ၽွင်းဝၢၼ်ႈမိူင်းသုၵ်ႉယုင်ႈ  ၵူၼ်းမိူင်း ထူပ်းတၢင်းယၢပ်ႇၽိုတ်ႇ ပၢႆႈၽေးပၢင်တိုၵ်းၶဝ်ႈဝဵင်းမိူင်းၵိုင်ယူႇၼႆႉ သိုၵ်းမၢၼ်ႈ တင်ႈၵဵတ်ႉမႂ်ႇထႅင်ႈ သွင်တီႈ ၼႂ်းၵႄႈဢိူင်ႇပၢင်ႇၵေႇတု – မိူင်းၵိုင် ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း။

တႄႇဢဝ် ဝၼ်းတီႈ 16/1/2022 ၼႆႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း ႁဵတ်းၵဵၵ်ႉ/ တင်ႈၵဵၵ်ႉမႂ်ႇထႅင်ႈ တီႈၼႃႈဝတ်ႉဢွင်ႇမင်ႇၵလႃႇ လွႆလႅင် တႂ်ႈ တူၼ်ႈမႆႉႁုင်း တီႈၼိုင်ႈလႄႈ တီႈလွႆမေႃ တၢင်းၶိုၼ်ႈၵၢတ်ႇၽုၺ်း တီႈၼိုင်ႈ ၼႂ်းပွၵ်ႉ 6 ၵႄႈၵၢင်မိူင်းၵိုင် – ဢိူင်ႇပၢင်ႇၵေႇတု ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ပႂ်ႉၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း  ။

ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈၶဝ် ႁဵတ်းၵဵၵ်ႉသေ ပႂ်ႉၵူတ်ႇထတ်း ၵူၼ်းၵႂႃႇမႃးၼႆႉ တိုၵ်ႉမီးဝၼ်းသွင်ဝၼ်းၼႆႉ ၵူၺ်း။ တီႈၼႃႈၵျွင်းဢွင်ႇမင်ႇၵလႃႇ လွႆလႅင်ၼၼ်ႉ ၶဝ်ဢဝ်မႆႉပူၵ်ႇသေ ႁဵတ်းဝဵတ်းႁႄႉဝႆႉ ။ တီႈလွႆမေႃႇ တၢင်းၶိုၼ်ႈၵၢတ်ႇၽုၺ်းၼၼ်ႉ သမ်ႉ ၶဝ်ဢဝ်မႆႉပႅၼ်ႈ ႁဵတ်းမိူၼ်မႃႉ သႂ်ႇလဵၵ်းၼၢမ်သေ တမ်းဝႆႉၸွမ်းၶၢင်ႈတၢင်း  ”- ဝႃႈၼႆ။

ၵဵတ်ႉ/လၢၼ်ႇ 2 တီႈၼႆႉ မီးၼႂ်းပွၵ်ႉ 6 တင်းသွင်ဢၼ်။ ႁႄႉထၢမ်ၵူၼ်းၶဝ်ႈပႃးတင်းၵူၼ်းဢွၵ်ႇႁၢဝ်ႈႁႅင်း။ ဢမ်ႇယွမ်းငိုၼ်သေတႃႉ ႁဵတ်းႁႂ်ႈၵူၼ်းမိူင်းၸႂ်သုၵ်ႉလႄႈၵႂႃႇမႃးယၢပ်ႇၽိုတ်ႇ ဝႃႈၼႆ။

“  လုၵ်ႉလႂ်မႃး တေၵႂႃႇတီႈလႂ် တေၵႂႃႇႁဵတ်းသင် ၸိူဝ်းၼႆႉၶႃႈ။ ၾူၼ်းၵေႃႈၶဝ်ဢမ်ႇယွၼ်းတူၺ်းၼင်ႇၵဝ်ႇ။  ငိုၼ်းတွင်း ၸိူဝ်းၼႆႉၵေႃႈ ဢမ်ႇယွၼ်းၶႃႈ။ ၵူၺ်းၵႃႈ ဢၼ်ၶဝ်တင်ႈၵဵၵ်ႉၸိူင်ႉၼႆၼႆႉ ၶႅၼ်း ပၼ်တၢင်းတုၵ်ႉၶ ၵူၼ်းမိူင်းၵႂႃႇမႃးယၢပ်ႇၽိုတ်ႇထႅင်ႈၵူၺ်းၶႃႈဢေႃႈ” – ၵူၼ်းမိူင်း ပိုၼ်ႉတီႈမိူင်းၵိုင် သိုပ်ႇလၢတ်ႈတီႈၽူႈတွႆႇႁွၵ်ႈၼင်ႇၼႆ။

ယၢမ်းလဵဝ် ၼႂ်းၸႄႈဝဵင်းမိူင်းၵိုင်ၼႆႉ ပၢင်တိုၵ်းမီးၵူႈဝၼ်း   ၼႂ်းပိုၼ်ႉတီႈ လႆႈပၢႆႈၽေးသိုၵ်း ဢမ်ႇယွမ်း 2 ႁဵင်ၵေႃႉ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇၽိုတ်ႇ လွင်ႈၵိၼ်ယႅမ်ႉ၊ ၽႃႈႁူမ်ႇၶူဝ်း ၼွၼ်းလွင်ႈၼုင်ႈဝႂ်လႄႈ ႁၢမ်းၵၢၼ်ငၢၼ်း ၸိူဝ်းၼႆႉ။