁူင်းႁဵၼ်းမုၼ်ၸဝ်ႈ ၵုမ်းသွၼ်(ပၵ) ဢၼ်လႆႈပိုတ်ႇၵႂႃႇ 7 တီႈ ၼႂ်းၸႄႈဝဵင်းမိူင်းၵိုင်ၼႆႉ ယူႇတီႈ ၸဝ်ႈသြႃႇၺႃႇၼေႃးၽႃႇသ ဢၵ်ႉၵမႁႃႇသတ်ႉ ထမ်ႇမၸေႃႈတိၵထၸ ၵျွင်းၵၢင်ဝဵင်းၼမ်ႉလၼ်ႈ၊ ၸဝ်ႈသြႃႇဝိရိယ ၵျွင်းဝဵင်းၸၢမ်ဝၢၼ်ႈလီႈ၊ ၸဝ်ႈသြႃႇ တိၵ်ႉၶၺႃႇၼ ၵျွင်လူင်ၼမ်ႉလၼ်ႈ ၸႄႈ ဝဵင်းသီႇပေႃႉ ၸိုင်ႈတႆးပွတ်းႁွင်ႇလႄႈ သြႃႇၸဝ်ႈၵျွင်းပၢင်ဝႃႈ၊ သြႃႇၸဝ်ႈၵျွင်းပၢင်သၵ်း ႁူမ်ႈသြႃႇ ၸဝ်ႈၼႂ်းဢိူင်ႇပၢင်သၵ်းတင်းသဵင်ႈလႄႈ သြႃႇ ၸဝ်ႈၸၼ်ႇတိမႃႇ ၽူႈၶဝ်ႈၸုမ်းရင်ႇၶၼႃႇယၵၸႄႈဝဵင်း ၵျွင်းၵၢင်တူင်ႈ သြႃႇၸဝ်ႈဝႃႇရိၼ်ႇတ ၵျွင်းတူင်ႇလၢဝ်းႁွင်ႇ ဢိူင်ႇတူင်ႇလၢဝ်း ၸႄႈဝဵင်း မိူင်းၵိုင် ၸိုင်ႈတႆးပွတ်းၸၢၼ်း ႁူမ်ႈၵၼ်သေ လူင်းပိုတ်ႇၽုၺ်ႇၵႂႃႇ ၼႆယဝ်ႉ။
သင်ဝႃႈ မီးၽူႈၵူၼ်းလီ ၶႂ်ႈလူႇတၢၼ်းၸွႆႈထႅမ် ပပ်ႉလိၵ်ႈလႄႈသင် ငိုၼ်းလိူၼ်မေႃသွၼ်ၶဝ်လႄႈသင်ၼႆ ၵပ်းသိုပ်ႇလူႇတၢၼ်း လႆႈတီႈမၢႆၾူၼ်း 096-838-146-44 ၼႆႉယူႇ ဝႃႈၼႆ။
