Facebook ဢၼ်ၵူၼ်းတင်းလုမ်ႈၾႃႉ ၸႂ်ႉတိုဝ်းၵၼ်ယူႇဝၼ်းမိူဝ်ႈၼႆႉၼၼ်ႉ မီးၶၢဝ်ႇဢွၵ်ႇမႃးဝႃႈ တေလႅၵ်ႈႇၸိုဝ်ႈသဵင်ပဵၼ်တၢင်ႇဢၼ် ဝႃႈၼႆ။

ၸိုဝ်ႈသဵင်ဢၼ်တေလႅၵ်ႈဢၼ်မႂ်ႇၼႆႉ ၾၢႆႇတၢင်း ၶွမ်ႊပၼီႊ Facebook ဢမ်ႇပႆႇ ပိုၼ်ၽၢဝ်ႇ ပဵၼ်တၢင်းၵၢၼ်။

ၶၢဝ်ႇ  The Verge တႄႉဢွၵ်ႇဝႆႉဝႃႈ ပၢင်ၵုမ်လူင်ၵၢၼ်သိုဝ်ႇသၢၼ် Connect Conference   တေႁဵတ်းၼႂ်းဝၼ်းတီႈ 28/10/2021 သေ ဢၼ်ပဵၼ် Mark Zuckerberg  ၽူႈပွင်ၵၢၼ်သုင်သုတ်းၶွင်ၶွမ်ႊပၼီႊ Facebook လႅပ်ႈတေပိုၼ်ၽၢဝ်ႇၸိုဝ်ႈမႂ်ႇဢၼ်တေလႅၵ်ႈၼၼ်ႉပဵၼ်တၢင်းၵၢၼ် ဝႃႈၼႆဝႆႉ။

လိူဝ်ၼၼ်ႉ The Verge ယင်းပၢႆတႅမ်ႈဝႆႉဝႃႈ လႅပ်ႈတေပဵၼ်ၸိုဝ်ႈ Horizon ၼႆယူႇ။

မီးၶၢဝ်ႇဢွၵ်ႇမႃးဝႃႈတေလႅၵ်ႈၸိုဝ်ႈၾဵတ်ႉသ်ပုၵ်ႉၼႆလႄႈ ၵူၼ်းၸႂ်ႉၾဵတ်ႉသ်ပုၵ်ႉ တင်းလုမ်ႈၾႃႉဢွၼ်ၵၼ်မႆႈၸႂ်ဝႃႈ တေၸႂ်ႉတိုဝ်းယၢပ်ႇမႃးလိူဝ်ၵဝ်ႇႁိုဝ်ဢမ်ႇၼၼ် တေပိၵ်ႉၾဵတ်ႉသ်ပုၵ်ႉယဝ်ႉႁိုဝ်ၼႆယူႇ။

“လွင်ႈတေပိၵ်ႉ ၾဵတ်ႉသ်ပုၵ်ႉတႄႉ ဢမ်ႇလႅပ်ႈပဵၼ်လႆႈ။ လွင်ႈတေလၢႆႈၸိုဝ်ႈၾဵတ်ႉပုၵ်ႉတႄႉ မီးၶၢဝ်ႇလိုဝ်းဝႆႉမႃး လႆႈမွၵ်ႈဝူင်ႈပၢႆယဝ်ႉ။ ပႃးၸဵမ်ၶၢဝ်ႇယႂ်ႇၼႂ်းလုမ်ႈၾႃႉ  CNN ၶဝ်ၵေႃႈယင်းဢွၵ်ႇၶၢဝ်ႇဝႆႉ။ ၼႂ်းဝူင်းၵၢၼ်ၾဵတ်ႉသ်ပုၵ်ႉၵေႃႈမီးပၼ်ႁႃဝႆႉၼမ်။မိူၼ်ၼင်ႇလွင်ႈ Privacy ၾဵတ်ႉသ်ပုၵ်ႉ၊ လွင်ႈႁူမ်ႇလူမ်ႈၶေႃႈမုလ်း ၾဵတ်ႉသ်ပုၵ်ႉၸိူဝ်းၼႆႉ ၵေႃႈဢမ်ႇမီး  Policy မၼ်ႈၵႅၼ်ႇမၼ်ႈၵိုမ်း ၊ မဝ်မၢင်မႃးလိူဝ်ၵဝ်ႇၸိူဝ်းၼႆႉၵေႃႈလႆႈႁၼ်ၶဝ်တႅမ်ႈတၢင်ႇဝႃႈၵၼ်မႃး။” – ၵူၼ်းၼုမ်ႇတႆး ၽူႈလူင်ႉလႅၼ်ႇၾၢႆႇဢၢႆႊထီႊၵေႃႉၼိုင်ႈလၢတ်ႈၽူႈတွႆႇႁွၵ်ႈၼင်ႇၼႆ။

ၵဵဝ်ႇၵပ်းလွင်ႈတေလႅၵ်ႈၸိုဝ်ႈၾဵတ်ႉသ်ပုၵ်ႉၼႆႉၵေႃႈ ၾၢႆႇတၢင်းၶွမ်ႊပၼီႊ ၾဵတ်ႉသ်ပုၵ်ႉ  ဢမ်ႇပိုၼ်ၽၢဝ်ႇ ဢမ်ႇယိုၼ်ယၼ်ဝႆႉ ။  ပေႃးလႅၵ်ႈၸိုဝ်ႈၾဵတ်ႉပုၵ်ႉယဝ်ႉ ၸိုဝ်ႈ App တၢင်ႇဢၼ် ဢၼ်ပဵၼ်တႂ်ႈၶွမ်ႊပၼီႊၾဵတ်ႉသ်ပုၵ်ႉ ၸွင်ႇတေလႅၵ်ႈၸွမ်း ၊လၢႆးၸႂ်ႉတိုဝ်း ၸွင်ႇတေမီးလွင်ႈလႅၵ်ႈလၢႆႈ ၼႆၸိူဝ်းၼႆႉၵေႃႈ ဢွၼ်ၵၼ်မႆႈၸႂ် ၶႆႈႁူႉ။ လွင်ႈၼႆႉၶၢဝ်ႇယႂ်ႇလၢႆလၢႆဢၼ်ၶတ်းၸႂ်တိတ်းတေႃႇၸူးၾဵတ်ႉသ်ပုၵ်ႉယူႇၵေႃႈ ၽူႈၶၢၼ်ပၢၵ်ႇ ဢမ်ႇၸၢင်ႈယိုၼ်ယၼ်ပၼ် Comment  ဝႃႈၼႆလႄႈ တေႃႇထိုင်ယၢမ်းလဵဝ် ယင်းတိုၵ်ႉပဵၼ်ၶၢဝ်ႇလိုဝ်းဝႆႉလၢႆလၢႆၵူၺ်း။

ၵွၼ်ႇၼႃႈၼၼ်ႉ တူဝ် Mark Zuckerberg  တႄႉယၢမ်ႈ လၢတ်ႈတီႈၶၢဝ်ႇလၢႆလၢႆဢၼ် ပဵၼ်တၢင်းၵၢၼ်ဝႆႉဝႃႈ မီးၸုမ်း ႞ တင်ႈၸႂ်ၶႂ်ႈယႃႉၸိုဝ်ႈသဵင် ၾဵတ်ႉသ်ပုၵ်ႉလႄႈ မီးပၼ်ႁႃဝႆႉလၢႆလၢႆဢၼ် – ၼႆယူႇ။

ၾဵတ်ႉသ်ပုၵ်ႉ ၼႅၵ်ႈသၢၼ်ၵၢၼ်ၵပ်းသိုပ်ႇၼႆႉ Mark Zuckerberg   လႄႈ Eduardo Saverin, Dustin Moskovitz, Andrew McCollum, Chris Hughes  ၶဝ်ႁူမ်ႈၵၼ်ၵေႃႇတင်ႈမႃးမိူဝ်ႈပီ 2004 သေ ႁႂ်ႈၵူၼ်းတင်းလုမ်ႈၾႃႉလႆႈၸႂ်ႉတိုဝ်းၵၼ် တေႃႇထိုင်ဝၼ်းမိူဝ်ႈၼႆႉ။ ၶွမ်ႊပၼီႊၶွင် Facebook ၼႆႉတင်ႈဝႆႉတီႈဝဵင်း California မိူင်းႁူမ်ႈတုမ် ဢမေႊရိၵ။ ၵူၼ်းၸႂ်ႉတိုဝ်းၾဵတ်ႉသ်ပုၵ်ႉပတ်းပိုၼ်ႉလုမ်ႈၾႃႉၼႂ်းဝၼ်းမိူဝ်ႈၼႆႉမီး 2800 လၢၼ်ႉပၢႆ ၶွမ်ႊပၼီႊၾဵတ်ႉသ်ပုၵ်ႉပိုၼ်ၽၢဝ်ႇဝႆႉၼင်ႇၼႆ။ ၵူၼ်းတင်းလုမ်ႈၾႃႉၸႂ်ႉတိုဝ်းၾဵတ်ႉသ်ပုၵ်ႉၼႆႉ တင်ႈတႄႇၸႂ်ႉတိုဝ်းတႃႇသိုဝ်ႇသၢၼ်ၵၼ်ၼႂ်းတူင်ႇဝူင်းပိုၼ်ႉထၢၼ် ၊ တႃႇႁႃၵိၼ်လဵင်ႉတွင်ႉၵူႈဝၼ်းဝၼ်း၊ တေႃႇထိုင် ၵူၼ်းႁဵတ်းၵၢၼ်ပၢႆးမၢၵ်ႈမီးၸၼ်ႉလုမ်ႈၾႃႉ၊ ဢိၵ်ႇပႃးတင်းၵၢၼ်သိုၵ်းၵၢၼ်မိူင်း ၵူႈၸိူဝ်းၸိူဝ်းလႄႈ ၸင်ႇပဵၼ်တီႈၵူၼ်းၵူႈၸၼ်ႉထၢၼ်ႈမႆႈၸႂ်ၵူဝ်ၾဵတ်ႉသ်ပုၵ်ႉလူမ်ႉဢမ်ႇၼၼ်ထုၵ်ႇၵိုတ်းလိုဝ်ႈၵၼ်ၵႂႃႇ။