မိူဝ်ႈၼႆႉ ဝၼ်းတီႈ 10/11/2021 ယၢမ်းၵၢင်ၼႂ် 9 မူင်း တပ်ႉသိုၵ်းမၢၼ်ႈ ဢၼ်ပၵ်းဝႆႉ ႁူဝ်ဝဵင်းသႅၼ်ဝီ ၼႂ်းၵႄႈလႃႈသဵဝ်ႈ – သႅၼ်ဝီ ၾၢႆႇၸၢၼ်းဝဵင်း ယၢၼ်ၵႆဝဵင်း မွၵ်ႈ 3 လၵ်း ၼႂ်းၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ၺႃးၸုမ်းဢမ်ႇႁူႉၾၢႆႇ ဢဝ် မၢၵ်ႇလူင်ပွႆႇသႂ်ႇ တီႈၼႂ်းတပ်ႉပဵၼ်လၢႆၵမ်း၊ ၵူၺ်းဢမ်ႇတူၵ်းသႂ်ႇၼႂ်းတပ်ႉသိုၵ်းမၢၼ်ႈသေ ၵႂႃႇတူၵ်းသႂ်ႇၸွမ်းသူၼ်ၶဝ်ႈၵၢပ်ႇ ၵူၼ်းမိူင်း ႁိမ်း ႁွမ်းတပ်ႉ ၸိူဝ်းၼၼ်ႉ  ဝႃႈၼႆ။

ၵူၼ်း  သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ – “သဵင်မၢၵ်ႇမိူဝ်ႈၵႆႈၼႆႉ ႁႅင်းတႄႉၶႃႈ။ မီးၸုမ်းယိပ်းၵွင်ႈၵၢင်ႇမႃးငွႆးယိုဝ်းၶဝ် ပွႆႇမၢၵ်ႇလူင်သႂ်ႇ  တပ်ႉၶဝ်ၼႆၶႃႈဝႃႇ။ ၵူၺ်းၵႃႈပဵၼ်ၸုမ်းလႂ် မႃးငွႆးတႄႉဢမ်ႇႁူႉ။ မၢၵ်ႇၸိူဝ်းၼၼ်ႉၵေႃႈ ဢမ်ႇတူၵ်းသႂ်ႇ ၼႂ်းဝၢင်းတပ်ႉၶဝ် ပူၼ်ႉတပ်ႉၶဝ်ၵႂႃႇသေ ၵႂႃႇ တူၵ်းၸွမ်း သူၼ်ၶဝ်ႈၵၢပ်ႇၵူၼ်းမိူင်း ဢၼ်မီးႁိမ်းတပ်ႉၶဝ်ၸိူဝ်းၼၼ်ႉပႅတ်ႈ။ ၵမ်းၼႆႉ သိုၵ်းမၢၼ်ႈၼႆႉ ၶဝ်လၢမ်းဝႃႈ လုၵ်ႉတၢင်းၾၢႆႇတူၵ်းဝဵင်းယိုဝ်း သႂ်ႇၶဝ်ၼႆသေ ၶဝ်ၶိုၼ်းလုၵ်ႉတီႈတပ်ႉၶဝ်ၼၼ်ႉ ယိုဝ်းမၢၵ်ႇလူင် ၵႂႃႇၸူးတၢင်းၾၢႆႇတူၵ်းဝဵင်း တၢင်းၵႂႃႇမိူင်းပႃးၼၼ်ႉၶႃႈဢေႃႈ။ ႁႅင်းၼႃႇလူင် သဵင် ၶဝ်ယိုဝ်းမၢၵ်ႇမိူဝ်ႈၵႆႈၼႆႉ”- ဝႃႈၼႆ။

တပ်ႉသိုၵ်းမၢၼ်ႈ ဢၼ်ပၵ်းဝႆႉတီႈႁူဝ်ဝဵင်းတၢင်းၶဝ်ႈ ဝဵင်းသႅၼ်ဝီၼၼ်ႉ တေမီးတပ်ႉ ၶလယ 240 ၊ ၶမယ 323 ၊ ၶလယ 69 လႄႈ ၸၵၶ 16   ပၵ်းသဝ်းဝႆႉ တိတ်းၸပ်းၵၼ်ဝႆႉတင်းမူတ်း ၼႆယဝ်ႉ။

“ပဵၼ်မၢၵ်ႇလူင်ၵူၺ်း ဢၼ်မႃးငွႆးယိုဝ်းသႂ်ႇ သိုၵ်းမၢၼ်ႈၼၼ်ႉ ဢမ်ႇၸႂ်ႈဝႃႈ ၶဝ်ႈမႃးလူမ်ႇယိုဝ်း လေႃႇတိုၵ်းႁၢဝ်ႈႁၢဝ်ႈႁႅင်းႁႅင်းၽႅဝ် ၼႂ်းတပ်ႉၶဝ် ၸိူင်ႉၼၼ်။ မိူဝ်ႈၽွင်းသဵင်မၢၵ်ႇတူၵ်းတႅၵ်ႇၸိူင်ႉၼၼ်ႉတႄႉ ၵူၼ်းမိူင်းပိုၼ်ႉတီႈႁဝ်းၶႃႈ ဢွၼ်ၵၼ် တူၵ်းၸႂ် တိုၼ်ႇသၢၼ်ႈၵူဝ်ၵၼ်ၵမ်ႉၼိုင်ႈၶႃႈ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇၼႆႉ  မီးသိုၵ်းမၢၼ်ႈ ယိုတ်းမိူင်း လႄႈ ၸုမ်း ဢူၺ်းလီပွတ်းႁွင်ႇ ၶဝ်ယူႇသဝ်းတူင်ႉၼိုင်။

မိူဝ်ႈဝၼ်းတီႈ 20/9/2021 ယၢမ်းဝၢႆးဝၼ်း မွၵ်ႈ 4 မူင်း ပူၼ်ႉမႃးၼၼ်ႉၵေႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း ၸုမ်းဢူၺ်းလီပွတ်းႁွင်ႇ သိုၵ်း ၵူဝ်းၵၢင်ႉ MNDAA တင်း သိုၵ်း  TNLA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ့်တူၼ်း ၼႂ်းၸႄႈဝဵင်းသႅၼ်ဝီ ၼႂ်းၵႄႈလႃႈသဵဝ်ႈ – သႅၼ် ဝီ ၸိုင်ႈတႆးပွတ်းႁွင်ႇ ယွၼ်ႉပၢင်တိုၵ်းၼႆႉသေ ၵူၼ်းမိူင်းၸဝ်ႈၵႃး ၸိူဝ်းၵႂႃႇမႃးလႆႈၵိုတ်းၶၢင်ႉၶမ်ၵၢင်တၢင်း ဝႆႉၵမ်းၼိုင်ႈ။

 ယၢမ်းလဵဝ် ၼႂ်းၵႄႈ ၵူတ့်ၶၢႆ – သႅၼ်ဝီၵေႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်းတူင့်ၼိုင် ၸွမ်းသဵၼ်ႈတၢင်းလူင်ႁၢဝ်ႈႁႅင်း ယွၼ့်ဝႃႈ တၢင်းပွတ်းတွၼ်ႈသၢႆၼၼ့် မီးၸုမ်းဢူၺ်းလီပွတ်းႁွင်ႇ တူင့်ၼိုင်ယူႇဝႆ့ၼမ် ၵူၼ်းပိုၼ့်တီႈ ပွတ်းသၢႆ ၵူတ့်ၶၢႆ – သႅၼ်ဝီ ၵေႃႉၼိုင်ႈ လၢတ်ႈၼႄ ၼင်ႇၼႆ။