တႄႇဢဝ် လိူၼ်ဢေႊပရိူဝ်ႊၼႆႉၵႂႃႇ ၵူၼ်းမိူင်းႁူမ်ႈတုမ် ၵူႈၵေႃႉ သင်ဢွၵ်ႇၶၢဝ်းတၢင်းၵႂႃႇဝဵင်းတႂ်ႈဝဵင်းၼိူဝ်ၸိုင် ႁႂ်ႈဢဝ်ဝႂ်ၵပ်းတူဝ်/ မၢႆၾၢင်ၵၼ် ၵူႈၵေႃႉ လဝၵ ၾၢႆႇထတ်းသဵၼ်ႈမၢႆႁူဝ်ၵူၼ်း ပိုၼ်ၽၢဝ်ႇဝႆႉၼင်ႇၼႆ။
ႁွင်ႈၵၢၼ် ၾၢႆႇထတ်း/ၵဵပ်းသဵၼ်ႈမၢႆႁူဝ်ၵူၼ်းလႄႈ ၾၢႆႇႁဵတ်းဝႂ်ၵပ်းတူဝ် (လဝၵ) ဢၼ်ယူႇတႂ်ႈသိုၵ်းမၢၼ်ႈၵုမ်းၵမ် ပိုၼ်ၽၢဝ်ႇဢွၵ်ႇမႃး ၼႂ်းႁူဝ်လိူၼ် မၢတ်ႊၶျ် 2022 ၼႆႉဝႃႈ – တႄႇဢဝ် ဝၼ်းတီႈ 1/4/2022 ယၢမ်းၵၢင်ၼႂ် 6 မူင်းၵႂႃႇ ၵူၼ်းမိူင်းႁူမ်ႈတုမ် ၊ၵူၼ်းမိူင်းတႆး ၵူႈၵေႃႉ သင်ဝႃႈ တေၵႂႃႇတႃႈပႆတၢင်း၊ တေၵႂႃႇမိူင်းတႂ်ႈမိူင်းၼိူဝ်ၸိုင် တေလႆႈပႃး ဝႂ်ၵပ်းတူဝ် (မၢႆၾၢင်) ၸပ်းတူဝ်ၵၼ်ဝႆႉ ၵူႈၵေႃႉ ။
ၵူၼ်းမိူင်း လႃႈသဵဝ်ႈ ဢႃယု 40 ပၢႆၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “ၸူဝ်ႈသိုၵ်းမၢၼ်ႈ ယိုတ်း ဢႃႇၼႃႇ မႃးၼႆႉ ၵူၼ်းမိူင်း တင်းသဵင်ႈ ဢမ်ႇလႆႈၸႂ်ၶဝ် ၸင်ႇမီးၵၢၼ်လုၵ်ႉၽိုၼ်ႉမႃး။ ၵမ်းၼႆႉ ၵူၼ်းၼုမ်ႇ ၵမ်ႈၽွင်ႈ ဢွၼ်ၵၼ်ဢွၵ်ႇတၢင်း ၵႂႃႇၶဝ်ႈယိပ်းၵွင်ႈၵၢင်ႇ လုၵ်ႉၽိုၼ်ႉ တေႃႇၶဝ်။ ပေႃးၸိူင်ႉၼၼ် ၶဝ်တေႁႃလၢႆးတင်း ၼိုင်ႈလွင်ႈသွင်တၢင်းသေ ႁႃၸႅတ်ႈ လႆႈငၢႆႈမႃး ၸၢင်ႈႁူႉဝႃႈ ပဵၼ်ၽႂ် ယူႇတီႈလႂ် ၶဝ်တေ တီႉၺွပ်းလႆႈငၢႆႈ ဢၼ်ၼႆႉ ဢၼ်ၼိုင်ႈ။ ယဝ်ႉၵေႃႈ ၾၢႆႇလဝၵ ႁဵတ်းဢွၵ်ႇမႃးၸိူင်ႉၼႆ မိူၼ်တင်းလွၵ်ႇငိုတ်ႈၵူၼ်းမိူင်းဝႆႉထႃႈ သင်ဢမ်ႇမီးမၢႆၾၢင်ၼႆ ႁဵတ်းႁႂ်ႈၵူၼ်းမိူင်း ဢမ်ႇႁတ်းၵႂႃႇတၢင်းလႂ် ပႆတၢင်းလႂ်ၼၼ်ႉၶႃႈယဝ်ႉ”- ဝႃႈၼႆ။
ယၢမ်းလဵဝ် ယူႇတီႈႁွင်ႈၵၢၼ် ၾၢႆႇၵဵပ်းသဵၼ်ႈမၢႆ ႁူဝ်ႁိူၼ်းလႄႈ ၾၢႆႇႁဵတ်းဝႂ်ၵပ်းတူဝ်ၼႆႉ လူင်းႁဵတ်း ဝႂ်ၵပ်းတူဝ်/ မၢႆၾၢင်ပၼ် ၵူၼ်းမိူင်းၵူႈတီႈ ၵူႈ ဝဵင်း တႃႇတေႁဵတ်းလႆႈၼႆႉ သမ်ႉယၢပ်ႇ။ မၢင်ၸိူဝ်း သင်ဝႃႈ ပေႃႈမႄႈ ဢမ်ႇမီးဝႂ်ၵပ်းတူဝ်ၸိုင် လုၵ်ႈၵေႃႈ ဢမ်ႇၸၢင်ႈႁဵတ်းဝႂ်ၵပ်းတူဝ်လႆႈ။
ၵူၼ်းမိူင်းပွတ်းၸၢၼ်း ဢႃယု 40 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တၢင်းယၢပ်ႇၽိုတ်ႇ ၵူၼ်းမိူင်းပိုၼ်ႉတီႈတႄႉ တိုၼ်းမီးယူႇယဝ်ႉ ယွၼ်ႉဝႃႈ ႁဵတ်းယၢပ်ႇ။ မၢတ်ႈပူင်ႇတိၼ်ႇၼႆႉ ပေႃးၵႂႃႇႁဵတ်း ႁင်းၵူၺ်း သဵင်ႈငိုၼ်းၼမ်။ မၢင်ၸိူဝ်း ပႆႇလႆႈတေႃႇထိုင်ဝၼ်းမိူဝ်ႈၼႆႉ ၵေႃႈမီး။ မၢင် ၸိူဝ်း ယၢပ်ႇၽိုတ်ႇဢၼ်ဢမ်ႇလႆႈၼႆႉ ယွၼ်ႉပၵ်းပိူင်လၢႆးႁဵတ်းပၼ်ၶဝ်ၼၼ်ႉ ပေႃးဢူႈမႄႈဢမ်ႇမီးမၢႆၾၢင် လုၵ်ႈၵေႃႈ ဢမ်ႇၸၢင်ႈႁဵတ်း ၸင်ႇၼၼ်လႄႈ ဢၼ်ၼႆႉ မၼ်းပဵၼ်လွင်ႈယၢပ်ႇဝႆႉတႄႉတႄႉ”- ဝႃႈၼႆ။
တႃႇသုၼ်ႇလႆႈၵူၼ်းမိူင်းၵေႃႉၼိုင်ႈၼၼ်ႉ ထုၵ်ႇလီဢွၼ်ၵၼ်ႁဵတ်းမၢႆၾၢင်ဝႆႉၵူႈၵေႃႉယူႇ ။ ပေႃးဢမ်ႇမီးမၢႆၾၢင် ဢွၵ်ႇတၢင်းၵမ်းလႂ်ၵေႃႈ တေလႆႈလၢတ်ႈတေႃႇ သိုၵ်းလႄႈပလိၵ်ႈတိၵ်းတိၵ်းၵူၺ်း ၵူၼ်းၼုမ်ႇၽူႈတူင်ႉၼိုင်ၼႂ်းတူင်ႇဝူင်းၵူၼ်း ၼႂ်းၸိုင်ႈတႆးပွတ်းၸၢၼ်းၵေႃႉၼိုင်ႈ လၢတ်ႈၼင်ႇၼႆ။
မၼ်းၸၢႆးလၢတ်ႈဝႃႈ – “ပေႃးႁဝ်းၶႃႈ ဢမ်ႇမီးမၢတ်ႉပူင်ႇတိၼ်ၼႆ မိူၼ်တင်းဝႃႈ ႁဝ်းၵႂႃႇထႅမ်ပၼ်ႁႅင်းပလိၵ်ႈၶဝ် ။ မိူၼ်တၢင်းႁဵတ်းၵၼ်လၢႆးႁႃၵိၼ်ၶဝ်ၵူၺ်း။ပႃးၸဵမ်ၵၢင်ႉၵႄႇ ၵူၼ်းလူင်ဝၢၼ်ႈၵေႃႈမိူၼ်ၼၼ်။ ႁဝ်းတေဢွၵ်ႇတၢင်းၵမ်းလႂ်ၵေႃႈ တေလႆႈၵႂႃႇယွၼ်းဝႂ်ၵမ်ႉ ၵမ်းၼၼ်ႉ။ တေလႆႈပၼ်ငိုၼ်းယူႇတိၵ်းတိၵ်း။ ၵူၺ်းၵႃႈ ပေႃးႁဝ်းၶႃႈ မီးမၢတ်ႉပူင်ႇ တိၼ်ႇယဝ်ႉ ႁဝ်းၶႃႈ ဢမ်ႇတၢပ်ႈလူဝ်ႇပၼ်ငိုၼ်းၽႂ် လွၵ်ႇလွၵ်ႇလၢႆလၢႆယဝ်ႉ။ သုၼ်ႇလႆႈၵူၼ်းမိူင်းၼိုင်ႈၵေႃႉ ၵေႃႈႁဝ်းတေလႆႈတဵမ်ထူၼ်ႈ ”- ဝႃႈၼႆ။
ၵဵဝ်ႇလူၺ်ႈ ႁွင်ႈၵၢၼ်ၾၢႆႇၵဵပ်းသဵၼ်ႈမၢႆႁူဝ်ႁိူၼ်းလႄႈ ၾၢႆႇႁဵတ်းဝႂ်ၵပ်းတူဝ် (လဝၵ) ပိုၼ်ၽၢဝ်ႇဝႆႉသေ ယူႇတီႈၸဝ်ႈၵႃး ၵမ်ႈၼမ်တႄႉ လၢတ်ႈဝႃႈ မိူဝ်ႈဢွၼ်တၢင်းၼႆႉ သင်ဝႃႈ ၵူၼ်းဢွၵ်ႇတၢင်းၶဝ် ဢမ်ႇမီးမၢႆၾၢင်ၵေႃႈ ဢမ်ႇပဵၼ်သင်။ ယွၼ်ႉဢမ်ႇမီးသိုၵ်းမၢၼ်ႈ ပႂ်ႉၵူတ်ႇထတ်းၸႅတ်ႈၸွမ်း တၢင်း ၵႂႃႇမႃးလႆႈလွတ်ႈလႅဝ်း။
ဝၢႆးသိုၵ်းမၢၼ်ႈ ယိုတ်းမိူင်းၼႆႉမႃး တႃႇတေဢွၵ်ႇတႃႈပႆတၢင်းၵေႃႈ မီးလွင်ႈယၢပ်ႇၽိုတ်ႇမႃးတင်းၼမ် ၵူၼ်းဢမ်ႇမီးမၢႆၾၢင်ၵေႃႈ ဢမ်ႇပေႃးၶႂ်ႈ ႁတ်း ႁပ်ႉတၢင်ႇယဝ်ႉ ၸဝ်ႈၵႃးလႅင်းၶဝ် ဝႃႈၼႆ။
