ပၢင်ပွႆးၼႄ ၾိင်ႈငႄႈၾိင်ႈထုင်း ၸၢဝ်းၶိူဝ်း ၸတ်းႁဵတ်းပဵၼ်ပွၵ်ႈၵမ်းႁႅၵ်ႈ တီႈဝဵင်းၵႃလီႉ မီးပီႈၼွင်ႉၸၢဝ်းၶိူဝ်း ပႃးၸဵမ်တႆး ၶဝ်ႈႁူမ်ႈမွၵ်ႈ 200 ။

ဝၼ်းတီႈ 16-17/6/2022 ၼႆႉ ဝၼ်းသုၼ်ႇလႆႈၵူၼ်းၸိုင်ႈတႆးၼႆႉ ၵုၼ်ႁဵင်ၾွင်ႊတေသျိၼ်ႊလႄႈ တင်းၸၢဝ်းၶိူဝ်း ဢၼ်ယူႇႁိမ်းႁွမ်းၾင်ႇၼမ်ႉပၢင် – ၼမ်ႉၶူင်း ႁူမ်ႈၵၼ်ၸတ်းႁဵတ်း ပၢင်ပွႆးၼႄ ၾိင်ႈငႄႈၾိင်ႈထုင်း ၸၢဝ်းၶိူဝ်း ၽႂ်မၼ်း တီႈဝၢၼ်ႈၽၢင်လၢင်း ဝဵင်းၵႃလီႉ ၸႄႈဝဵင်း ၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တႃႇၶၢဝ်းတၢင်း 2 ဝၼ်း။

ပၢင်ပွႆးၼႄၾိင်ႈငႄႈၾိင်ႈထုင်း ၸၢဝ်းၶိူဝ်းၼႆႉ တေမီးပီႈၼွင်ႉၸၢဝ်းလႃးႁူႇ၊ လီသူး၊ ယၢင်းလၢႆး၊ ယၢင်းလမ် ၸိူဝ်းၼႆႉမႃးၶဝ်ႈႁူမ်ႈ ။

ၼၢင်းမျႃႉလေး ၽူႈၶၢၼ်ပၢၵ်ႇ ပၢင်ပွႆးၼႄ ၾိင်ႈငႄႈၾိင်ႈ/ထုင်း ၸၢဝ်းၶိူဝ်းလႄႈ ၵုၼ်ႁဵင်ၾွင်ႊတေသျိၼ်ႊ လၢတ်ႈတီႈ ၽူႈတွႆႇႁွၵ်ႈဝႃႈ -“ယိူင်း ဢၢၼ်း တီႈလႆႈၸတ်းႁဵတ်း ပၢင်ပွႆးၼႄ ၾိင်ႈငႄႈ/ ထုင်းၸၢဝ်းၶိူဝ်းၼႆႉ ဢၼ်ႁဝ်းပီႈၼွင်ႉၸၢဝ်းၶိူဝ်း ၼင်ႇၵၼ် ယူႇႁိမ်းၼမ်ႉပၢင် – ၼမ်ႉၶူင်းၼႆႉ မႃး ၸွမ်းၵၼ် ၵတ်းၵတ်းယဵၼ်ယဵၼ် ပီယၢဝ်းၶၢဝ်းႁိုင်လႄႈ တၢင်းၵိၼ်ယႅမ်ႉ ႁဝ်းၵေႃႈ ဢမ်ႇပိူင်ႈသင် ၼင်ႇႁိုဝ် ႁဝ်းၶႃႈ ပေႃးတေလႆႈႁူႉႁၼ်ၸႂ်ၵၼ် လွင်ႈယူႇ ႁူမ်ႈတုၵ်ႉယၵ်ႈမႃးၸွမ်းၵၼ် ၸိူဝ်းၼႆႉ။ ယဝ်ႉၵေႃႈ လွင်ႈၵိၼ်ယႅမ်ႉႁဝ်းလႄႈ ၾိင်ႈထုင်းႁဝ်းၸိူဝ်းၼႆႉၵေႃႈ ယႃႇႁႂ်ႈႁၢႆၼႆၶႃႈ”- ဝႃႈၼႆ။

ပၢင်ပွႆးၼႄၾိင်ႈငႄႈၾိင်ႈထုင်း ၸၢဝ်းၶိူဝ်းၼႆႉ ဝၼ်းသုၼ်ႇလႆႈၵူၼ်းၸိုင်ႈတႆး ဝၼ်းတီႈ 16 ၼၼ်ႉ လႆႈၸတ်းႁဵတ်း ပၢင်ဢုပ်ႇဢူဝ်းလႅၵ်ႈလၢႆႈၼႄၵၼ် လွင်ႈၾိင်ႈထုင်း၊ လွင်ႈၼုင်ႈတၢင်းဝႆ၊ ပိုၼ်းလႄႈ တၢင်းၵႃႈဝႅၼ် ၸၢဝ်းၶိူဝ်းၽႂ်မၼ်း လႄႈမီးလွင်ႈ တႆႈတဵၼ်းယွၼ်းသူးပၼ်ၵူၼ်းမိူင်းတႆး ၸိူဝ်းထုၵ်ႇပူၼ်ႉပႅၼ်သုၼ်ႇလႆႈ။

မိူဝ်ႈၼႆႉ ဝၼ်းတီႈ 17 သမ်ႉ တူင်ႉၼိုင် ႁဵတ်းလွင်ႈတူမ်ႈႁုင်ၵိၼ်ယႅမ်ႉ ၸၢဝ်းၶိူဝ်းႁင်းၽႂ်မၼ်း ယဝ်ႉၵေႃႈ ၵိၼ်ၶဝ်ႈႁူမ်ႈမူႇၸွမ်းၵၼ်ၵႂႃႇ  ။

ၼၢင်းမျႃႉလေး  လၢတ်ႈဝႃႈ  ပၢင်ပွႆးၼႄ ၾိင်ႈငႄႈ/ ၾိင်ႈထုင်း ၸၢဝ်းၶိူဝ်းၼႆႉ ပီတေမႃးပီၼႃႈၵေႃႈ ဢိင်ၼိူဝ်ငဝ်းလၢႆးတိုဝ်ႉတၢင်းသေ တေဢၢၼ်းၸတ်းႁဵတ်းၵႂႃႇထႅင်ႈ   ဝႃႈၼႆ။