သိုၵ်းမၢၼ်ႈယိုတ်းမိူင်းမႃးၶၢဝ်းတၢင်း 7 လိူၼ်ပၢႆၼႆႉ ၸွမ်းသဵၼ်ႈတႃႈသၢႆတၢင်းၼႂ်းမိူင်းတႆး ၶိုၼ်းမီးၵဵတ်ႉ/လၢၼ်ႇ သိုၵ်းမၢၼ်ႉပႂ်ႉၵူတ်ႇထတ်းၵူၼ်းမိူင်းၵႂႃႇမႃးၼမ်ၶိုၼ်ႈမႃးၶိုၼ်း။

မိူၼ်ၼင်ႇ သဵၼ်ႈတၢင်း ပၢင်လူင် လၢႆးၶႃႈ မိူင်းၼွင် မိူင်းသူႈ၊ သဵၼ်ႈတၢင်း တူၼ်ႈတီး ၼမ်ႉၸၢင် ၶူဝ်လမ် ၵုၼ်ႁိင်း တႃႈၵေႃႈ မိူင်းပဵင်း ၵဵင်းတုင် တႃႈၶီႈလဵၵ်း။

သဵၼ်ႈတၢင်း ၼမ်ႉၸၢင် မိူင်းၼၢႆး လၢင်းၶိူဝ်း မိူင်းပၼ်ႇ တႃႈၸၢင်ႉ မိူင်းတူၼ် ပုင်ႇပႃႇၶႅမ်၊ ပႃးၸဵမ်သဵၼ်ႈတၢင်း ပုင်ႇပႃႇၶႅမ် မိူင်းတူၼ် မိူင်းသၢတ်ႇတႃႈၶီႈလဵၵ်းၸိူဝ်းၼႆႉ ၵဵတ်ႉလၢၼ်ႈ ၼမ်မႃးၵူႈတီႈ။

မိူၼ်ၼင်ႇ ၼႂ်းၵႄႈ ဝဵင်းၶူဝ်လမ် – ၼမ်ႉ ၸၢင် ၶၢဝ်းတၢင်းၵႆ 32 လၵ်းၼၼ်ႉ မီးၵဵတ်ႉၵူတ်ႇထတ်း 3 တီႈ။

 ၼႂ်းၵႄႈၼမ်ႉၸၢင် – ၶူဝ်လမ် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼႆႉ ယၢမ်းလဵဝ် ၶွင်ႇသီႇသိုၵ်းမၢၼ်ႈ ယိုတ်းမိူင်း တင်ႈလၢၼ်ႇ/ ၵဵတ်ႉဝႆႉ တၢင်းၶဝ်ႈဢွၵ်ႇဝဵင်းၼမ်ႉၸၢင် – ၶူဝ်လမ် တီႈၼိုင်ႈ၊ တီႈၶူဝ်တႃႈသၢႆး တီႈၼိုင်ႈလႄႈ တၢင်းၽႄၼမ်ႉ ႁူး တီႈၼိုင်ႈ ။

ၵူၼ်းၼုမ်ႇပိုၼ်ႉတီႈ ၶူဝ်လမ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်တင်ႈလၢၼ်ႇမႂ်ႇထႅင်ႈတႄႉ ပဵၼ်တီႈ ၶူဝ်တႃႈ သၢႆးၼၼ်ႉၶႃႈဢေႃႈ။ တိုၵ်ႉႁႃတင်ႈမႃး ဝၢႆးၶဝ်တီႉလႆႈၸုမ်း PDF ၼၼ်ႉၵူၺ်း။ ႁဝ်းၶႃႈထၢင်ႇတႄႉ တေမီးမွၵ်ႈလိူၼ်ပၢႆၼႆႉ ၵူၺ်း။ တီႈလၢၼ်ႇၼၼ်ႉ ၶဝ်ထၢမ် ၵူၼ်းၵႂႃႇမႃးၶႃႈ လုၵ်ႉတီႈလႂ်မႃး တေၵႂႃႇတီႈလႂ် မႃးၵၼ်လႂ်ၵေႃႉ ၼႆၸိူဝ်းၼႆႉၶႃႈ”- ဝႃႈၼႆ။

ၼႂ်းၵႄႈသွင်ဝဵင်းၼႆႉ ယၢၼ်ၵႆၵၼ် 32 လၵ်းၵူၺ်း  သိုၵ်းမၢၼ်ႈတင်ႈလၢၼ်ႇ/ၵဵတ်ႉ ပဵၼ် 3-4 တီႈ ႁဵတ်းႁႂ်ႈၵူၼ်းမိူင်း ၸဝ်ႈၵႃး  ၵႂႃႇမႃးယၢပ်ႇၽိုတ်ႇၵူၺ်းယဝ်ႉ ဝႃႈၼႆ။

“တီႈၵဵတ်ႉလၢၼ်ႇ တၢင်းၶဝ်ႈၼမ်ႉၸၢင်ၼၼ်ႉတႄႉ   မၢင်ပွၵ်ႈၵေႃႈပႂ်ႉ၊ မၢင်ပွၵ်ႈ ဢမ်ႇပႂ်ႉ၊ မၢင် ပွၵ်ႈမီးၵူၼ်းယူႇၵေႃႈ ဢမ်ႇၸႅတ်ႈထၢမ် ဢမ်ႇထတ်းသင် ယၢမ်းလဵဝ်ၼႆႉတႄႉ လႅပ်ႈတေပႂ်ႉသေ ၵူတ်ႇထတ်း ၵူၼ်းၶဝ်ႈဢွၵ်ႇ ၵႂႃႇမႃးယူႇ”-  ၵူၼ်း ၶူဝ် လမ် ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈၼင်ႇၼႆ။

တင်ႈဢဝ်သိုၵ်းမၢၼ်ႈယိုတ်းမိူင်းမႃးၵူၼ်းမိူင်းၵူႈဝဵင်းၵူႈတီႈ ၼႄၵၢင်ၸႂ်သၢၼ်ၶတ်းသိုၵ်းမၢၼ်ႈ။ ၽွင်းၼၼ်ႉ မေႃယႃလႄႈ ၶႃႈႁၢပ်ႇၵၢၼ်ၶုၼ်ဢွၼ်ၵၼ်ႁဵတ်း CDM  လႄႈ တၢင်းပဵၼ်ၶူဝ်ႊဝိတ်ႉၵေႃႈ ဢမ်ႇမီးၽႂ်ၵူတ်ႇထတ်းပၼ်။ ၵႃႈပဵၼ်ၵဵတ်ႉ/လၢၼ်ႇၵူတ်ႇထတ်းၶူဝ်ႊဝိတ်ႉ ယႃႉ/လိုဝ်ႈ ပႅတ်ႈမူတ်း။ ၵူၺ်းၵႃႈ ထိုင်မႃးမွၵ်ႈႁၢင်လိူၼ်မေႊ ဝၢႆးလင် သိုၵ်းယိုတ်းမိူင်းၶွတ်ႇၽွတ်ႈၶွင်ႇသီႇၽွင်းငမ်းမိူင်းယဝ်ႉသေ ၶိုၼ်းမီးႁွင်ႈၵၢၼ်ၽွင်းလူင် လူင်ပွင်ၸိုင်ႈယဝ်ႉၼၼ်ႉ ၾၢႆႇၶွင်ႇသီႇသိုၵ်းပိုၼ်ၽၢဝ်ႇဝႃႈ တၢင်းပဵၼ်ၶူဝ်ႊဝိတ်ႉလၢမ်းၽႄႈၶိုၼ်း။ ၾၢႆႇၼိုင်ႈ   သိုၵ်းၵႅတ်ႇၶႄၵူၼ်းမိူင်း  PDF ၵေႃႈပိုၼ်ၽၢဝ်ႇၶွတ်ႇၽွတ်ႈဝႆႉၼႂ်းၸိုင်ႈတႆးပွတ်းၸၢၼ်းၼႆလႄႈ သိုၵ်းမၢၼ်ႈဢဝ်တိုဝ်ႉတၢင်း တႃႇၵူတ်ႇထတ်းၶူဝ်ႊဝိတ်ႉၼႆသေ တင်ႈပႃးလၢၼ်ႇတႃႇ  ၵူတ်ႇထတ်းၵူၼ်းမိူင်း ၸိူဝ်းဢွၵ်ႇတႃႈပႆတၢင်းၵမ်ႈၼမ်။   

တၢင်းၶဝ်ႈဝဵင်းတူၼ်ႈတီး ၼႂ်းၵႄႈ ႁူဝ်ပူင်း- တူၼ်ႈတီး ၶၢဝ်းတၢင်း 7 လၵ်း ၵူၺ်းၵေႃႈ မီးၵဵတ်ႉလူင် ၵူတ်ႇထတ်း 2 တီႈ။

တီႈၵဵတ်ႉလၢၼ်ႇ ဢၼ်ၵူတ်ႇထတ်း ၶူဝ်ႊဝိတ်ႉ 19 ၵေႃႈ မီးသိုၵ်းငႃၵွင်ႈ ပႂ်ႉၵူတ်ႇထတ်းတူၺ်းၸွမ်းၵူၼ်းၵႂႃႇမႃး ၶဝ်ႈဢွၵ်ႇ ၵူႈဝဵင်း။