ၸူဝ်ႈသိုၵ်းမၢၼ်ႈယိုတ်းမိူင်းမႃးၶၢဝ်းတၢင်းပီပၢႆၼႆႉ ၶၼ်ၼမ်ႉမၼ်းရူတ်ႉ/ ၸၢၵ်ႈ ပုင်ႈၶိုၼ်ႈသုင် ႁဵတ်းႁႂ်ႈ ၸဝ်ႈသူၼ် ၸဝ်ႈၵႃး မိူင်းတႆး ထူပ်းတၢင်းယၢပ်ႇၽိုတ်ႇ ၵိၼ်းၸႂ်ၵၼ်လိူဝ်ႁႅင်း။
တႄႇဢဝ် ဝၼ်းတီႈ 1/3/2022 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 8/3/2022 ၼႆႉ ၶၼ်ၼမ်ႉမၼ်းရူတ်ႉ/ ၸၢၵ်ႈ ပုင်ႈၶိုၼ်ႈႁႅင်း 1 လိတ်ႉ ထိုင် 2,400 ပျႃးပၢႆ ။ ၸဝ်ႈသူၼ် ၸဝ်ႈၵႃး ဢမ်ႇၸၢင်ႈႁဵတ်းၵၢၼ်။ၵူၼ်းၵႃႉ ဢမ်ႇမီးၼမ်ႉမျၢတ်ႈၼမ်ႉတွၼ်း။
ၸဝ်ႈၵႃး မူႇၸေႊ – ဝဵင်းလိူဝ်ႇ(မၼ်းတလေး) လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် ၵႃႈၼမ်ႉမၼ်းၶိုၼ်ႈႁႅင်းၼႃႇ ပေႃးတေယွၼ်းၵႃႈၵႃး ၼမ်ၼႆၵေႃႈ သမ်ႉတေယၢပ်ႇၸႂ် ၵူၼ်းၶီႇမၼ်း။ ပေႃးဢမ်ႇ ယွၼ်းတိူဝ်းၶိုၼ်ႈထႅင်ႈ ၵႃႈၼမ်ႉမၼ်းသမ်ႉ ဢမ်ႇၵုမ်ႇ ။ ယၢမ်းလဵဝ် ၵႃႈၶီႇၵႃး မူႇၸေႊ – မၼ်းတလေး 1 ၵေႃႉပဵၼ် 7 မိုၼ်ႇပျႃးယဝ်ႉ။ မိူဝ်ႈဢွၼ်တၢင်း မိူဝ်ႈၶၼ်ၼမ်ႉမၼ်းပႆႇၶိုၼ်ႈတႄႉ 1 ၵေႃႉ ၵဵပ်းၵႃႈၵႃး 3 မိုၼ်ႇ ထိုင် 4 မိုၼ်ႇပျႃးၵူၺ်း”- ဝႃႈၼႆ။
ၼမ်ႉမၼ်းရူတ်ႉ/ ၸၢၵ်ႈ ပုင်ႈၶိုၼ်ႈမႃးႁႅင်း လႄႈၸဝ်ႈၵႃး မၢင်ၵေႃႉ ထိုင်တီႈပေႃး လႆႈၵိုတ်းယင်ႉၵၢၼ် ဝႆႉၸူဝ်ႈၶၢဝ်း ၵေႃႈမီးမႃးယဝ်ႉ။
ၸဝ်ႈသူၼ် ဝဵင်းလၢင်းၶိူဝ်း ၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈလၢင်းၶိူဝ်းၼႆႉၵေႃႈ ၶၼ်ၼမ်ႉမၼ်း ၶိုၼ်ႈႁႅင်းမိူၼ်ၵၼ်ၶႃႈ။ ၶၼ်ၼမ်ႉမၼ်းၼႆႉ တႃႇတေလူတ်း တႄႉ ဢမ်ႇငၢႆႈယဝ်ႉယူဝ်ႉ။ ယၢပ်ႇၸႂ် တႃႇၵူၼ်းႁဵတ်းသူၼ်ထႅင်ႈယဝ်ႉ။ ၶၼ်ၶဝ်ႈၵၢပ်ႇ တိုၵ်ႉတေလီမႃး ၼမ်ႉမၼ်းသမ်ႉၶိုၼ်ႈၸိူင်ႉၼႆ တႃႇတေလူင်းတိုၼ်းလၢင်း ထႆသူၼ် ၽုၵ်ႇသွမ်ႈထႅင်ႈၵမ်း႞တႄႉ တေလႆႈဝူၼ်ႉယၢပ်ႇယဝ်ႉ တိုၼ်းလၢင်းတေ သဵင်ႈၼမ်”- ဝႃႈၼႆ။
ၵူၼ်းၸိူဝ်းလႆႈၸႂ်ယႂ်ႇၾႆးၾႃႉ ႁဵတ်းၵၢၼ်ႁႃၵိၼ်လဵင်ႉတွင်ႉယိင်ႈၶႅၼ်းယၢပ်ႇၵိၼ်းၸႂ်။ ၾႆးၾႃႉၶၢတ်ႇ ၊ သမ်ႉလႆႈႁေႃႈၸၢၵ်ႈၾႆးသေႁဵတ်းၵၢၼ်။ ပဵၼ်ဢၼ်ယၢပ်ႇၶၢၼ်ၸႂ်တႃႇၵူၼ်းမိူင်းတႄႉတႄႉဝႃႈၼႆ။
ၵူၼ်းမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းလၢတ်ႈတီႈၽူႈတွႆႇႁွၵ်ႈဝႃႈ – “တီႈမိူင်းသၢတ်ႇၼႆႉ ၼမ်ႉမၼ်း 1 လိတ်ႉ 34-35 ဝၢတ်ႇ (ငိုၼ်းထႆး) ၶႃႈဢေႃႈ။ၸၢင်ႈလဵၵ်း သမ်ႉလူဝ်ႇၸႂ်ႉ ၾႆးၸၢၵ်ႈသေတတ်းလဵၵ်း။ ။ တီႈမိူင်းသၢတ်ႇၼႆႉ ၾႆးၾႃႉဢမ်ႇမႃး 24 ၸူဝ်ႈမူင်းလႄႈ လႆႈ ၼူဝ်းၸၢၵ်ႈတင်းဝၼ်း သေႁဵတ်းၵၢၼ်ဢေႃႈ။ ဢၼ်ၸႂ်ႉႁႅင်းၾႆးၾႃႉၼႆႉ ဢမ်ႇၵႃးၵၢၼ် တတ်းလဵၵ်းၵူၺ်း။ ၵၢၼ်တၢင်ႇဢၼ်ၵေႃႈ မီးလႄႈ ပႃးၵၼ်ယၢပ်ႇမူတ်းၶႃႈဢေႃႈပွၵ်ႈၼႆႉတႄႉ ”- ဝႃႈၼႆ။
မိူဝ်ႈၼႆႉ တီႈၸႄႈဝဵင်းမူႇၸေႊၵေႃႈ ႁၢၼ်ႉၼမ်ႉမၼ်း မၢင်ႁၢၼ်ႉ ၼမ်ႉမၼ်း (92) 1 လိတ်ႉၶိုၼ်ႈထိုင် 2,200 ပျႃး၊ (95) 1 လိတ်ႉ 2,272 ပျႃး။ တီႈၸႄႈဝဵင်းၵဵင်းတုင် မၢင်ႁၢၼ်ႉသမ်ႉ 1 လိတ်ႉ 2,080 – 2,090 ပျႃး။ တႃႈၶီႈလဵၵ်းၵေႃႈ ၶိုၼ်ႈထိုင် 35 ဝၢတ်ႇ(ငိုၼ်းထႆး တေႃႇ 1 လိတ်ႉ)။ ယဝ်ႉ ၵေႃႈ တီႈဝဵင်းလႃႈသဵဝ်ႈ မၢင်ႁၢၼ်ႉ 2,185 ပျႃး ထိုင် 2,410 ပျႃး ၵႃႈၼႆႉ။
ၵူၼ်းမိူင်းပွတ်းမူႇၸေႊ ဢွၼ်ၵၼ်ၶၢင်းပွင်ႉဝႃႈ တေၶီႇရူတ်ႉၶိူင်ႈထႅမ်ႁႅင်းၾႆးၾႃႉ ၼႆၵေႃႈ ၾႆးဢမ်ႇမႃး။ တေၶီႇရူတ်ႉၶိူင်ႈသႂ်ႇၼမ်ႉမၼ်းၼႆၵေႃႈ ၼမ်ႉမၼ်းသမ်ႉၵႃႈႁႅင်း ပဵၼ်ဢၼ်ယၢပ်ႇၸႂ်ဝႆႉ ၵူၼ်းပိုၼ်ႉတီႈမူႇၸေႊလၢတ်ႈ။
