ၵူၼ်းလၢႆးၶႃႈ ၵေႃႉၼိုင်ႈ ထုၵ်ႇၵူၼ်းႁဵတ်း Facebook ပွမ်/ တုသေ ၶိုင်ဢၢင်ႈၵဝ်းလႅၼ်ဢဝ်ငိုၼ်းလၢႆ တၼ်းႁူႉတူဝ်ဝႆးသေ ဢမ်ႇထိုင်တီႈလႆႈ ဢူၼ်းငိုၼ်းပၼ် ဢမ်ႇတၼ်းသုမ်းဝႃႈၼႆ။

မိူဝ်ႈဝၼ်းတီႈ 26/10/2021   ၼၢင်းယိင်း ၵေႃႉၼိုင်ႈ ယူႇပွၵ်ႉ 4 ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း မီး ၵူၼ်းႁဵတ်း Facebook ပွမ်/ တု ဢၼ်ၼိုင်ႈ ဢုပ်ႇၸွမ်းမၼ်းၼၢင်းမႃးမီးၶၢဝ်းတၢင်း မွၵ်ႈၼိုင်ႈဝူင်ႈၼႆႉ ဢၢၼ်းလႅၼ်ဢဝ်ငိုၼ်း။

ၾဵတ်ႉသ်ပုၵ်ႉပွမ်ၼၼ်ႉလၢတ်ႈဝႃႈ လႆႈသိုဝ်ႉၶူဝ်းတွၼ်ႈသေ တေသူင်ႇပၼ်မၼ်းၼၢင်း၊  တေလုၵ်ႉတီႈမိူင်ဢိင်းၵလဵတ်ႈသူင်ႇမႃး။  ယၢမ်းလဵဝ် ႁွတ်ႈမိူင်းမၢၼ်ႈယဝ်ႉ ၵႃႈသူင်ႇမၼ်း တေလႆႈၸၢႆႇႁင်းၵူၺ်း တင်းမူတ်းမႅၼ်ႈ 10 သႅၼ်ပျႃး ႁႂ်ႈဢူၼ်းပၼ် ၵႃႈသူင်ႇၶူဝ်းဝႃႈၼႆ။  

ၼၢင်းယိင်းၵူၼ်းလၢႆးၶႃႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၾဵတ်ႉသ်ပုၵ်ႉၼၼ်ႉ Add မႃး ပဵၼ်ဢူၺ်းၵေႃႉ ၼႂ်းၾဵတ်ႉသ်ပုၵ်ႉ။  ၶႃႈႁပ်ႉပဵၼ်ဢူၺ်းၵေႃႉသေ ၶႃႈဝူၼ်ႉဝႃႈ ၶႂ်ႈ လဵပ်ႈႁဵၼ်းဢိင်းၵလဵတ်ႈၼႆသေ ၶႃႈၾိုၵ်းဢုပ်ႇ/ တႅမ်ႈ လိၵ်ႈဢိင်းၵလဵတ်ႈတေႃႇမၼ်း။ ၵမ်းၼႆႉ မၼ်းၵေႃႈထၢမ်မႃးဝႃႈ ၶႃႈယူႇလႂ်ႁဵတ်းၵၢၼ်သင် ၼႆသေ ၽိူဝ်ႇၶႃႈလၢတ်ႈၼေယဝ်ႉမၼ်းသမ်ႉဝႃႈ   မၼ်းဢီးလူၶႃႈ ၊ ႁၼ်ၶႃႈတုၵ်ႉၶၸိူင်ႉၼႆ ၶႂ်ႈၸွႆႈထႅမ်ၶႃႈ၊ တေသူင်ႇၶူဝ်းတွၼ်ႈပၼ်ၶႃႈၼႆဝႃႇ။   ၶႃႈဝႃႈ ဢမ်ႇ ဢဝ် မၼ်းၵေႃႈ တဵၵ်းပၼ်တိၵ်းတိၵ်း။ ၼင်ႇႁိုဝ် ႁဝ်းၶႃႈ တေယုမ်ႇၶဝ်ၼၼ်ႉ ထႆႇႁၢင်ႈၶူဝ်းၶွင် ၸိူဝ်းၼၼ်ႉသေသူင်ႇမႃး။ ယဝ်ႉၵေႃႈ ႁွတ်ႈၽႅဝ် တီႈႁၢၼ်ႉ Shopping Center ဢၼ်ၼႆႉ ႁၢၼ်ႉၼၼ်ႉ တေသိုဝ်ႉဢၼ်ၼႆႉ ဢၼ်ၼၼ်ႉ ပၼ်သူၼႃႈ။ လိူဝ်ၼၼ်ႉ ထႆႇတီႈသူင်ႇၶွင်ၼွၵ်ႈ မိူင်းၼၼ်ႉ သေ သူင်ႇၶႅပ်းႁၢင်ႈမႃးထႅင်ႈ သူင်ႇၵႂႃႇယဝ်ႉၼႃႈ ၶူဝ်းတွၼ်ႈသူ။ ၼင်ႇႁိုဝ် ႁဝ်းၶႃႈ ပေႃးတေယုမ်ႇၶဝ်ၼၼ်ႉ ၶႃႈၵေႃႈ တိုၼ်းလၢမ်းႁူႉဝႆႉယဝ်ႉ ၶဝ် ပဵၼ်ၵူၼ်းလွၵ်ႇလႅၼ်ၵဝ်းၵိၼ်ၵူၺ်း”- ဝႃႈၼႆ။

ၶူဝ်းၶွင် ဢၼ်ၵူၼ်းလဵၼ်ႈၾဵတ်ႉသ်ပုၵ်ႉပွမ် ထႆႇသေ သူင်ႇမႃးၼႄမၼ်းၼၢင်းတူၺ်းၼၼ်ႉပဵၼ်ၶူဝ်းၼုင်ႈတင်းဝႆ၊ ၶိူင်ႈၸႂ်ႉ ၼၢင်းယိင်း၊ ငိုၼ်းတေႃႇလႃႇ၊ ၶမ်း၊ ၾူၼ်း I phone ၸိူဝ်းၼႆႉ ပဵၼ်ၶူဝ်းၶွင်သႅၼ်းၵႃႈၶၼ်ယႂ်ႇလူၼ်ႉလူၼ်ႉ။ 

ထိုင်မႃး ၼႂ်းဝၼ်းတီႈ 26 ၼႆႉ ၸုမ်းလွၵ်ႇလႅၼ်ၵဝ်းၵိၼ်ၼၼ်ႉ တၵ်ႉၶဝ်ႈမႃး ၸူးမၼ်းၼၢင်းသေ လၢတ်ႈဝႃႈ ၶူဝ်းတွၼ်ႈၼၼ်ႉထိုင်မိူင်းမၢၼ်ႈယဝ်ႉ။  ၵူၺ်းၵႃႈ တေလႆႈသဵင်ႈၵႃႈသူင်ႇမၼ်း 10 သႅၼ်ပျႃး။  ႁႂ်ႈဢူၼ်းငိုၼ်းပၼ်  ဝႃႈၼႆ။

“ၶႃႈႁူႉဝႆႉဝႃႈ ၶဝ်ယွၵ်ႇလႅၼ်ၶႃႈယဝ်ႉ ၶႃႈၵေႃႈ တိုၵ်ႉဢုပ်ႇၸွမ်းၶဝ်ယူႇ ၶႂ်ႈႁူႉဝႃႈ ၵူၼ်းၸုမ်းၼၼ်ႉ ၶဝ်တေသိုပ်ႇႁဵတ်းဢီႈသင်ထႅင်ႈ တေမႃးလၢႆးလႂ် ထႅင်ႈ  ၼႆသေ တိတ်းတၢမ်းၸွမ်းၶဝ်ထႅင်ႈ။ ထိုင်မႃး မိူဝ်ႈဝႃး ဝၼ်းတီႈ 26 ၼႆႉ လၢတ်ႈဝႃႈ ၶွင်တွၼ်ႈသူၽႅဝ်မိူင်းမၢၼ်ႈယဝ်ႉ ၵူၺ်းၵႃႈ တေလႆႈ သဵင်ႈငိုၼ်းၵႃႈသူင်ႇ 10 သႅၼ်ပျႃး။ ႁႂ်ႈဢူၼ်းပၼ် ၵေႃႉၼႆႉၵေႃႉၼၼ်ႉ မၼ်းႁပ်ႉၶွင်ဝႆႉပၼ်ယဝ်ႉၼႆ။ ၶႃႈၵေႃႈလႃႇၵႂႃႇၵမ်းလဵဝ်ၶႃႈဢေႃႈ ။ သူပႅတ်ႉလႅၼ် ၵဝ်းၵိၼ်ပိူၼ်ႈၵူၺ်း ၊ ႁဝ်းဢမ်ႇဢူၼ်းပၼ်လႆႈ ၼႆ။ ဝူၼ်ႉတူၺ်းၶႃႈလူး ၶဝ်ဢမ်ႇႁူႉၸၵ်းႁဝ်း သမ်ႉဝႃႈသူင်ႇၶူဝ်းတွၼ်ႈမႃးပၼ်ႁဝ်းၶႃႈၼႆႉ သမ်ႉပဵၼ် ၶူဝ်းၶွင် ၵႃႈၶၼ်ယႂ်ႇလၢႆလၢႆ ၸွင်ႇမၼ်းလႅပ်ႈပဵၼ်လႆႈယူႇၼႆ။”- မၼ်းၼၢင်း သိုပ်ႇလၢတ်ႈၼႄၼင်ႇၼႆ။

ဝၢႆးသေ မၼ်းၼၢင်း တွပ်ႇလၢတ်ႈ/ လႃႇၵႂႃႇၶိုၼ်းၼႂ်းၾဵတ်ႉသ်ပုၵ်ႉယဝ်ႉၼၼ်ႉ ၾၢႆႇပုၼ်ႉၶိုၼ်းလွၵ်ႇငိုတ်ႈမႃးဝႃႈ သင်ဢမ်ႇႁပ်ႉၶူဝ်းၶွင် ဢမ်ႇဢူၼ်းငိုၼ်း ပၼ်ၸိုင် တေသူင်ႇမႅင်းဝႆႊရတ်ႊ ၶႃႈႁႅမ်တၢႆ ၼႆထႅင်းလူးၵွၼ်ႇ။

“ဝၢႆးသေ ၶႃႈတႅမ်ႈတွပ်ႇ/ လႃႇၵႂႃႇယဝ်ႉ ၵမ်းၼိုင်ႈ ၶဝ်ၶိုၼ်းတွပ်ႇမႃးဝႃႈ ပေႃးသူဢမ်ႇႁပ်ႉၶွင်တွၼ်ႈ ႁဝ်းၼႆ သူတေတၢႆ ၊ ဢဝ်ႁၢင်ႈၵႃႈတုၼ်း ၶႃႈႁႅမ်ၵၼ်ၼၼ်ႉသူင်ႇမႃးပၼ်ၶႃႈ။ ၶႃႈၵေႃႈ တွပ်ႇဝႃႈ ႁဝ်းယုမ်ႇယမ်ပုတ်ႉထၽႃႇသႃႇ ႁဝ်းဢမ်ႇၵူဝ်လေႃႇ ၸိူင်ႉၼၼ် ၼႆသေ ပလွၵ်ႊပႅတ်ႈ ၾဵတ်ႉသ်ပုၵ်ႉၶဝ်ၶႃႈဢေႃႈ။ သင်ဝႃႈ ၵူၼ်းမိူင်းႁဝ်းဢမ်ႇႁူႉၶိုတ်းတၼ်းသေ ဢူၼ်းငိုၼ်းပၼ်ၶဝ်ၶႃႈလူး ဢမ်ႇသုမ်းလၢႆလၢႆယဝ်ႉၶႃႈႁိုဝ်လႃႇၼေႃႈ။ ၸုမ်းၶဝ်ၼႆႉ ဢမ်ႇလႅပ်ႈမီးၵေႃႉလဵဝ် လႅပ်ႈတေပႃးၵူၼ်းၼွၵ်ႈမိူင်း ၵူၼ်းမိူင်းမၢၼ်ႈ ႁူမ်ႈၵၼ်သေ ႁဵတ်း။ ၵွၼ်ႇၼႃႈၼၼ်ႉ ၼင်ႇႁိုဝ် ႁဝ်းတေယုမ်ႇၶဝ်ၼၼ်ႉ ၶဝ်ပၢႆႁွင်ႉ VDO call မႃးတၢင်း Messenger လူးၵွၼ်ႇဢေႃႈ။ ပဵၼ်ၵူၼ်း ၼွၵ်ႈမိူင်းၶႃႈ ဢၼ်ထူဝ်းမႃးသေ ၶႃႈလႆႈႁၼ်ၼႃႈၼၼ်ႉ”- မၼ်းၼၢင်း သိုပ်ႇလၢတ်ႈၼႄၼင်ႇၼႆ။

 လွင်ႈလွၵ်ႇၵဝ်းလႅၼ်ၵိၼ်ၵၼ်ၼိူဝ်ၾဵတ်ႉပုၵ်ႉၸိူင်ႉၼႆၼႆႉ ၵူၼ်းမိူင်းလၢႆးၶႃႈ ပွၵ်ႉ 4 ထႅင်ႈၵေႃႉၼိုင်ႈၵေႃႈ ယၢမ်ႈၺႃးမႃးမိူၼ်ၵၼ်။ ၵူၺ်းၵႃႈ မၼ်းၼၢင်းၵေႃႈ တၼ်းႁူႉတူဝ်ဝႆးသေ ဢမ်ႇထိုင်တီႈလႆႈဢူၼ်းငိုၼ်းပၼ် ၼင်ႇၵဝ်ႇ။

“တေႃႈလဵဝ် ငိုၼ်းတွင်းၼႆႉ မၼ်းႁႃယၢပ်ႇၼႃႇ ၵူၼ်းယွၵ်ႇလႅၼ်ၵဝ်းၵိၼ်ၸိူင်ႉၼႆႉ မီးၼမ်လႄႈ လွင်ႈသင်ၵေႃႈယဝ်ႉ ယႃႇၵိုင်ႉၵၢင်ႉ ၼႅတ်ႈယုမ်ႇငၢႆႈ ၵူဝ်တူၵ်းလွၵ်းပိူၼ်ႈၵႂႃႇၶႃႈဢေႃႈ”- မၼ်းၼၢင်းတႄႉ တုၵ်းသူၼ်း လၢတ်ႈၼႄၼင်ႇၼႆ။

မိူၼ်ၼႆၼင်ႇၵဝ်ႇ ပူၼ်ႉမႃး4-5 လိူၼ်ၼႂ်းပီၼႆႉ  ၸဝ်ႈၶူးၼၼ်ႇတႃႇသီႇရိ ၸႄႈဝဵင်းတၢင်ႉယၢၼ်း ၸူဝ်ႈၶၢဝ်းဝဵင်းတႃႈၵုင်ႈၵေႃႈ မီးၵူၼ်းၼွၵ်ႈမိူင်း ၵေႃႉၼိုင်ႈ သူင်ႇၶူဝ်းတွၼ်ႈ ပၼ် ႁဵတ်းၸိူင်ႉၼႆသေ တေလႆႈပၼ်ၵႃႈသူင်ႇၶွင် ငိုၼ်း 600 တေႃႊလႃႊ တူၵ်းငိုၼ်းမၢၼ်ႈ 9 သႅၼ်ပျႃး မၼ်းၸဝ်ႈဢူၼ်းငိုၼ်းပၼ်ၵႂႃႇ မိူဝ်း ဝၼ်းတီႈ 31/5/2021 ၼၼ်ႉသေ ႁၢၼ်ႉတေႃႇထိုင်ယၢမ်းလဵဝ် ဢမ်ႇလႆႈၶူဝ်းၶွင်သင် ။ ၵပ်းသိုပ်ႇတိတ်းတေႃႇၵေႃႈ ဢမ်ႇလႆႈ။ ၼၼ်ႉၵေႃႈဝႃႈ သူင်ႇ ၶူဝ်းတွၼ်ႈမႃးပၼ် ၶွမ်း Apple ၼိုင်ႈလုၵ်ႈ၊ ၾူၼ်း Iphone 12 ၼိုင်ႈလုၵ်ႈ၊ ၶူဝ်းၸႂ်ႉတိုဝ်းတႃႇတူဝ်ၸဝ်ႈၵဝ်ႇ၊ ငိုၼ်းတေႃႊလႃႊ USD တႃႇ 50,000  ဝႃႈၼႆသေတႃႉ ပဵၼ်ၸုမ်းဢၼ်ၵဝ်းလႅၼ်ၵိၼ်ၵၼ်ၼိူဝ်ၾဵတ်ႉသ်ပုၵ်ႉၵူၺ်း – ၸဝ်ႈၶူးဢဝ်မဵတ်ႉတႃႇၸေႇတၼႃႇလီသေ ပၼ်ၾၢင်ႉဢွၵ်ႇၶၢဝ်ႇပၼ်ယဝ်ႉၵမ်းၼိုင်ႈ။