ၼႂ်းၶၢဝ်းတၢင်းဝၼ်းသွင်ဝၼ်း ႁၢင်လိူၼ်သႅပ်ႊထႅမ်ႊပိူဝ်ႊ 2021 ၼႆႉမႃး ၶၼ်ၼမ်ႉမၼ်း ၶိူင်ႈၸၢၵ်ႈ ၵိုင်ႉၵၢင်ႉပုင်ႈၶိုၼ်ႈႁႅင်း ၸဝ်ႈပမ်ႉၼမ်ႉမၼ်း ၵမ်ႈၽွင်ႈ ထိုင်တီႈပေႃးလႆႈပိၵ်ႉဢိုတ်းႁၢၼ်ႉပႅတ်ႈ ၵူၼ်းမိူင်းတႆး ထူပ်းတၢင်းယၢပ်ႇၽိုတ်ႇ တႃႇၸႂ်ႉရူတ်ႉ ၸႂ်ႉၵႃး။

ဝၼ်းမိူဝ်ႈၼႆႉ 30/09/2021 ၼႆႉ ၶၼ်ငိုၼ်းတေႃႇလႃႇၶိုၼ်ႈ ၼိုင်ႈတေႃႇလႃႇ တေႃႇ 2700 ပၢႆ ယဝ်ႉလႄႈ ၶၼ်ၼမ်ႉမၼ်းရူတ်ႉ ၼမ်ႉမၼ်းၵႃးၵေႃႈၶိုၼ်ႈၸွမ်း။ ဝၼ်းမိူဝ်ႈၼႆႉ ၶၼ်ၼမ်ႉမၼ်း ထၢတ်ႈသီႇ ၼိုင်ႈပုင်းတလမ်ႇ ၶိုၼ်ထိုင် ႁိမ်းႁႃႈသႅၼ်၊ ၼိုင်ႈလီႊတႃႊ ယူႇၵႄႈ 3800 တေႃႇ 4000 ပျႃး ၊ ၼမ်ႉမၼ်းတီႊၸႄႊ 1 လီႊတႃႊ 1700 ပျႃးလႄႈ ၵူၼ်းမိူင်း ၵႂႃႇမႃး ၸႂ်ႉရူတ်ႉၵႃး ယၢပ်ႇ။  ၸဝ်ႈႁၢၼ်ႉၼမ်ႉမၼ်း မၢင်ႁၢၼ်ႉ ပေႃးလႆႈပိၵ်ႉ။

ၼၢင်းလႃႉငူၺ်ႇ မိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “ပၢၼ်ဝၼ်းမိူဝ်ႈလဵဝ် ၵႂႃႇႁႆႈ ၵႂႃႇၼႃးၵေႃႈ  ဢွၼ် ၵၼ်ၶီႇရူတ်ႉ ၶီႇၵႃးၵႂႃႇ။ ၶၼ်ၼမ်ႉမၼ်းၶိုၼ်ႈၵေႃႈ ယၢပ်ႇၸႂ်ၵၼ်ယဝ်ႉဢေႃႈ။ မၢင်ၵေႃႉၼႆႉ တႃႇၵိၼ်  ၵူၺ်းသမ်ႉပေႃးယၢပ်ႇယဝ်ႉ ၼမ်ႉမၼ်းသမ်ႉ ၶိုၼ်ႈထႅင်ႈၸိူင်ႉၼႆ ၶူဝ်းၵုၼ်ႇၵေႃႈၶိုၼ်ႈ ပဵၼ်ဢၼ်ယၢပ်ႇ ၽိုတ်ႇၵိၼ်းၸႂ်ၵၼ်တႄႉယဝ်ႉၶႃႈ”-  ဝႃႈၼႆ။

ၸဝ်ႈႁၢၼ်ႉၶၢႆၼမ်ႉမၼ်း ၵမ်ႈၼမ် ထတ်းသၢင်ဝႃႈ ယွၼ်ႉၶၼ်ငိုၼ်းတေႃႇလႃႇဢမ်ႇၼိမ်ၵေႃႈပိူင်ၼိုင်ႈ။ ၵူၼ်းမိူင်းၵမ်ႈၽွင်ႈ ဢမ်ႇယုမ်ႇဢမ်ႇမၼ်ႈၸႂ် ၼိူဝ်ငိုၼ်းမၢၼ်ႈၵေႃႈပိူင်ၼိုင်ႈလႄႈ ၶၼ်ငိုၼ်းမၢၼ်ႈ ၸင်ႇလူတ်းယွမ်းလူင်း၊ ၶၼ်ၵုၼ်ႇ ၸင်ႇလႆႈပုင်ႈၶိုၼ်ႈ ဝႃႈၼႆ။

ၸၢႆးၶွၼ်း ၸဝ်ႈသူၼ် ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢပ်ႇၽိုတ်ႇၵၼ်ၶႃႈဢေႃႈ သင်ပဵၼ်ၼႆ ၵႂႃႇၶၢဝ်းယၢမ်းတႄႉ ဢမ်ႇငၢႆႈယဝ်ႉၶႃႈ။ တေၵႂႃႇတၢင်းၼွၵ်ႈၵူၺ်းၵေႃႈ ပေႃးလႆႈဝူၼ်ႉ တႃႇၼမ်ႉမၼ်းရူတ်ႉ ဢွၼ် တၢင်းယဝ်ႉ ယႃႇဝႃႈၼမ်ႉမၼ်းရူတ်ႉၵူၺ်း ၼမ်ႉမၼ်းၵိၼ်ၵေႃႈ ၶိုၼ်ႈမိူၼ်ၵၼ်မူတ်းယဝ်ႉၶႃႈ ”- ဝႃႈၼႆ။

ၸၢႆးႁေႃၸႅတ်ႈ ၸဝ်ႈႁၢၼ်ႉပမ်ႉၼမ်ႉမၼ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၶၼ်ၼမ်ႉမၼ်းၵေႃႈ ၼိုင်ႈဝၼ်းလႄႈ ၼိုင်ႈဝၼ်း ၶိုၼ်ႈယူႇတိၵ်းတိၵ်း။ မိူဝ်ႈၼႆႉ 1 ပေႇပႃႇ 4- 5 သႅၼ်ပျႃး။ ပေႃးႁဝ်းၶၢႆဢၼ် ၵဝ်ႇယဝ်ႉ တႃႇတေသိုဝ်ႉၶိုၼ်းဢၼ်မႂ်ႇတႃႇၶၢႆမိူဝ်ႈၽုၵ်ႈ ၶၼ်မၼ်းပေႃးဢမ်ႇလႆႈၶိုၼ်းၵေးလၢင်းယဝ်ႉၶႃႈ။ တႃႇတေ ၵႂႃႇသိုဝ်ႉမႃးၶၢႆၵေႃႈ ယၢပ်ႇထႅင်ႈလႄႈ ၸင်ႇဝႃႈ လႆႈယင်ႉဝႆႉၵမ်းၼိုင်ႈၶႃႈ”- ဝႃႈၼႆ။

ဝၼ်းမိူဝ်ႈၼႆႉ ၶၼ်ငိုၼ်းမၢၼ်ႈ လူင်းႁႅင်း မိူဝ်ႈလိူၼ်ပူၼ်ႉ ၶၼ်ငိုၼ်းမၢၼ်ႈ ၼိုင်ႈသႅၼ် လႆႈငိုၼ်းထႆး ႁိမ်း 2000 ဝၢတ်ႇ။ ယၢမ်းလဵဝ် ငိုၼ်းမၢၼ်ႈၼိုင်ႈသႅၼ် လႆႈငိုၼ်းဢမေႊရိၵၼ်ႇ မွၵ်ႈ 53 ၻေႃႊလႃႊ၊ လႆႈငိုၼ်းထႆး ၽတ်ႉၽဵင်ႇ(ၶၼ်သိုဝ်ႉ/ၶၢႆ)  မွၵ်ႈ 1750 ဝၢတ်ႇ။ ပေႃးၶၼ်တေႃႊလႃႊ၊ ၶၼ်ၼမ်ႉမၼ်း ၶိုၼ်ႈၵေႃႈ ၶၼ်ၶမ်း ၶိုၼ်ႈၸွမ်း။ ယၢမ်းလဵဝ် ၶၼ်ၶမ်းၼိုင်ႈၵျၢပ်ႈ ပုင်ႈၶိုၼ်ႈထိုင် 20 သႅၼ်ပၢႆ။