ၵူၼ်းၼုမ်ႇ သီႇပေႃႉ ဢမ်ႇၸၢင်ႈဢွၵ်ႇၼႄၵၢင်ၸႂ် မီးၶၢဝ်းတၢင်းဝူင်ႈပၢႆယဝ်ႉ ယွၼ်ႉၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ၵူတ်ႇထတ်းလမ်းတီႉၺွပ်း ႁၢဝ်ႈႁႅင်း။
တႄႇဢဝ် ၵၢင်လိူၼ်မေႊ 2021 ၼႆႉမႃး ၵူၼ်းၼုမ်ႇ သီႇပေႃႉ ဢမ်ႇၸၢင်ႈ ဢွၵ်ႇၼႄၵၢင်ၸႂ် သၢၼ်ၶတ်းတေႃႇ ၶွင်ႇသီႇသိုၵ်းမၢၼ်ႈ မိူၼ်မိူဝ်ႈၵူႈပွၵ်ႈ။ ယွၼ်ႉဝႃႈ ၸွမ်းၼႂ်းၵိဝ်ႇၼႂ်းသွႆး ၼႂ်းၵၢင်ဝဵင်း သီႇပေႃႉ သိုၵ်းမၢၼ်ႈ ပႂ်ႉၵူတ်ႇထတ်းလႄႈ လမ်းတီႉၺွပ်းၵူၼ်းၼုမ်ႇဢွၵ်ႇၼႄၵၢင်ၸႂ် မႃးႁၢဝ်ႈႁႅင်း ၼႆယဝ်ႉ။
ၵူၼ်းၼုမ်ႇ သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ ဢမ်ႇၼႄၵၢင်ၸႂ်ပႆတၢင်း မႃးၼႆႉ မီးၶၢဝ်းတၢင်း ဝူင်ႈပၢႆၼႆႉယဝ်ႉ ပလိၵ်ႈသိုၵ်းၸိူဝ်းၼႆႉ ပႂ်ႉလမ်းတီႉၵူၼ်းၼုမ်ႇ ႁၢဝ်ႈႁႅင်းၶႃႈဢေႃႈ။ မၢင်ပွၵ်ႈမႃး လမ်းတီႉၽႅဝ်ၼႂ်းႁိူၼ်း ယေးၶႃႈ။ ၵူၺ်းၵႃႈ ႁဝ်းၶႃႈ တႄႉ ယူႇတီႈႁိူၼ်းယေးၽႂ်မၼ်း ဢွင်ႈတီႈၽႂ်မၼ်းသေ တူင်ႉၼိုင် ၼႄၵၢင်ၸႂ်ၵႂႃႇယူႇၶႃႈ ဢမ်ႇလၢႆးၼိုင်ႈၵေႃႈ ဢဝ်လၢႆးၼိုင်ႈၶႃႈ”- ဝႃႈၼႆ။
ထႅင်ႈၾၢႆႇၼိုင်ႈၵေႃႈ ယူႇတီႈတူဝ်ပိဝ်ႇႁႃႇ ၶွင်ႇသီႇသိုၵ်းမၢၼ်ႈ သီႇပေႃႉ လူင်းပိုၼ်ႉတီႈ လမ်းတီႉ ၺွပ်း ၵူၼ်းၼုမ်ႇဢွၵ်ႇၼႄၵၢင်ၸႂ် ၵမ်းလဵဝ် ဝႃႈၼႆ။
“ယူႇတီႈၽူႈၵွၼ်းတိူင်း ၸီႉသင်ႇ ႁႂ်ႈတူဝ်ပိဝ်ႇႁႃႇ လူင်းပိုၼ်ႉတီႈ ၵူတ်ႇထတ်းတီႉၺွပ်း ၵူၼ်းၼႄၵၢင်ၸႂ် ။ ပေႃးၶဝ်ၵႂႃႇတီႉၺွပ်းၼႆ ၶဝ်ယင်းဢမ်ႇပွင်ႇၶၢဝ်ႇၸူးပလိၵ်ႈလႄႈ သိုၵ်းၼႂ်းပိုၼ်ႉတီႈ ႁႂ်ႈလႆႈႁူႉၸွမ်းၶေႃႈမုလ်းသင်၊ ယၢမ်းလဵဝ် ပဵၼ်တူဝ်ပိဝ်ႇႁႃႇၵမ်းလဵဝ်ယဝ်ႉ ႁဵတ်းၵၢၼ်”- ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၵေႃႉၼိုင်ႈလၢတ်ႈ။
ပၢင်ၼႄၵၢင်ၸႂ် သၢၼ်ၶတ်းတေႃႇၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းမိူင်း တီႈသီႇပေႃႉၼႆႉ ဝၢႆးသိုၵ်းမၢၼ်ႈ ယိုတ်းမိူင်းမႃး မိူဝ်ႈဝၼ်းတီႈ 1/2/2021 ၼၼ်ႉသေ ၵူၼ်းမိူင်း/ၵူၼ်းၼုမ်ႇ သီႇပေႃႉ လုၵ်ႉၼႄၵၢင်ၸႂ်မႃး ႁၢဝ်ႈႁႅင်း ၵူၼ်းၼုမ်ႇ ထုၵ်ႇၶွင်ႇ သီႇသိုၵ်းမၢၼ်ႈ မိူၵ်ႈမႂ်ႈ ၸႂ်ႉလၢႆးႁုၵ်းႁၢႆႉသေ တီႉၺွပ်း ဢမ်ႇယွမ်း 10 ထုၵ်ႇယိုဝ်းတၢႆ 1 ၵေႃႉလႄႈ မၢတ်ႇၸဵပ်း 1 ၵေႃႉ ၼႆ ယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ