ၵူၼ်းၼုမ်ႇတႆး ပွတ်းႁွင်ႇ လၢႆမူႇလၢႆၸုမ်း ႁူမ်ႈၵၼ် ၵႂႃႇၵႃရဝ ၼပ်ႉယမ် ၶုမ်ၵုတ်းၻွၵ်ႊတိူဝ်ႊ ၸၢႆးပႃႉၺၢၼ်ႇ တီႈၸႄႈဝဵင်းသီႇပေႃႉ တႃႇပဵၼ် တီႈမၢႆတွင်းဝၼ်းၵူၼ်းၼုမ်ႇတႆး (Tai Youth Day) ပဵၼ်ပွၵ်ႈၵမ်းႁႅၵ်ႈ မီးၵူၼ်း ၼုမ်ႇၶဝ်ႈႁူမ်ႈ ႁိမ်း 70 ၵေႃႉ ဝႃႈၼႆ။
ဝၼ်းတီႈ 01/03/2018 ယၢမ်းၵၢင်ၼႂ် 9 မူင်း ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network (TYN) ဢွၼ်ႁူဝ် ၼမ်းၼႃႈ ၵူၼ်းၼုမ်ႇၼႂ်းပိုၼ်ႉတီႈ ႁူမ်ႈၵၼ်ၵႂႃႇၶဝ်ႈႁူမ်ႈၵႃရဝ ၼပ်ႉယမ် ၶုမ်ၵုတ်း ၻွၵ်ႊတိူဝ်ႊ ပႃႉၺၢၼ်ႇ တီႈ ပွၵ်ႉသၶၢၼ်းသႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယိူင်းဢၢၼ်း တႃႇပဵၼ် တီႈ မၢႆတွင်းဝၼ်းၵူၼ်းၼုမ်ႇတႆး ဝႃႈၼႆ။
ၸၢႆးတဵင်း ၵႅမ်ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁဝ်းၶႃႈ ဢွၼ်ၵၼ် ၵႂႃႇၼပ်ႉယမ် ၶုမ်ၵုတ်း ၻွၵ်ႊတိူဝ်ႊလုင်းၸၢႆးပႃႉၺၢၼ်ႇ၊ ႁူမ်ႈၵၼ်ႁွင်ႉၽဵင်းၵႂၢမ်း တၢင်ႇတုင်းၸိူဝ်ႉၸၢတ်ႈ၊ သပ်းလႅင်း ၼႄလွင်ႈတုင်းၸိူဝ်ႉၸၢတ်ႈလႄႈ ၵပ်းသိုပ်ႇၼႄႉၼမ်းတူဝ်ပၼ်ၵၼ် ၸဵမ်ၸိူဝ်းၼႆႉ။ လွင်ႈႁၢၼ်ႉၸႂ်တႄႉၵေႃႈ တေ လႆႈဝႃႈ ပီၼႆႉႁဝ်းၵေႃႈ ဢမ်ႇလႆႈႁၢင်ႈႁႅၼ်းသင်တႄႉတႄႉ။ ပီၼႆႉတႄႉ တေလႆႈဝႃႈ ပဵၼ်ပီတႄႇမၼ်းၵူၺ်း။ ပေႃးပီၼႃႈၾႃႉမႂ်ႇမႃးတႄႉ တေႁၢင်ႈႁႅၼ်းၸတ်းႁဵတ်း ဢၼ်ၶိုၵ်ႉၶႅမ်ႉမၼ်းယူႇၶႃႈ” ဝႃႈၼႆ။
ၵူၼ်းၼုမ်ႇတႆး ဢၼ်ၵႂႃႇၶဝ်ႈႁူမ်ႈၵႃရဝ တီႈၶုမ်ၵုတ်းၻွၵ်ႊတိူဝ်ႊၸၢႆးပႃႉၺၢၼ်ႇၼၼ်ႉ မီးၵူၼ်းၼုမ်ႇ ၼႂ်းပိုၼ်ႉတီႈ သီႇပေႃႉ၊ ၼမ်ႉလၼ်ႈ၊ ၵျွၵ်ႉမႄး၊ မိူင်းသူႈ၊ မိူင်းယေႃ၊ လႃႈသဵဝ်ႈ၊ ထုင်ႉပဵင်း လႄႈ ဢိၵ်ႇထႅင်ႈလၢႆလၢႆၸႄႈဝဵင်း ၼွၵ်ႈလိူဝ်ၼၼ်ႉ ၸုမ်းၵပ်းသၢၼ်လွင်ႈၼၢင်း ယိင်းတႆး SWAN ၵေႃႈ ၵႂႃႇၶဝ်ႈႁူမ်ႈပႃး ဝႃႈၼႆ။
ၼႂ်းဝၼ်းၵူၼ်းၼုမ်ႇတႆး Tai Youth Day ၼႆႉ ၵူၼ်းၼုမ်ႇၼႂ်းမိူင်းတႆး ဢွၼ်ၵၼ်တူင်ႉၼိုင် တႃႇပဵၼ်တီႈမၢႆတွင်း ဝၼ်းၵူၼ်းၼုမ်ႇတႆး။ ၵူၼ်းၼုမ်ႇမၢင်ၸႄႈဝဵင်း ဢွၼ်ၵၼ်ၵႂႃႇလုမ်းလႃး တူၼ်ႈမွၵ်ႇၵွၼ်၊ ၵဵပ်းယုၵ်းယၵ်း မိူၼ်ၼင်ႇ ၵူၼ်းၼုမ်ႇၸႄႈဝဵင်းလႃႈသဵဝ်ႈ ႁူမ်ႈၵၼ်ၵႂႃႇလုမ်းလႃးတူၼ်ႈမွၵ်ႇၵွၼ်၊ ၵူၼ်းၼုမ်ႇမိူင်းသူႈသမ်ႉ ဢွၼ်ၵၼ်ၵႂႃႇ ၽဵဝ်ႈယုၵ်းယၵ်းတီႈတၢတ်ႇႁၢႆးပႃ၊ ၵူၼ်းၼုမ်ႇလၢႆးၶႃႈၵဵပ်းယုၵ်းယၵ်း တီႈၼမ်ႉၼွင်ၶမ်း ၸဵမ်ၸိူဝ်းၼႆႉ ဝႃႈၼႆ။
ၼွၵ်ႈလိူဝ်ၼၼ်ႉ ၵူၼ်းၼုမ်ႇ ၼႂ်းၵေႃႁူမ်ႈသၢင်ႈၵူၼ်းၼုမ်ႇတႆး TYN ႁူမ်ႈၵၼ်ၸတ်းႁဵတ်းပၢင်ဢုပ်ႇၶႆႈပိုၼ်းႁူႉပၢႆးႁၼ် တီႈဝၢၼ်ႈႁူၺ်ႈ ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း မီးၽူႈၶဝ်ႈႁူမ်ႈထွမ်ႇငိၼ်း တင်းၼမ်လၢႆ။ ၼႂ်းပၢင်ဢုပ်ႇၶႆႈၼၼ်ႉ ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈ တင်း ၶုၼ်ယုင်းၶဵဝ် ၽူႈၼၢမ်းထတ်း ၽိုၼ်ၶၢဝ်ႇ သႅၼ်ပၢႆးၵေႃႈ ၶဝ်ႈႁူမ်ႈပႃး ဝႃႈၼႆ။
ဝၼ်းၵူၼ်းၼုမ်ႇတႆးၼႆႉ ယူႇတီႈၵူၼ်းၼုမ်ႇၼႂ်းမိူင်းတႆးလႄႈ မိူင်းႁူမ်ႈတုမ်ပတ်းပိုၼ်ႉ လႆႈၸႂ်ၵၼ်သေ ပိုၼ်ၽၢဝ်ႇဝႃႈ ဢဝ်ဝၼ်း ၵိူတ်ႇၻွၵ်ႊတိူဝ်ႊပႃႉၺၢၼ်ႇ (ၽူႈႁၵ်ႉလိၵ်ႈလၢႆးပၢႆပေႇတႆး၊ ၽူႈတႅင်ႇတႅမ်ႈၽဵင်းတၢင်ႇတုင်းၸိူဝ်ႉၸၢတ်ႈ ၶိူဝ်းတႆးၶိူဝ်းရႃႇၸႃႇ) ဝၼ်းတီႈ 1 လိူၼ်မၢတ်ႊၶျ်ၼၼ်ႉ မၵ်းမၼ်ႈပဵၼ်ဝၼ်းၵူၼ်းၼုမ်ႇတႆး တီႈပၢင်ၵုမ်လူင်ၶွၼ်ႊ ၾရႅၼ်ႊ တီႈၸႄႈဝဵင်းပႃႇၵိူဝ် မိူဝ်ႈႁၢင်ပီ 2017 ၼၼ်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ