ပလိၵ်ႈ/ သိုၵ်းမၢၼ်ႈ ႁူမ်ႈၵၼ် ပႂ်ႉၵူတ်ႇထတ်း တီႉၺွပ်းၵူၼ်းမိူင်းပိုၼ်ႉတီႈၵႂႃႇမႃး  ၼႂ်းဝဵင်းၵဵင်းတုင် သင်ႇႁွင်ႉလႄႈ ဢမ်ႇၵိုတ်းၸိုင် ဢဝ်ၵွင်ႈငႃသေ ၵႅတ်ႇႁႄႉ ၵူၼ်းပိုၼ်ႉတီႈလၢတ်ႈ။

ဝၢႆးသေ မိၼ်းဢွင်ႇလၢႆႇ မႃးတၢင်ႇထီးထၢတ်ႈ တီႈဝတ်ႉၽၸဝ်ႈလူင် ၵၢင်ဝဵင်းၵဵင်းတုင်ယဝ်ႉဝၼ်းၼိုင်ႈ ထိုင်မႃး ဝၼ်းတီႈ 16/2/2022 ၼႆႉ  ယူႇတီႈၽူႈၵွၼ်းၸႄႈဝဵင်းၵဵင်းတုင် ၾၢႆႇတႂ်ႈၶွင်ႇသီႇသိုၵ်းမၢၼ်ႈ ၵုမ်းၵမ် ဢွၵ်ႇလိၵ်ႈပိုၼ်ၽၢဝ်ႇ ႁၢမ်ႈၵူၼ်း မိူင်းဢွၵ်ႇၼွၵ်ႈႁိူၼ်း ယၢမ်းၵၢင်ၶိုၼ်း ။  ႁၢမ်ႈၶွၼ်ႈတုမ်ၵၼ် 5 ၵေႃႉၶိုၼ်ႈမႃး ယၢမ်းလဵဝ် ၸဵမ်သိုၵ်း/ ပလိၵ်ႈမၢၼ်ႈ ၸိူဝ်းၼႆႉ ပႂ်ႉၵူတ်ႇ ထတ်း ၵူၼ်းမိူင်းၵႂႃႇမႃးႁၢဝ်ႈႁႅင်း သင်ဝႃႈႁွင်ႉလႄႈ ဢမ်ႇၵိုတ်းၸိုင် ထိုင်တီႈဢဝ်ၵွင်ႈငႃသေ ၵႅတ်ႇႁႄႉဢဝ်ၵမ်းလဵဝ်။

ၵူၼ်း  ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် တီႈၵဵင်းတုင်ၼႆႉ ပေႃးပူၼ်ႉ 10 မူင်းၵၢင်ၶိုၼ်းၵႂႃႇၼႆ ၶဝ်တိုၼ်းဢဝ်တၢမ်ႇၵမ်းလဵဝ် ။ ပေႃးႁွင်ႉလႄႈ ဢမ်ႇၵိုတ်းၼႆႉ ဢဝ်ၵွင်ႈငႃသေ ႁႄႉဢဝ်ၵမ်းလဵဝ်ၶႃႈ။ ၵူၼ်းမိူင်းၼႆႉ သင်ဝႃႈလႆႈ 9 မူင်းၶိုင်ႈယဝ်ႉ ၸိူဝ်းၵႂႃႇမီးတၢင်းၼွၵ်ႈ တီႈလႂ် ၵေႃႈ ၼႅတ်ႈဢွၼ်ၵၼ်ပွၵ်ႈႁိူၼ်းယေးၽႂ်မၼ်းၵမ်းလဵဝ် ၵူဝ်ၵၼ်ၶႃႈဢေႃႈ”- ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇ ဢၼ်ယူႇတီႈ ၽူႈၵွၼ်းၸႄႈဝဵင်းၵဵင်းတုင် ဢွၵ်ႇမႃးၼၼ်ႉ တႄႇဢဝ်ၵၢင်ၶိုၼ်း 10 မူင်း ထိုင် 4 မူင်းၵၢင်ၸႂ် ႁၢမ်ႈၵူၼ်းမိူင်း ဢွၵ်ႇၼွၵ်ႈႁိူၼ်း ။ ယဝ်ႉၵေႃႈ တေဢမ်ႇလႆႈၶွၼ်ႈတုမ်ၵၼ် 5 ၵေႃႉၶိုၼ်ႈၼိူဝ် ၸိူဝ်းၼႆႉ။

ၵူၼ်းၼုမ်ႇ ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်ႁဵတ်းယူႇၼႆႉ ၶဝ်ဢမ်ႇႁဵတ်းတႃႇၵုမ်းၵမ်တၢင်းပဵၼ် ၵူဝ်ၽႄႈလၢမ်းသင်ၶႃႈ။ ဢွၵ်ႇ လိၵ်ႈလၢႆလၢႆၵူၺ်း ၶႂ်ႈၶွၼ်ႈတုမ်ၵၼ် 5 ၵေႃႉၶိုၼ်ႈၼိူဝ်ၵေႃႈယဝ်ႉ ဢမ်ႇႁၼ်ဝႃႈသင်။ ၵူၺ်းၵႃႈ သင်ပူၼ်ႉ 10 မူင်းၵၢင်ၶိုၼ်းၵႂႃႇတႄႉ ႁဵတ်းတႄႉ ဢေႃႈၼၼ်ႉတႄႉ။ ၶဝ်ၵူဝ်ပိူၼ်ႈႁဵတ်းႁၢႆႉတေႃႇၶဝ်ယူဝ်ႉ။ ယၢမ်းလဵဝ် တၢင်းပဵၼ်ၵေႃႈၼမ်မႃး ပွႆးလၢမ်းၶႅၵ်ႇလီပၢင်ၸႃႉၵေႃႈ ႁိမ်ၵၼ်ႁဵတ်းၶႃႈဢေႃႈ ၼႆႉ ၵူဝ်ပိူၼ်ႈပိၵ်ႉဢိုတ်း ဢမ်ႇပၼ်ႁဵတ်းၼၼ်ႉၼႃႇ ၵူၼ်းသမ်ႉ ၵွပ်ႈၼႆလႄႈ ႁိမ်ၵၼ်ႁဵတ်းပွႆး”- ဝႃႈၼႆ။

ၼႂ်းၸႄႈဝဵင်းၵဵင်းတုင် တႄႇဢဝ် ဝၼ်းတီႈ 29/6/2021 ၼၼ်ႉမႃး ႁၢၼ်ႉတေႃႇထိုင် ဝၼ်းတီႈ 27/2/2022 ၼႆႉ မီးၵူၼ်းတိတ်းၸပ်း ၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 တင်းမူတ်း 5,844 ၵေႃႉ၊ လူႉတၢႆ 93 ၵေႃႉ၊ ယႃၶႅၼ်း 5,644 ၵေႃႉလႄႈ တိုၵ်ႉယူတ်းယႃ 107 ၵေႃႉ သိုဝ်ႇၶၢဝ်ႇ ၼႂ်းပိုၼ်ႉ တီႈၵဵင်းတုင် ဢွၵ်ႇဝႆႉၼင်ႇၼႆ။