ၽူႈၵွၼ်းၸႄႈတွၼ်ႈမႄႈႁွင်ႈသွၼ်လႄႈ ၾၢႆႇၵဵဝ်ႇၶွင်ႈႁွင်ႈၵၢၼ်ၾၢႆႇၼႂ်းမိူင်း မွပ်ႈယိုၼ်ႈဝႂ်ထႆးပၼ် တီႈလုၵ်ႈလၢၼ်ၸၢဝ်းၶိူဝ်း ၸိူဝ်းၵိူတ်ႇၼႂ်းမိူင်းထႆး 400 ၵေႃႉပၢႆ။

ၸၢႆးသိုပ်ႇသၵ်ႇ ဢဵမ်ႇဝိၸၢရ်ႊ ၽူႈၵွၼ်းၸႄႈတွၼ်ႈမႄႈႁွင်ႈသွၼ်လႄႈ ၸၢႆးၽိသိတ်ႇ ၵိတ်ႇၿုၼ်းဢၼၼ်ႊ ၽူႈၵွၼ်းၸႄႈဝဵင်းမိူင်း မႄႈႁွင်ႈသွၼ် ပဵၼ်ၵဝ်ႉၵၼ်းသေ မိူဝ်ႈဝၼ်းတီႈ 07/02/2018 ၼႆႉ မွပ်ႈယိုၼ်ႈပၼ် မၢႆၾၢင်(ဝႂ်)ထႆး တီႈလုၵ်ႈလၢၼ်ၸၢဝ်းၶိူဝ်း ဢၼ်ၵိူတ်ႇ ၼႂ်းမိူင်းထႆး တႃႇ 417 ၵေႃႉ တီႈလုမ်း ၸႄႈဝဵင်းမိူင်း မႄႈႁွင်ႈ သွၼ် မိူင်းထႆးတွၼ်ႈၼိူဝ် မီးပူႇၵၢင်ႉ ပူႇၵႄႇဝၢၼ်ႈလႄႈၵူၼ်းလူင် ၼႂ်းဢိူင်ႇဝၢၼ်ႈ ၶဝ်ႈႁူမ်ႈပဵၼ်လၵ်းထၢၼ် ၽူႈႁူႉၸွမ်းႁၼ်ၸွမ်း ။

ၸိူဝ်းဢၼ်လႆႈႁပ်ႉဝႂ်ထႆးၵႂႃႇၼႆႉ ပဵၼ်ၸၢဝ်းၶိူဝ်းဢမ်ႇၼၼ်ႁႅင်းၵၢၼ် ဢၼ်ယူႇၼႂ်းပိုၼ်ႉတီႈ ဢိူင်ႇပၢင်မူ၊ ဢိူင်ႇၵျွင်း ၶမ်း၊ ဢိူင်ႇမွၵ်ႇၸမ်ႇပႄႇ၊ ၽႃပွင်ႇ၊ ႁူၺ်ႈၽႃ၊ ႁူၺ်ႈပူင်ႇ ၸႄႈဝဵင်းမိူင်း ၸႄႈတွၼ်ႈ မႄႈႁွင်ႈသွၼ် မိူင်းထႆးတွၼ်ႈၼိူဝ်။

ၸၢႆးသိုပ်ႇသၵ်ႇ ဢဵမ်ႇဝိၸၢရ်ႊ လၢတ်ႈဝႃႈ – “ ၵူၼ်းဢၼ်မႃးတၢင်ႇယိုၼ်ႈယွၼ်းၼႆႉၼမ် တၢင်းယၢပ်ႇ ဢၼ်ႁဝ်း ၶႃႈႁူပ်ႉတႄႉၵေႃႈ ႁႃလၵ်းထၢၼ်မၼ်းယၢပ်ႇၼႃႇ ၊ ၶၵ်ႉတွၼ်ႈတႃႇႁဵတ်းဝႂ်ပၼ် လုၵ်ႈလၢၼ် ၸၢဝ်းၶိူဝ်းဢမ်ႇၼၼ်ႁႅင်း ၵၢၼ်ၼႆႉ မီးပၵ်းပိူင်ဝႆႉယူႇယဝ်ႉ။ တၵ်းလႆႈမီးလၵ်းထၢၼ် ဢၼ်ပဵၼ်တႄႉ မီးတႄႉၼၼ်ႉၵူၺ်း ။ ယႃႇပေလႃႈလီႈ ဢဝ်လၵ်းထၢၼ်ဢၼ်ပွမ်မၼ်းမႃးယိုၼ်ႈလႃးလႃး။ ပေႃးဢမ်ႇ ၼၼ်တေၺႃးတၢမ်ႇ ၽူႈမီးပုၼ်ႈၽွၼ်းဢၼ်ၵဵဝ်ႇၶွင်ႈ ၵိၼ်ငိုၼ်းသူး ငိုၼ်းလၢပ်ႈၵေႃႈ တၵ်းလႆႈႁပ်ႉ တၢမ်ႇၼၵ်းၼႃယဝ်ႉ ” ဝႃႈၼႆ ။

ပူၼ်ႉမႃးမိူဝ်ႈဝၼ်းတီႈ 12/09/2017 ၼၼ်ႉၵေႃႈ ၽွင်းလူင်ၾၢႆႇၼႂ်းမိူင်း လႆႈမွပ်ႈယိုၼ်ႈပၼ်ဝႂ်ထႆး တီႈလုၵ်ႈလၢၼ် ၸၢဝ်းၶိူဝ်း ၸိူဝ်းၵိူတ်ႇၼႂ်းမိူင်းထႆး 548 ၵေႃႉၼႂ်းၸႄႈဝဵင်းမႄႈႁွင်ႈသွၼ် မိူင်းထႆး တွၼ်ႈၼိူဝ်။