ၽူႈၸၢႆး ဢႃယု 45 ပီ ၵေႃႉၼိုင်ႈ  ၵႂႃႇတီႇၽဵဝ်ႈၽဝ်ႁႆႈမၼ်းၸၢႆး မၢၵ်ႇတႅၵ်ႇတိူဝ်ႉသႂ်ႇမၢတ်ႇၸဵပ်း  လႆႈတႅပ်းမိုဝ်းၾၢႆႇ သၢႆႉ ။

မိူဝ်ႈဝႃး ဝၼ်းတီႈ 22/3/2022 ယၢမ်းၵၢင်ဝၼ်း မွၵ်ႈ 11 မူင်း ဢူးဝိၼ်းသေႃႇ ဢႃယု 45 ပီ ၵႂႃႇတီႇၽဵဝ်ႈၸုတ်ႇၽဝ်ႁႆႈမၼ်း တီႈႁိမ်းဝၢၼ်ႈႁူဝ်ပၢင်ႇ ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း၊ မၢၵ်ႇတႅၵ်ႇ တိူဝ်ႉသႂ်ႇၸွမ်းတူဝ်ၶိင်း ၊ မိုဝ်းၶႅၼ်လႄႈၼႃႈတႃ။    

“မိူဝ်ႈမၼ်းတိုၵ်ႉၸုတ်ႇၽဝ်ယူႇၼၼ်ႉ မၢၵ်ႇတႅၵ်ႇသႂ်ႇမၼ်း၊  မိုဝ်းမၼ်းၾၢႆႇသၢႆႉ တႄႇတီႈၶေႃႈမိုဝ်းၼႆႉၵႂႃႇယွၵ်းယွႆမူတ်း၊ လႆႈတႅပ်းပႅတ်ႈယဝ်ႉၶႃႈ။   တီႈမိုဝ်းၾၢႆႇၶႂႃၵေႃႈၺႃးဢေႃႈ ၵူၺ်းၵႃႈဢမ်ႇထိုင်တီႈလႆႈတႅပ်း။  ၸွမ်းၼႃႈၵေႃႈလႄႈတူဝ်ၶိင်းၵေႃႈၺႃးဢေႃႈ ၸၢၵ်ႇမၢၵ်ႇ။   မၢတ်ႇၸဵပ်းႁၢဝ်ႈႁႅင်းဝႆႉၶႃႈဢေႃႈ”-  ၵေႃႉ ပဵၼ်မေးၼၢင်း ဢူးဝိၼ်းသေႃႇ သိုပ်ႇလၢတ်ႈၼႄၼင်ႇၼႆ။

ႁႆႈ ဢူးဝိၼ်းသေႃႇၼႆႉ  ယၢၼ်ၵႆတင်းဝၢၼ်ႈႁူဝ်ပၢင်ႇ (ပေႃးႁေႃႈရူတ်ႉၶိူင်ႈၵႂႃႇႁိုင်) မွၵ်ႈၶၢဝ်းတၢင်း ၸူဝ်ႈမူင်းၶိုင်ႈ ၊ ယၢမ်းလဵဝ်  ၸုမ်းၸွႆႈထႅမ် ပရႁိတ   ဢဝ်တူဝ် မၼ်းၸၢႆး သူင်ႇယူတ်းယႃဝႆႉတီႈ ႁူင်းယႃလူင်ၸဝ်ႈၸၢမ်ႇထုၼ်း ဝဵင်းတူၼ်ႈတီး ၼႆယဝ်ႉ။

 မေးၼၢင်း ဢူးဝိၼ်းသေႃႇ လၢတ်ႈတီႈၽူႈတွႆႇႁွၵ်ႈဝႃႈ – “တီႈႁိမ်းဝၢၼ်ႈႁူဝ်ပၢင်ႇၼႆႉ ဢမ်ႇမီးပၢင်တိုၵ်းၶႃႈ။ မိူဝ်ႈပူၼ်ႉမႃး လႆႈငိၼ်းပၢင်တိုၵ်းၼႆႉမၼ်း ပဵၼ်တၢင်းၵျွၵ်ႉၵူႇပုၼ်ႉၶႃႈလူင်။ ၵႆႁဝ်းၶႃႈဢေႃႈ  ။ ၽူဝ်ၶႃႈၵႂႃႇႁဵတ်းႁႆႈ   ၵႂႃႇၽုၵ်ႇၶဝ်ႈၵၢပ်ႇ ႁႃၵိၼ်လဵင်ႉတွင်ႉဢေႃႈ။ ႁဝ်းၶႃႈ ႁဵတ်းႁႆႈၶွင် ပူႇႁဝ်းၶဝ်ၵူၺ်းၶႃႈ”- ဝႃႈၼႆ။

  ၼႂ်းၸႄႈဝဵင်းလွၵ်ႉၸွၵ်ႇၼႆႉ မိူဝ်ႈႁူဝ်ပီ 2022 ၼႆႉ RCSS လႄႈ SSPP ပိုတ်းယိုဝ်းၵၼ်ႁၢဝ်ႈႁႅင်း ။ ၼႂ်းၶဝ်းတၢင်းမွၵ်ႈ 1 လိူၼ်မႃးၼႆႉ ပၢင်တိုၵ်းဢမ်ႇပဵၼ်ယဝ်ႉသေတႃႉ   ၵူၼ်းမိူင်း ၽႃႇၺႃး၊ ယဵပ်ႇၺႃးမၢၵ်ႇမႅင်းၾင်လိၼ်ၶိူဝ်းယႂ်း။   လူႉတၢႆ 1 ၵေႃႉ မၢတ်ႇၸဵပ်းဢမ်ႇယွမ်း 3 ၵေႃႉယဝ်ႉ။