ၼႂ်းၶၢဝ်းၶိဝ်းၼႆႉ သဵင်တႅၵ်ႇသဵင်လင်ၼႂ်းၸႄႈဝဵင်းၼမ်ႉၶမ်းဢမ်ႇထၢတ်ႇ၊ မိူဝ်ႈဝႃးယၢမ်းၵၢင်ၶိုၼ်း ၼႂ်းၶၢဝ်းတၢင်း 3 မိၼိတ်ႉၵူၺ်းသဵင်တႅၵ်ႇမေႃးထပ်းၵၼ် 4 ၵမ်းၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၵူၼ်းမိူင်းတူၵ်းၸႂ်ၵူဝ်ႁႄ။

 ဝၼ်းတီႈ 17/5/2021  ယၢမ်းၵၢင်ၶိုၼ်းလိုၵ်း မွၵ်ႈ 12 မူင်းပၢႆၼၼ်ႉ သဵင်တႅၵ်ႇၼႂ်းၸႄႈဝဵင်းၼမ်ႉၶမ်း  ထပ်းၵၼ် 4 ၵမ်း ႁိူၼ်းယေးပေႃးသႂ်ႇဝႆ။ ၵူၼ်းမိူင်းလွမ်မႆႈၸႂ် ၵူဝ်တေႃႈလွတ်ႇၵႅတ်ႉသ် ပဵၼ်ၽေးတေႃႇဝဵင်းၼမ်ႉၶမ်း။

ၵူၼ်းၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ဢီႈသင်တႅၵ်ႇတႄႉ ဢမ်ႇႁူႉၶႃႈ လႆႈငိၼ်းသဵင်တႅၵ်ႇ 4 ၵမ်းၶႃႈ ဢေႃႈ။ ႁိူၼ်းယေး ပေႃးသၼ်ႇ ၶႃႈၼႃႇ။ ၵူၼ်းမိူင်း  ၵမ်ႈၼမ်တႄႉလၢမ်းဝႃႈ ၶႄႇၶဝ်ပွႆႇၵႅတ်ႉသ်ယူဝ်ႉၼႆၶႃႈ။ မိူဝ်ႈၵူႈပွၵ်ႈၵေႃႈ ပေႃးၶဝ်ပွႆႇၵႅတ်ႉသ် ၼိုင်ႈၵမ်းၼိုင်ႈၵမ်းၼႆႉ သဵင်လင် ၊ ၽႅၼ်ႇလိၼ်ပေႃးသၼ်ႇဝႆ ၸိူင်ႉၼႆၶႃႈဢေႃႈ။ ၵူၺ်းၵႃႈ ဢၼ်ၶမ်ႈဝႃးၼႆႉတႄႉ သဵင်ၵေႃႈလင် ထပ်းၵေႃႈထပ်းၵၼ် 3-4 ၵမ်းလႄႈ တူၵ်းၸႂ်ၵၼ်ယူႇဢေႃႈ။   ပေႃးဝႃႈ ပဵၼ်မၢၵ်ႇ တႅၵ်ႇတႄႉ ၼႂ်ၼႆႉ ႁဝ်းၶႃႈတၢၼ်ႇႁူႉ ဢွင်ႈတီႈမၼ်းယဝ်ႉၶႃႈ ဝႃႈတႅၵ်ႇတီႈလႂ်ၼႆ”- ဝႃႈၼႆ။  

ဢွင်ႈတီႈၵုမ်းၵမ် တေႃႈလွတ်ႇၵႅတ်ႉသ် တီႈၸႄႈဝဵင်းၼမ်ႉၶမ်းၼႆႉ ပဵၼ်တီႈဝၢၼ်ႈၵွင်းၵၢတ်ႇ။ တေႃႈလွတ်ႇၵႅတ်ႉသ်ၼႆႉ လုၵ်ႉ တၢင်းမိူင်းရၶႅင်ႇ လတ်းမိူင်းတႆးသေ သူင်ႇၶဝ်ႈၸူးမိူင်းၶႄႇ။ တီႈဝဵင်းၼမ်ႉၶမ်းၼႆႉသမ်ႉ ၶႄႇဢဝ်တေႃႈၵႅတ်ႉသ် လတ်းဝဵင်းဝႆႉလႄႈ ပေႃးပိၵ်ႉ/ပိူတ်ႇၵႅတ်သ်ႉ ၼိုင်ႈၵမ်းၼိုင်ႈၵမ်းၸိုင် ႁႅင်းပုင်ႈႁႅင်းႁုၵ်ႉမၼ်းတုမ်ႉယွမ်ႈဝဵင်းၼမ်ႉၶမ်း။ ၵမ်းၵမ်းပဵၼ်ၽႅၼ်ႇလိၼ်ဝႆ၊ ၵူၼ်းမိူင်းၼမ်ႉၶမ်း ၵႆႉလႆႈတူၵ်းၸႂ်ၸွမ်းတႃႇသေႇ။  

“သင်ဝႃႈ တေႃႈလွတ်ႇၵႅတ်ႉသ်ၼႆႉတႅၵ်ႇတႄႉၸိုင် တွၼ်ႈတႃႇ ၵူၼ်းမိူင်းၼမ်ႉၶမ်းတႄႉ ပဵၼ်ဢၼ်မႆႈၸႂ်လူင်ဝႆႉၼင်ႇၵဝ်ႇၶႃႈဢေႃႈ။ တေႃႇ လွတ်ႇၵႅတ်ႉသ်ၼႆႉ လတ်းႁိမ်းၸမ်ဝဵင်းၼမ်ႉၶမ်းၼႃႇၶႃႈ။ ၶႅပ်ႇလူင်ၵႂႃႇၸွမ်းၼႂ်းတူင်ႈၼႃးၼၼ်ႉၶႃႈၼႃႇ။ မၢင်တီႈလတ်း ၼႂ်း ဝၢၼ်ႈၵွၼ်ႇဢေႃႈ။ မိူဝ်ႈဝႃးၼႆႉ ၶဝ်ပွႆႇ ၵႅတ်ႉသ်ၶဝ် သဵင်ပေႃးႁႅင်းပဵၼ်ထၢၼ်ႇၼႆႉ သင်ဝႃႈမၼ်းတႅၵ်ႇၼႆ တေႁႅင်းလိူဝ်ၼႆႉထႅင်ႈၵႃႈ ႁိုဝ်”- ၵူၼ်းၼုမ်ႇပိုၼ်ႉတီႈ ၼမ်ႉၶမ်းၵေႃႉၼိုင်ႈ လၢတ်ႈၼႄၼင်ႇၼႆ။  

ဝၢႆးသေ ၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ယိုတ်းဢႃႇၼႃႇ ၸိုင်ႈမိူင်းႁူမ်ႈတုမ်မႃးယဝ်ႉသေ ၼႂ်းမိူင်းႁူမ်ႈတုမ်ၼႆႉ မီးမႃးလွင်ႈၶဵင်ႈ ၶႅင် ၵၢၼ်မိူင်းမႃးႁၢဝ်ႈႁႅင်းလႄႈ ယူႇတီႈတၢင်းၶွင်ႇသီႇသိုၵ်းမၢၼ်ႈ မိူၵ်ႈမႂ်ႈ ၸႂ်ႉၶႄႇဢဝ်ႁူမ်ႇလူမ်ႈ ပၼ်တေႃႈလွတ်ႇၵႅတ်ႉသ်လႄႈ ၼမ်ႉမၼ်းလိပ်း ဢၼ်လုၵ်ႉတၢင်းမိူင်းႁူမ်ႈတုမ် သူင်ႇၸူးတၢင်းမိူင်းၶႄႇၼၼ်ႉ  ။